لقاء الملائكة

كان مرة فيه ولد صغير بيقضي كل وقته انه يحلم

وف مرة كان حلمه انه يقابل ملاك من الملايكة اللي بيسمع عنهم على طول

وف لحظة قرر انه يروح للمكان اللي بيعيش فيه الملايكة ولانه عارف ان الملايكة مكانهم بعيد عنه اوي قرر انه يستعد للرحلة الطويلة
جاب شنطة المدرسة وملاها ساندوتشات وكيك وعصير وبدأ رحلته
فضل ماشي واول ما تعب بص لقى محطة و لقى واحده ست كبيرة ف السن قاعدة على محطة الاتوبيس بتتفرج على الناس والعربيات.

الولد قام قاعد جنبها وقام فاتح شنطتة ومطلع علبة عصير وكان هايشربها لما التفت للست اللي قاعدة جنبه وفكر ان شكلها تعبان وممكن تكون جعانة فقام مطلع ساندوتش من الشنطة ومد ايده للست

فالست مدت ايدها واخدت الساندوتش وشكرته بابتسامه
الابتسامة بتاعه الست كانت من الحلاوة للدرجة اللي خلت الولد يتمنى يشوف الست دي بتبتسم مرة تانية

فقام مادد ايده مرة تانية جوة الشنطة ومطلع علبة عصير ومديها للست اللي تاني اخدتها منه وابتسمتله ابتسامة تانية حس الولد معاها انها يمكن احسن من الاولانية وكان ف منتهى السعادة
فضل الولد والست الكبيرة قاعدين ياكلوا ويشربوا اكتر من 3 ساعات من غير مايقولوا كلمة لحد ما الدنيا بدأت تضلم

وهنا حس الولد انه اتاخر وانه محتاج يروح يرتاح
قام الولد وحط شنطته على ضهره ويادوب مشي هما خمس خطوات قام واقف ومتدور ورجع جري للست الكبيرة وقام حاضنها اوي فالست ضحكت ف وشه وابتسمت احلى ابتسامة ف الدنيا بالنسبة له
الولد رجع البيت ومامته شافته فاستغربت من حالة السعادة والرضا اللي ماليه وشه فسألته ايه حصله النهاردة خلاه ينبسط ويفرح اوي كده؟
الولد رد بكل تلقائية: اصلي اتغديت مع واحد من الملايكة النهاردة
وحتى قبل ما مامته تظهر استغراب من كلامه قام قايل : بس تعرفي الملايكة دول بيبتسموا احلى ابتسامة ف الدنيا كلها
وف نفس الوقت ف مكان تاني كانت الست الكبيرة رجعت لبيتها ماليها نفس احساس السعادة والرضا اللي عند الولد لدرجة ان ابنها اندهش جدا من حالة الفرح اللي والدته كانت عليها فسألها : ايه اللي مخليكي فرحانة اوي كده النهاردة يا ماما؟
وبنفس تلقائية رد الولد على مامته ردت الست على ابنها : اصلي اكلت النهاردة مع واحد من الملايكة
وقبل ما تستنى رد ابنها كملت كلامها وقالت : بس تعرف انا كنت متوقعه الملايكة اكبر من كده بكتير

Too often we underestimate the power of a touch, a smile, a kind word, a listening ear, an honest compliment, or the smallest act of caring; all of which have the potential to turn a life around.

الناس بتدخل حياتنا لسبب معين مع اختلافه لكن لازم لوجودهم ف حياتنا سبب وممكن يكون وجودهم لفترة صغيرة او لباقي عمرنا
فمش تضمن وجود حد طول الوقت واغتنم الفرصه وافرح بوجودك معاهم طالما هما موجودين معاك

الحدوتة بتاعة

Julie A. Manhan

النسبية من منظور اخر

شدني جدا سؤال كان مكتوب ف مجلة مجهولة الغلاف ولا يمكن الاستدلال عن اسمها

ولا عارف بتاعة مين ولا بتقول ايه
كانت مجرد ورقة مقطوعة ومرمية باهمال ف الارض بعد ما تقريبا اتمسح بيها شوية زيت وقعوا من طبق فول كان حد بيتسحر بيه امبارح ف الشغل وجة الحظ انها تقع تحت عيني ف وقت كنت فيه حاسس بقمة الملل ومش لاقي حاجة اعملها
السؤال بقى بيقول : علل
وضح من وجهه نظرك العقيمة ايه اعظم اكتشاف عرفته البشرية؟
ايوة قال العقيمة وانا هاجيب حاجة من بيتنا
فانا قمت مترجم السؤال للغة العربية بتاعتنا علشان اقدر افهمه وبعدها سألت نفسي لو حد سألك السؤال ده كان هايبقى ايه ردك ساعتها يا ابو العريف؟
وبرغم انه سؤال شكله يخض فاكيد الانطباع الاول عنه هايكون حاجة من اتنين مالهمش تالت
يا اما هاتعتبرة سؤال رخم الغرض منه احراجك واظهارك ف صورة وحشة هي اصلا صورتك الحقيقية لو انت من الناس اللي معلوماتها العامة بعافية شوية لانك بكل بساطة مش هاتكون عارف يعني ايه كلمة اكتشاف اساسا علشان تقدر تعرف اعظمها
يا اما هاتعتبرة فرصة عظيمة للتعريف بقيمة معلوماتك لو انت من هواة المنظرة وهاتختار اكتشاف مش فيه حد سمع عنه غيرك او ممكن مش يكون اكتشفوه من الاصل وتفضل تعيد وتزيد ف السبب اللي خلاك اخترته من دون كل الاكتشافات علشان تبين ان حضرتك عملاق المعرفة والمبحر ف كنوز العلم المجهول
وعلى الرغم ان السؤال كان ليه ردين مالهمش تالت
انا بقى لقيتني بأرد الرد التالت اللي كنت فاكره مش موجود بس الصراحة دخل دماغي جدا مع انه المفروض يكون الرد اللي ينط ف دماغ اي حد يتسأل السؤال ده وساعتها حسيت باحساس اجمل من احساس عبدالحميد ارسطو فيلسوف السبتية لما اختاروه حكم ف الماتش النهائي ف الدورة الرمضانية
قلت ايه حضرتي بقى ؟

قلت ان الموضوع نسبي
بمعنى ان كل واحد هايختار اكتشاف استفاد بيه بطريقة او باخرى ويقول علية اعظم اكتشاف ف الدنيا من غيرة كان ميزان الطبيعة هايختل
يعني الانسان القديم هايعتبر النار اعظم اكتشاف علشان بعد ما كان بياكل اللحمة نية بقى ياكلها نص سوى

ومريض السكر هايقول ان الانسولين ده اعظم اكتشاف

والقبطان هايقول انه قانون الطفو هو اعظم اكتشاف علشان من وراه بيسترزق ويعمله كام نقله بالمركب بتاعه ويرجع ف اخر الليل معاه عشين جنية ونص كيلو لحمة

وتامر حسني هايقول انه شريط الكاسيت

ونادية الجندي هاتقول عمليات التجميل وهكذا
طبعا سامعكم ف نفس واحد بتقولوا : ايوة وبعدين طب فين الاجابة؟ ما اي حد هايقول كده. يعني انت بسلامتك جبت التايهة . ما احنا عارفين.
بصراحة اتحرجت من نفسي اوي وانا شايف صوابعكم اللي مش عايزة قطعها عمالة تشاور عليا وتقول : عبيط ده ولا ايه؟
حسيت اني عملت زي اللامؤاخذة الحمار اللي بيلف ف ساقية بيلف ويدور حوالين نفس النقطة مش جاب جديد
بس انا مقتنع بكده. ان الموضوع نسبي بس قعدت طبعا افكر ف اكتشاف انا عارفه علشان اقوله علشان مش يبقى منظري وحش قدام نفسي
يعني لحفظ اراقة دماء ماء الوجة بس
وقلت البترول هو اعظم اكتشاف علشان لقيتلي فية شغلانة اكل منها عيش بدل ما ابقى عواطلي
بس مش كانت الفكرة راضية تسيبني وفضلت مسيطرة عليا لحد ما اللمبة اللي فوق دماغي نورت دلالة على الاكتشاف الكبير
النسبية طلعت ف حد ذاتها اكتشاف
هيييييييييييييييييييييييه
ايوة والله بجد زي ما بقولكوا كده
يعني انا ف التمام الحمد لله واقدر بكل ثقة اطلع لكل واحد ضحك عليا فيكوا لساني وانا منشكح
يبقى بالنسبة ليا الجواب النهائي هو النسبية اعظم الاكتشافات
واحد رخم يقولي طب ايه اسبابك ودوافعك
يابن اللذينا يا بارد
بس ولو
على مين يا معلم ده انا الرخامة مشتقة من اسمي
النسبية دي حلت لنا مشاكل كتير جدا كنا ممكن نقع فيها وممكن بسببها حياتنا تضيع وحياة ناس تانية معانا
اديلكم مثال
واحدة بتقول لجوزها اول ما صحي من النوم: بتحبني اد اية يا ابو مرسي
طبعا ده سؤال لا ينم عن خير

الحاجة ام مرسي عايزة توقع الراجل ف الخية وهو مش ف وعية علشان تخلعه
كمان ده سؤال مالوش اجابة. يعني هايقولها ايه ؟ باحبك اوي . طب اوي دي كام كيلو ؟ يبقى باحبك جدا . و جدا دي اقسها بالمتر ولا بالميل؟
مشكلة مالهاش لازمة فعلا لكن جت النسبية وحلت الموضوع ف كلمتين
بتحبني اد اية ؟ من غير ما يفكر وبكل تلقائية يرد : باحبك آاااااااد الدنيا دي كلها.
يابن اللعيبة يا اينشتاين
الراجل نسب مقدار الحب اللي" المفروض " يحبه لمراته بحجم الدنيا
دلوقت الكرة ف ملعبها قوليلي الدنيا اد ايه اقولك باحبك اد ايه
بصراحة انا لقتني باصقف للراجل ودماغه
وبعدها لقيت المشاهد بتكر قدامي زي الخيط
لما حد صايع يحب يخوفك منه ويحب يوصلك انك هاتتعب معاه يقولك ايه؟

باستخدام النسبية برضه
يقولك انا صايع بحر . انت تعرف البحر اد اية ؟ اكيد لأ
لما تعجبك حاجة وتحب تبين مدى اعجابك ده تقول ايه ؟
دي جامدة اخر حاجة . لما توصل للاخر هاتعرف عاجباني اد ايه
لما تلاقي واحد ماشي ووشه سبعات وتمانيات وتسأله بكل براءة : الدنيا عاملة معاك ازاي ياعم الحاج؟
يقولك كلمة تلخص كل حياته : زي الزفت . الراجل ادهالك وش ومش محتاج تعرف حاجة تاني علشان يبان حاله ولو سألته سؤال تاني يبقى انت البعيد حمار
لما ام توصف لابنها العروسة اللي جايباها ليه تقوله : دي خدودها تفاح امريكاني
لما حد يقولك انه مستحمل البلاوي اللي بيشوفها يقولك: ده صابر صبر ايوب
لما حد يوصفلك واحد منكد عليه حياته وبيعامله بتكبر يقولك: ده متفرعن عليا " نسبة لفرعون "
لما حد يقولك انه فاهمك وانه حاسس انك بتستعبطه يقولك: انت فاكرني هندي
لما حد يحكيلك عن واحد ماشي يبهدل ف خلق الله ضرب وقلة قيمة تقوله: ليه هو هيركليز
لما حد بيعلن عن المنتج المصري يقولك : لا تقولي صيني ولا ياباني من صنع بلدنا ولو جيبته هاتجيلي تاني
يعني مش هايستحمل معاك يومين
داليا البحيري لما سألت خالد النبوي عن طموحاته الضايعة ف الفيلم
كان ايه الحوار؟
هي : واحلامك يا يوسف ؟
قالها ايه؟ ضاعت ؟ لأ . اتبخرت ؟ برده لأ
قالها : زي الهوا
لو قدرت هي تمسك الهوا هو هايقدر يحقق احلامه بس يبقى يقابلني بقى
دي فيروز بذات نفسها عملت كده
"شايف البحر شو كبير .. كبر البحر بحبك "
ياسلام عليكي . تطبيق رائع لاكتشاف اروع
انك تنسب حاجة مش قادر تعبر عن قيمتها الحقيقية لحاجة تانية معروفة ف المجمل فده انا شايفه قمة العبقرية
تصوروا الراجل اللي مراته سألته ده كان قعد يفكر ف مدى حبه وهانفترض انه بيحبها فعلا كان ممكن يكون ايه مصيرالمستقبل معاه هو وعياله من غير النسبية ده لو اعتبرنا ان مراته ست طيبه ومش هاتخلص عليه وقتي
لو الراجل اللي سألته عن احواله قعد يفكر ف اد ايه حياته وحشة مين كان هايحس باللي هو فيه من غير النسبية
مين كان هايستنى يسمع منه اساسا . وقيس على كده كل حاجة ف دنيتنا دي
رحمك الله يا اينشتاين

من غيرك الدنيا كانت هاتبقى سلطة

الجواب و عنوانه

كعادتي كل سنة لازم اعيد عليكوا والعيدية السنة دي قصه زي السنة اللي فاتت المهم انها تعجبكوا

كل سنة وانتم طيبين

مشهد خارجي وهايبقى داخلي كمان شوية / صباح يوم عادي

اول حاجة عملتها منى اول ما النهار طلع انها راحت لصاحبتها وصديقه عمرها رشا بعد ما رشا كلمتها مكالمة قلقتها جدا وخلتها مش عرفت تنام

رشا كانت ف حالة صعبة جدا وبالعافيه قدرت تفهم منى من كلام صاحبتها انها واقعة ف مشكلة كبيرة مسيطرة عليها وبتمر بأزمة وانها محتاجة ليها جدا

رنت منى جرس الباب فتحت مامة رشا واول ما شافت منى راحت واخداها ف حضنهاو قالتلها الحقيني يا منى صاحبتك هاتموت مني

انا مش عارفة مالها من امبارح لقيناها رجعت من برة دخلت على اودتها وهما دقيقتين ولقينا هيستيريا البكا مسكتها وعمالة تصرخ وتكسر ف كل اللي قدامها

انا خايفة عليها جدا هي مش بتتكلم غير معاكي ارجوكي حاولي تعرفي مالها

مش فيه اي حاجة توصلنا للحالة دي
دي بنتي الوحيدة وبدأت مامت رشا تبكي فرق قلب منى للحالة اللي فيها صاحبتها و مامتها

فقالت ليها اطمني يا طنط ان شاء الله مش ماشية غير لما رشا تضحك تاني

كل حاجة هاتبقى تمام استأذنك انا داخلالها

دخلت منى على رشا ف الاوضه فاتخضت من منظرها

لقت المكان متدمر ومخدات متقطعة ومرايات مكسورة

الاوضه ف حالة دمار شامل

لكن الاكتر انها لقت صاحبتها ف ركن الاوضه ف حالة وحشة جدا ومنهارة تماما

منى اتصدمت من المنظر ومش قدرت تتمالك اعصابها وبدأت تعيط وهنا حست صاحبتها رشا ان منى موجودة ف الاوضة

وكأنها غريق ف وسط البحر لقي خشبة يتعلق عليها قامت جريت عليها واترمت ف حضنها وقعدوا الاتنين يعيطوا مع بعض

بعد فترة مش عارف اد ايه بصت منى ف وش صاحبتها وقالتلها ليه كل ده هو فيه حاجة تستاهل ان الجمال ده كله يعمل ف نفسه كده

بصت رشا ف الارض بصة انكسار كانت ابلغ من اي رد

منى قلقت وبدأت تستجوب رشا

قوليلي انا اختك وكاتمة اسرارك احكيلي علشان لو انتي ف ورطة نقدر نفكر سوا وان شاء الله كله يتحل

ردت رشا : الا مشكلتي انا. انا اللي استاهل

انا اللي امنت له وحبيته رغم الفوارق الكبيرة بينا واللي كل الناس كانت شايفاها الا انا وتبدأ ف العياط مرة تانية

منى بترد بريبة : تقصدي سي زفت كريم

عمل ايه تاني

اوعي يكون حصل منه حاجة

لو زعلك انا اقطعلك رقبته

رشا تعيط بصوت اعلى من غير ما ترد

تتضايق منى وتمسك رشا بعصبية وتقول ردي عليا عمل ايه الحيوان ده

رشا بصوت مش مسموع من كتر العياط : قعد يضحك عليا بكلامة ويوهمني لحد ما اخد اغلى حاجة عندي

تخبط منى بايدها على صدرها وتقول يانهار اسود

انتي اكيد اتجننتي ازاي ده حصل

ترد عليها رشا ارجوكي انا باتقطع مش طايقه انا مش قادرة اصدق ازاي قدر يضحك عليا

منى تصرخ فيها : هو انا لسه قلت حاجة انت دماغك كانت فين لما ده حصل ازاي

رشا وسط البكا : ياريتني ما شفته ياريتني ماعرفته

استغل حبي ليه واني مش بارفضله طلب وقام عمل عملته

منى بعصبية : وفين سي زفت ده دلوقت طبعا بيتهرب منك

انا مش قادرة افهم ازاي مش اتعلمتي من كل الافلام والمسلسلات اللي بنشوفها

رشا تبص لصاحبتها وتمسح دموعها فتبان لمعة غريبة ف بصتها كأنها افتكرت حاجة مهمه : هاييجي غصب عنه اصله مش اخد كل حاجة

منى : انتي عبيطة يا بنتي مين اللي يجي ده هو عايز ايه تاني منك

رشا بفرحة : اصله اخده من غير الشاحن

منى وعلامات البلاهه على وشها: شاحن ؟؟؟!!!! هو كريم اخد ايه بالظبط ؟


رشا بكل اسى وانكسار : اخد الاي بوود بتاعي

!!!!!!!!!!!



الخلاصة :

لو كنت فاكر انك بتفهمها وهي طايرة

فمش بالضرورة تكون بتفهمها قبل ما تطير

استناها لحد ما تطير

لحسن تفهمها غلط

او تكتشف انها مش بتطير اساسا

*منفذ الى الجنة

الحكاية دي حكاية راجلين كانوا بيتعالجوا ف نفس المستشفى وكمان كانوا قاعدين مع بعض ف نفس الاوضه واحد منهم كان مريض بمرض مياة على الرئة وكجزء من العلاج كان كل يوم لازم يقعد بعد الضهر لمدة ساعة علشان تصريف السوائل الموجودة على الرئه

الراجل ده كان السرير بتاعه جنب الشباك الوحيد اللي ف الاوضه

التاني كان ف الناحية التانية من الاوضة وكان مش مسموح له حتى انه يحرك دماغه لكن كان دايما نايم على ضهره وباصص لسقف الاوضه طول الوقت

الاتنين اتعرفوا على بعض وكان كل وقتهم وهما صاحيين بين العلاج والكلام مع بعض

اتكلموا مع بعض عن كل حاجة

البيت والعيله ووظايفهم واصحابهم وشغلهم وحتى ذكريات الطفولة والدراسه وفترة التجنيد حتى ايام الاجازات كانوا بيحكوا لبعض كانوا بيقضوها ازاي

كل يوم بعد صلاة العصر بالظبط على طول الراجل اللي قاعد جنب الشباك كان يتعدل ف مكانه ويقعد لمدة ساعة زي ما الدكتور قال

كان بيفضل طول الساعة دي يحكي لصاحبه ف الناحية التانية من الاوضه على كل حاجة هو شايفها من الشباك

لدرجة ان الراجل اللي قاعد ف اخر الاوضه بقى يستنى الساعه دي بفارغ الصبر

ده كان الوقت الوحيد الي كان بيحسسه انه لسه عايش ف الدنيا

كان الراجل يقعد جنب الشباك اللي كان موجود ويحكي لصاحبه على الجنينة اللي بيطل عليها الشباك

بيحكيله انها كانت جنينة كبيرة وفيها بحيرة بط ف النص بيلفوا جواها والاطفال اللي بيلعبوا على المراجيح وراكبين مراكب والشباب اللي ماشيين ماسكين ايد بعض ومشبكينها وماشيين وسط الورد اللي على كل لون وشكل

كل ده وراه منظر السما الصافيه بيكمل صورة ربنا ابدعها

كان كل ما الراجل اللي جنب الشباك يوصف حاجة صاحبه ف اخر الاوضه يغمض عينيه ويتخيل كل حاجة بتتوصف له وكأنه بيتفرج على فيلم سينما

كل يوم الراجل جنب الشباك يوصف حاجة جديدة بتحصل بره المستشفى ومهما كانت الحاجة اللي بيوصفها كان الراجل ف اخر الاوضه بيعمل نفس الحاجة

يغمض عينيه ويعيش كل كلمة وكل صورة بيوصفها الراجل جنب الشباك

مش بقى محتاج انه يبص على الشباك صاحبه بينقله كل حاجة بتحصل وهو يغمض عينيه ويشوفها بتحصل قدامه

مرت الايام والاسابيع وكل يوم بعد صلاه العصر بالظبط يبدأ الراجل جنب الشباك يوصف لصاحبه اللي بيحصل بره الشباك

وف يوم قبل العصر بالظبط دخلت الممرضه عليهم علشان تديهم الدوا لقت الراجل جنب الشباك نايم وعلى وشه احلى ابتسامة ف الدنيا وقد فارقته الحياه

مات الراجل جنب الشباك وزعل عليه كل الناس خصوصا صاحبه اللي سابه لوحده

الراجل ف اخر الاوضه

عدت الايام ممله بطيئة وف يوم طلب الراجل ف اخر الاوضه من الممرضة انه ينتقل مكان صاحبة المرحوم

الممرضه وافقت وف ساعتها بدأت تنقل الراجل الممدد على سريره من مكانه لمكان صاحبة

ف الجانب التاني من الاوضه وبعد ما اتاكدت ان الراجل مرتاح ف مكانه الجديد ودعته وسابته لوحده

اول حاجة عملها الراجل بعد ماسابته الممرضه انه حاول يتحرك

حاول ببطء وبكل الالم والتعب استجمع لراجل قواه رغم الخطورة اللي ممكن يتعرضلها ومال على جنبة اليمين لاول مرة من زمان علشان ياخد اول نظرة من فترة طويله على العالم اللي موجود بره الاوضه وببطء شديد رفع عينة علشان يبص على الشباك

اتفاجأ جدا لما لقى قدامة حيطة مش عليها اي حاجة حتى لو صورة

نادى على الممرضة وقالها انه مش عايز يكون ف المكان ده هو عايز يبقى مكان زميله اللي كان بيوصفله كل يوم اروع المناظر اللي بيشوفها

عايز يكون جنب الشباك

ابتسمت الممرضة وقالتله ان هو ده مكان زميله

بس اصلا زميله كان لا يمكن يعرف ان فيه شباك على الحيطة حتى لو موجود علشان كان كفيف

وكملت كلامها وقالتله

هو يمكن كان بس بيحاول يسليك

* البوست كان قصة انجليزي قريتها وعجبتني فحاولت اترجمها واحطها يمكن تعجب حد تاني

احلى طعم للسعادة بتديهولنا الدنيا بيكون لما نخللي اللي حوالينا سعدا مهما كان احساسنا اللي بنمر بيه

لو عايز تحس انك تملك الدنيا كلها فكر ف الحاجات اللي ربنا انعم بيها عليك ومش كنت تقدر مهما كنت تملك انك تشتريها

استمتع بيومك على اد ما تقدر وعيش النهاردة بكل طاقتك علشان بكرة لسه مش موجود

رباعيات الا ربع

انا لما بافرح باضحك من جوة قلبي
ولما ازعل بيتفرش بالحزن دربي
هو الناس مش عايزة زعل ولا ايه
طب كيف اخلي ساعتها وشي يخبي

مش عجبي

من خمستااااشر سنه كان انا وكنت هو

بعد اسبوع عصيب من الشغل جت الفرصة اني انزل البلد
والشواطئ مليانة بشر لكن اخيرا شفت ناس بهدوم طبيعية مش اوفرولات
محتاج اقعد على البحر جدا بس طبعا الناس محتلة المساحة كلها يادوب بس شايف البحر من بعيد بس طبعا ريحة البحر مالية الجو وده المهم بالنسبة لي
انا احساس البحر بيوصلي من الريحة
من بعيد لمحت ولد صغير يعني تقريبا يدي بالكتير عشر سنين
علق معايا اوي ولقتني مركز معاه جدا وحتى فصلت عن باقي اللي بيحصل حواليه
اشمعنى ده بالذات اللي يلفت نظري جامد كده
يعني هو ولد عادي مش امور زيادة مثلا ولا اصلا اعرف دمه خفيف مثلا ولا فيه حاجة مميزة تلفت النظر للدرجة بس انا حسيت اول ما شفته بحاجة غريبة
ركزت شوية وشغلت الذاكرة
ايوه اهو بدأت افتكر
انا شفت الولد ده قبل كده بس فيييييين؟؟
عيني لسه عليه مراقباه وهو عمال يضحك ويتنطط ويلعب ف المية وهو راكب العوامة بتاعته وبيشاور لاخوة الصغير انه يجمد قلبه ويلمس المية
ماشاء الله بيضحك من قلبه شفت سنته وهي بتلمع لما الشمس وقعت عليها تمام زي ما باشوف ف افلام الكرتون
قعدت اراقبة طووول اليوم وهو بيلعب ف المية وهو بيبني بيت على الرمل وهو بيلعب كورة مع اخوة الصغير وهو بياكل الساندوتشات اللي مامته عاملاها وهو بيجيب ايس كريم
من الاخر قضيت النهار كله باتفرج عليه ومش سيبته غير وهو بيلبس هدومة علشان ماشيين
ساعتها بس افتكرت انا شفت الولد ده فين
او بمعنى اصح ليه الولد ده دون باقي الناس علق معايا كده
الولد ده هو انا
قبل 15 سنه بالظبط انا كان شكلي كده بالمللي
كنت باتصرف كده بالمللي

كنت باعمل كده بالمللي
كنت باشبهه بدرجة مش طبيعية
كنت زيه بطريقه مش تتصدق او انا اللي حسيت كده
وانا ف سنه كده كنت برضه باضحك من قلبي

وانا ف سنه كنت باعيش الدنيا كانها الجنة
نفس الروح ونفس الحياة ونفس التصرفات البريئة
وبدأت افكر
امال انا ايه اللي حصللي
ازاي ف عشر سنين بس اتحول للنقيض كده
ازااي اتحولت لحد تاني غير الولد الطيوب اللذيذ اللي بيضحك من قلبه واللي مش بيحسب حساب اي حاجة غير انه يستمتع بكل لحظة تفوت عليه ومش يقرر غير انه يفرح بكل لحظة ويعمل كل حاجة توصله للحالة دي
يمكن الولد ده لسه كده علشان لسه مش كبر ولسه مش عاش ف الدنيا ولا شاف ولا قابل ولا اتعامل مع حاجات تضايقه وتتعبه
ساعتها قلبي وجعني
معقول الولد ده لما يبقى ف سني هايبقى زيي كده
لا طبعا يارب لأ
انا مش اتمناله انه يبقى زيي بعد مايكبر
اتمنى انه يفضل كده على طول تفضل ضحكتة ماليه وشه وتفضل نظرته للدنيا انها هي السعادة وان كل وقت بيمر عليه لازم يعيشه ويعمل اللي يقدر عليه علشان يفرح
لقيتني بدون وعي رحت ناحيته وضحكت جدا ف وشه ومديت ليه ايدي فالولد استغرب بس سلم عليا قمت قلتله على طول
انا عايزك توعدني انك تفضل زي مانت كده على طول

عايز ضحكتك تفضل ماليه وشك مهما حصل وعايزك دايما فرحان مهما حصل

عايزك تشكر ربنا دايما على اي حاجة تحصلك
الولد استغرب اوي وقاللي هو حضرتك مين
قلتله: انا ؟
انا انت كمان 15 سنه لو مش عملت اللي قلتلك عليه
طبعا الولد مش فهم حاجة المهم انا كملت كلامي وقلتله صدقني انت مش هاتحب تكون انا بعد 15 سنه من دلوقت
واديته ضهري ومشيت وانا بادعيلة من كل قلبي انه مش يبقى كده

مش يبقى زيي كمان 15 سنه

مواقف متفرقة

ايه يا توما رأيك ف الطقم ده ؟

يابن اللذينا . اية اللون ده ؟ ده انت بس ناقصلك بقصماتاية

اشمعنى ؟

وتبقى كوباية شاي بلبن

ايه يابني فينك ؟

حتوووووووم . والله مفحوت ف الشقة . بأعمل النور

طب ربنا معاك يا كوتش اشوفك قريبا

ايه يابني ندالة الشراقوة دي مافيش حتى أي مساعدة لاخوك الغلبان

بص انا الحاجة الوحيدة اللي اعرفها ف النور اني اتكهرب

سلام يا مان ابقى خلينا نشوفك

ان شاء الله . انت ساكن فين

مش هاتوه انزل شبرا النملة واسأل على مصطفى الف مين يدلك

لا ياعم انا مش هاقدر

ليه بس !!!؟؟؟؟

اصلي من عيلة بايجون

باقولك ايه

قول مانا عارفك حقنة

ماتعرفش الاوبرا بكام ؟

لا انا باستعمل ..... امممم

نمشيها هيركود

علشان الرقابة

ابقوا استحملوا بقى

هرتلة ف حب البلكونة

بعد رجوعي من بره لقيتني داخل على البلكونة على طول حتى من غير ما اسلم على الموجودين

بقالي زمان مش دخلت البلكونة بتاعتنا. يمكن من اخر مرة محمد كان عندي ودخلنا وقفنا فيها شوية وقبل كده مش فاكر اخر مرة كانت امتى بس اكيد من زماااااااااااان جدا

ساعتها قالللي حلو اوي احساس البلكونة بتاعتكوا

عنده حق

انا باحب جدا اقعد ف البلكونة بتاعتنا فعلا

احط الكراسي قدام بعض وافرد رجل وامدد وابص لفوق واسرح

وانا بابص لفوق اعد ف النجوم والهوا بيخبط ف وشي ومع ذلك عمري ماعرفت اميز مجموعات النجوم

حاولت كتير اميز مجموعات النجوم اللي كنت باسمع عنها واقرا عنها ف الكتب

بلكونتنا احلى مافيها انها مش قريبة اوي من الارض فأشم ريحة التراب ولا عالية اوي فأدوخ وانا فيها

اصل انا اكتشفت ان عندي فوبيا الادوار العليا

من ايام شغلي القديم لما طلعت 40 متر من 60 ومش قدرت اكمل بعدها

ساعتها واجهوني بحقيقة مرضي

دانا شفت ايام ف الشغل ده ربنا مايرجعها ايام على رأي سواق التاكسي ف اعلان ميلودي

لكن للاسف فيها مشكلة

البلكونة طبعا

هي مش مشكلة البلكونة لكنها مشكلة شارع

شارعنا لا ينام طول اليوم

تسمع اصوات الناس والعربيات والكلكسات والزحمة مالية الدنيا

مش باحس اني ف بيتنا لكن ف سوق عكاظ

بس برضه باحب البلكونة

ده كفاية لما ارفع راسي وابص بعيد الاقي شعلة مصنع التكرير البعيد كأنها شمعة عيد الميلاد اللي منورة التورتة

حاسس براحة فظيعة دلوقت

غريبة اوي فعلا

دايما باحس براحة هنا

معقول مفعول البلكونة يكون كده

بس دي مش اي بلكونة دي بلكونة بيتنا

انا ليه مش بآجي هنا كتير

انا ليه مش بآجي هنا من زمان

مع اني اتخنقت قبل كده كتير جدا

طب انا ليه جيت هنا بعد زمان

طب انا ليه مرتاح دلوقت

يمكن علشان ممدد رجلي وسايب نفسي ومفضي دماغي وباصص للسما والهوا بيخبط ف وشي

هو ده صحيح الطقس المثالي بتاع البلكونة علشان تستمتع بيها

بس ايه ده

فين النجوم؟

فين القمر؟

انا مش هاعرف اميز النجوم دي بقى؟

فين السما؟

عينيا حصلها ايه؟

هو احنا النهاردة كام ف الشهر؟

لحظة تمنيت فيها ان اكون مش هنا

ف اللحظة دي

ف الثانية دي

ف الدقيقة دي

ف الساعة دي

ف اليوم ده

مش عايز غير حاجة واحدة بس

ف الدنيا دي

انا عايز اعيش ف كوكب تاني

ولـــــــو" بقالها سنة"

بقالي هنا سنة !!!!! مش مصدق بصراحة

عدى عليا ف بلوجر 365 يوم ... سنة اديتني خبرة ومعارف يكفوني 30 سنة

كنت سمعت مقولة عجبتني جدا واقتنعت بيها كانت بتقول :

من يكتب يعرض افكارة في طبق ليتذوقها الآخرين

فعلا انا ف بلوجر تذوقت اصناف والوان كتييير جدا من الافكار اللي كنت باستغرب ساعات كتير انها ممكن تكون موجودة وحد مقتنع بيها من الاساس

عرفت ناس كتير وعرفت حاجات كتير واتعلمت حاجات كتير واتغير عندي مفاهيم كتير

حبيت حاجات مش كنت باحبها وزهقت من حاجات كنت مدمن ليها

عرفت ناس كبيره ف السن لكن ليها تفكير عصري جدا وعرفت ناس اصغر مني لكن تفكيرهم سابق سنهم

عرفت ان الابداع والموهبة مش حكر على اللي بيدخلوا كليات نظرية لكن اكتشفت ان الكليات العمليه خصوصا هندسة وصيدلة كمان فيها ناس قمة ف الابداعوموهبة

عرفت ان الكليات النظريه مش فيها ناس دماغها فاضيه لكن معظمهم ناس بتهتم بمواضيع جدية ومهمة

عرفت ان مش كل البنات بتفكر ف الموضه ومنتظرة ابن الحلال وتفكيرهم سطحي لكن عرفت بنات دماغها توزن بلد

عرفت ان مش كل الولاد بيفكروا ف الكورة لكن عرفت اولاد رغم صغر سنهم لكنهم مهموين بقضايا مش ف دماغ رئيس جمهورية

عرفت ان مش كل الاخوان اعداء للبلد ومش متطرفين ومعاديين لأي فكرة تعارضهم لكن فيهم ناس كتير جدا قمة ف حب الوطن والديموقراطية ورجاحة العقل

عرفت ان مش علشان مش هاتسمع يبقى اسكت لكن اتكلم زي ماناس كتير عملت وفعلا عملوا فرق

عرفت ناس عايشه ف احلام وردية وعايزة الدنيا تبقى احسن وعرفت ناس واقعية بتدعو لتغيير حياتنا وترك سلبياتنا

عرفت ان كل ناس بلدنا بتحب بلدنا

عرفت ناس الواحد يفخر انه يقول انه مصري علشان يرتبط معاهم باي صلة حتى لو كانت فقط الجنسية

عرفت ناس قمة ف الرزانة وعرفت ناس قمة ف خفة الدم والانطلاق

عرفت ناس بتحب الدنيا اوي بس مش بتغرها وعرفت ناس بتحب ربنا اوي وبرضه بتتمتع بدنيتها

انا باشكر كل واحد قريتله كلمة عجبتني انه حببني ف بلدي وخلاني فخور ان فيها ناس ماشاء الله

وباشكر كل حد عدى من هنا واداني دقيقة من وقته وبادعي ان يكون كل حد عدى من هنا مش حس ان وقته ضاع بدون استفادة فلو مش كان عجبه البلوج فيارب مش يكون كرهه

سعيد جدا بمعرفة كل حد فيكوا

بوست جديد

الصاحب الصاحب والصاحب المعرفة

واحد صاحبي سألني مرة : ايه الفرق بين الصاحب الصاحب والصاحب المعرفة؟

انا بصراحة استغربت السؤال بس حاولت ابان بمظهر الشاب العالم ببواطن الامور فقلت: ايه العبط ده ؟

معروف ان الصاحب الصاحب : صاحب والصاحب المعرفة : معرفة

طبعا ضحكنا بعد ما قلت الكلمتين دول وبعد ما قالي :الله ينور عليك نورت المحكمة حبس 10 سنين مع الشغل

قاللي : طب بطريقة تانية ايه الفرق بين ( س ) وبينك ؟

انا قلتله : عروستي !!!!

وبعد ما زهق مني ومن انه ممكن يلاقي عندي الاجابة قاللي درس عمري

فرق كبير بين ان يكون ليك واحد ممكن تقول عليه صاحبي بكل ما تحمله الكلمة من معنى وبين واحد تعرفه بس بتقول عليه صاحبي

الصاحب المعرفة ده حد انت فعلا تعرفه. تعرف اسمه وعنوانه وبتشوفه من وقت للتاني وممكن تلاقي ان فيه حاجات كتير بينكوا مشتركة شخص بيرتاحلك وبترتاحله

طبعا انا لايمكن افوت فرصة زي دي فقلتله : ده احنا يابني . انت بتتكلم عننا . بس كل ده وبتقول :- معرفة !!!!

قاللي وملامحة اتغيرت وبصوت بقى هادي بطريقة مش طبيعية : للاسف صح ده احنا بس اسمع للاخر

ممكن يكون كل ده بيحصل فعلا لكنك بتكتشف ان صاحبك المعرفة ده مش بيشاركك حياتك . ساعات كتير مش بيفهم تصرفاتك وبيستغرب افعالك وتكتشف انه مش يعرف عنك اي حاجه خالص

لا بتحب ايه ولا بتكره ايه ولا بتعرف مين ولا عايش ازاي ولا بتفكر وتحس بايه

تكتشف انكوا بتعرفوا بعض بس من غير ما تعرفوا بعض

لو بصينا للناحية التانية على الصاحب الصاحب

فده حد بتحبه وبتهتم بيه وتفتكره حتى وهو بعيد ومش موجود

شخص بتأتمنه على حياتك واسرارك

ناس بتفتكرهم لما تشوف حاجه بيحبوها او حاجه كانت عاجباهم او حاجه ممكن تليق عليهم

كل ده تعرفه علشان انت عارفهم كويس . تعرف بيحبوا ايه وبيحسوا بأيه

ناس دايما ف بالك وبتفكر فيهم باستمرار

الصاحب الصاحب حد بتحس بالراحة لما تتكلم معاه وتدور عليه علشان تطمن على احواله ولما مش يبان يومين تحس بالقلق والخوف عليه لغايه ماتطمئن

علشان انت عايز تطمن وعلشان انت عارف ومتأكد ان ده هايكون نفس فعله ف حاله انقلب الوضع

ناس بتسأل عليك لمجرد انها تطمن مش علشان مصلحة او علشان ده واجب

ناس بتسأل علشان الاصحاب مش بيحتاجوا سبب يسألوا بيه على بعض

الصاحب الصاحب بيقولك الحقيقة بدون خجل او مواربة وعارف انك هاتتفهم وبيخاف عليك علشان عايزلك الاحسن

دايما موجود لما تحتاجه وبيسمعك من غيرماتطلبه وبيقولك على الصح بدون انتظار لمقابل

مش بيضحك عليك ولا بيستغلك ولا بيجرحك ولو عمل حاجه تضايقك بتكون من غير قصد ويفضل يحاول بكل الطرق بعدها انه يعوضك

حد بيحبك حب انت نفسك مش بتبقى حاسس اد ايه

الصاحب الصاحب بيبكي لبكاك وبيفرح لفرحك

اخر واحد ماشي ف الفرح واول واحد جاي ف الحزن

بيكون موجود لما الدنيا كلها مش موجودة

هو اللي بيوقفك عن الغلط وبيواجهك بأخطائك ويساعدك علشان تعالجها

هو اللي بيقف جنبك ويمدلك ايده يعلمك ويتعلم منك

الصاحب الصاحب هو الشخص اللي حياتك لا يمكن كانت تكون زي ماهي ف وجوده

طبعا انا ساعتها عرفت اني مش كنت بالنسبة له اكتر من واحد معرفة بس اتعلمت بعدها اني اكون مع اي حد اعرفه صاحب بجد

علشان كده انا بافخر اني اقول ان كل واحد فيكم بالنسبه لي

الصاحب الصاحب

اهلا اهلا بالصيف

مع دخول فصل الصيف انا كمان بالاقيني داخل معاه ف حالة تأخر صيفي

ودي زي البيات الشتوي بس اصلي ممكن اتأخر لكن مش باحب البيات برة البيت

بيجيلي حالة من الاكتئاب والاحباط والكسل والخمول وعدم القدرة على التنفس والزهق وكل الصفات الرخمة دي

وتفضل الافكار السوداويه وحالات الشتت الفكري والانكماش النفسي تطل عليا من فوق دماغي مسببه ليا حالة من الضغط الرهيب على الجمجمة

وطبعا انا بسبب كده مش باعرف اعمل بالنصيحة الاخوية الي بتجيني من كل الناس وهي اني اكبر الجمجمة

وده ف النهاية بيؤدي بيا لحالات من الصمت الرهيب المصاحب لبلاهة من النوع المتأخر اللي مش ينفع معاها علاج

فتلاقيني ف النهاية متنح زي بورتيريه يمثل الانسان المعاصر ف ادنى مستوى ليه ناقص يتعلق على حيطة

او تمثال من تماثيل الجاهلية

ولاني باحاول اغير الجو العام اللي بيأثر على حاجات كتير ف حياتي

لاقيت عقلي الباطن بينادي عليا من بعيد وبيفكرني برباعيه من رباعيات صلاح جاهين تدعو للتأمل

وانا من مكاني احب اهديها لنفسي ولكل اللي بيمر بحالتي ولكل اللي حاطط ف جدول اعماله او خططه المستقبليه انه يكئب على نفسه خميس وجمعة ويصحى السبت كويس من بدايه الاسبوع

مع طبعا اهداء رقيق للصديق العزيز مقيد ولبابا وماما وجوز خالتي وسلسلة مطاعم هارديز وشارع طلعت حرب اللي عمرنا ما مشينا فيه انا وانتيمي الا واتخانقنا ومع ذلك لازم نمشي فيه

ربنا مش يقطعلنا عادة

وفي نهاية الفقرةاحب اسمع اغنيه حكيم الاغنية الافروصعيدية

لو ماكنتش انت تدلعني

هادور على حد تاني

مش هاستناك اكيد

و انا متأكد ان كل الناس مش هاتعمل بالكلام ده زي مانا هاعمل بالظبط

لكن اهو بنحاول

حاسب من الأحزان وحاسب لها

حاسب على رقابيك من حبلها

راح تنتهي ولابد راح تنتهي

مش انتهت أحزان من قبلها؟

على الهامش

احب اوجة اعتذار واجب لكل اصدقائي اللي بيعبروني وبيسألوا عليا من مدونين

انا اسف اني بقالي فترة مش بأرد على كومنتات ووالله كنت هابدأ ارجع ارد من البوست اللي فات

بس بصراحة لاقيت ان الكومنتات دماغها عالية اوي فمش عرفت اوصل للدماغ دي

اصلي طلعت ميه واحد وتمانين سم حسب اخر استطلاع للرأي اجرته محطه بي بي سي العربية

انا اسف هاتسامحوني ؟

انا مش طويل و...... انا قصير ... ولابلاش

على هامش تاني غير الاولاني

الصورة لاتمت ليا بصلة

ولا يؤخذ بيها ف برنامج ذهب ولم يعد

او عند استخراج شهادة اعفاء الخدمة العسكرية

ف ضهر البوست علشان مش لاقي هامش تاني

ابقوا

تعالوا

زوروني كل شهر مرة

حرام تنسوني بالمرة

تحديث مهم

اكتشفت اني للاسف اقصر كمان مما كنت متوقع

صديقي مقيد واجهني بحقيقتي المرعبة وهي اني لا اتجاوز ال 175 سم

ولذلك انا باعترف اني فعلا مش طويل ولا اهبل لكني قصير و...

ربنا يسامحك يا مقيد فوقتني من حلمي الجميل وهو اني اكون لاعب باسكت

بس عادي ممكن احول مسار واطلع بتاع بولينج

بيني وبينك يحكم الحاج اينشتاين

كان دايما بيبقى فيه سؤال هو الشغل الشاغل ف حياتي وتكون كل حياتي متوقفة على إجابة السؤال ده

وطبعا الأسئلة دي درجات

تختلف صعوبتها باختلاف سني وقدرة عقلي على استيعاب الأشياء

فتطورت الاسئله من

هو ليه القمر ماشي ورايا ف كل حته كأنه بيراقبني وكل ما ابصله الاقيه بيبصلي ويضحك كأنه بيغيظني ويقولي مش هاتروح مني انا دايما وراك

وأزاي السما دي عاليه كده وليه إحنا مش بنطولها مهما جيبنا سلالم وحطناها فوق بعض

مرورا بازاي السفينة بتمشي على الميه مع إني لما حاولوا يعلموني العوم كنت هاغرق مع فارق الأوزان

وازاي الشيطان كان وسط الملايكة اللي ربنا أمرهم يسجدوا لسيدنا آدم مع انه من نار وهما من نور

و ازاي الناموس بيتقتل بصاعق الناموس واحنا ولا يجرالنا حاجه

وازاي لحد دلوقت مش قادرين يوصلوا لحل ف أزمة رغيف العيش

وازاي الناس لسه لغاية دلوقت بتحط فلوس بالملايين عند واحد بيديهم فايده اكبر من فايدة البنك اللي أصلا فيه شبه اجماع إنها حرام

وازاي الناس لغاية دلوقت بتدفع فلوس علشان تسافر ايطاليا

مع ان احتمال نجاحهم ف الوصول من الأساس لا تتعدى 10 %

بس اللي عرفته ان اي سؤال لازم يكون ليه إجابة

مش شرط ان الناس تعرفها

لكن أكيد الاجابه دي موجودة عند حد ما هايظهر ف وقت ما علشان يجاوب سؤال فضل يحير ناس كتير وقت كبير جدا

بس برده لازم يكون السؤال ده حوالين حاجه ماديه او معلومة

بمعني انه موضوع السفن ده كان هايبقى أسطورة لو قانون الطفو وموضوع مركز الثقل ده مش كانوا اكتشفوه وموضوع الناموس ده كان هايبقى لغز لو مش كانوا اكتشفوا ان كل حاجه ليها تردد معين لو لعبت فيه تقدر توصل انك تقضي على الحاجة دي

بس لو كان الموضوع نسبي اعتقد انه صعب جدا اننا نتوصل لاتفاق حواليه

زي ان الناس بتحاول تسافر لغايه دلوقت علشان هما هنا أصلا مش عايشين فحتى لو احتمال انه مش يوصل 90% فاحتمال انه يوصل ويكمل 10 % وده يكفيه بالنسبة لظروفه ومش بيعتبر ده انتحار زي ما كتير ممكن يقولوا

انا بقى السؤال اللي مسيطر عليا دلوقت من النوع النسبي
وعشان كده كل ما أتكلم مع حد فيه الاقي رأي مختلف عن اللي قبله

وفيه كتير جدا آراء مقنعة مع الاختلاف الشديد بينها وبين بعض

لكن هو ده السمة اللي بتخلي الموضوع نسبي

أنا لسه لحد دلوقت مش قلت على السؤال اللي محيرني لكن هو ده نفسه السؤال

ازاي يكون فيه موضوع شاغل بال حد لدرجه ممكن تدفعه للجنون ويعتقد ان حياته كلها متوقفة على حل السؤال ده في حين انه عند حد تاني موضوع هايف جدا وممكن يتهمك بالسطحية والرفاهية الزايدة

لدرجة انك تفكر ف موضوع تافه زي ده

واقتبس هنا جمل بالنص من صاحبي الانتيم مع ان ده الحاله اللي بيمر بيها :

" فين ده من قضيه فلسطين واللي بيحصل ف العراق وأزمة رغيف العيش والأم المثالية اللي جت ف العاشرة مساءا وكانت حالتها تقطع القلب"

كل ده صح لكن أنا بالنسبة ليا

الإجابة عن أسئلتي أهم ملايين المرات من كل اللي فات

علشان بسهولة جدا انا لو فضلت على الحال اللي انا فيه مش هاقدر أحس بكل اللي بيحصل من حواليا

لاني مش عارف الاقي نفسي

فازاي واحد مش لاقي نفسه يروح يدور على حاجه تانيه

انا ممكن تكون اجابتي سطحية بالفعل

بس ده اقتناعي

انا لو مش لقيت حل لأزماتي الشخصية مش هاقدر من الأصل احس ان فيه أزمات عامة بتدور حواليا

وف النهاية أنا قلت من الأول ان الموضوع ف الأول وف الاخر

نسبــــــــــي

من أجلك أحببت نفسي

لطالما كنت في شدة السخط على هذا الكائن المسمى

" أنا "

كنت أراني شخص لا يعلم سبب وجوده ف هذه الحياة
شخص لا يستحق التواجد على هذه الأرض

وجئتي انتي

فصححتي لي مفاهيمي

علمتيني ان اقّدر وجودي
اخبرتيني اني شخص فريد

وبدوني

يختل العالم

بدوني ستصبح هناك حلقه مفقوده في نظام الخليقة
حياه مفقودة

يفتقدها أفراد عائلتي
صديق مفقود

يُبحث عنه داخل دائرة اصدقائي
دور مفقود

لم يتم أدائه داخل هذا العالم

علمتيني ان اقّدر تفرُدي
ان وجودي هبة من الله اعطاها لي وحدي
فلابد لي ان اقوم بدوري الذي رسمه الله لي
فبدوني

سيختل نظام الكون
ولكل هذه الاسباب

احببت نفسي
من أجلك انتي احببت نفسي

for all what you did, thank you

عمر حد فيكم حس انه حاسس بالشكر والامتنان لحد؟
اكيد كلنا

طب وده سؤال
طب عمر حد فيكم حس بالشكر والامتنان لحد يعرفه بس مش يعرفه؟
اه كده هانبتدي نخرّف
اكيد كلنا فاهمين انا اقصد ايه واللي مش فاهم بصراحة يبقى الغلط منه
اكيد بأتكلم عن حد منكم
انا اعرفها زي ما اعرفكم بالظبط
اعرفها بطريقتنا ف معرفة بعض
الحد ده انا مش هاقول اسمها علشان يمكن هي نفسها مش عارفه اني اقصدها

ويمكن مش حاسه اد ايه اللي عملته ده كنت محتاجه بجد

ويمكن علشان مش اعرف اسمها فعلا!

لأ انا اعرف الاسم او على الاقل اعرف الاسم اللي يهمني معرفته
الشخصية دي انا بجد ادين لها بحاجات كتير اهمها طبعا اني بأعتقد انها بطريقة او بأخرى كانت احد الاسباب ف اننا نفضل انا وصاحبي الانتيم مع بعض بعد ما قرر ف لحظة مجنونة انه كفاية لحد هنا مع بعض
انا مش اعرف ايه اللي عملته ومش هاحاول اعرف

بس انا كفاية عليا اني متأكد انها على الاقل دعتلنا من قلبها - وهي حد مستجاب الدعوة على الاقل ف وجهه نظرنا - ففكرت ف ان ابسط رد للجميل ده هو كلمة شكر وامتنان
يمكن هي نفسها مش تفهم اني بأوجه ليها هي الشكر ده علشان هي حد مش بيقدر قيمة اللي بيعملة

تمام زي صاحبي بالظبط ماهو مش كان مقدر قيمة انه يبقى موجود ف حياتي

الحد ده انا بأشكرها وبأتمنالها كل الخير اللي ف الدنيا واللي هي تستاهل اكتر منه

واحب اعتذر لو بطريقة او باخرى عملنا حاجة ضايقتها
وده هو نفس شعور محمد صاحبي لو مش كان اكتر

وليها باهدي الكلمات دي

something simple you did changed somebody's day
something simple you did changed somebody's way
it's in your heart, not in your mind
it's something good inside, you 'll find
so don't say it's nothing i did
don't forget who you are
because for many people,

you 're a shining star

طبعا بأشكر كل اللي علق على البوست اللي فات وان كنت مش لاقي حاجة غير الشكر ارد بيها على ارائكم وطالما ان كلنا لينا نفس الرأي فأكيد الواحد مش يقلق انه يتحط ف موقف الراجل ده علشان اكيد هألاقي حد ينقذني بدون تردد او تفكير ف العواقب

كنت المفروض هاكتب موضوع جديد لكن جالي مكالمة خرجتني برة حالة الكتابة خالص لكن برضه مش ممكن اسيبكوا المدة الطويلة دي من غير ما تقرولي حاجة

انا عارف اني بقيت بالنسبه ليكم ادمان

عادي يا جماعة انا مقدر وعلشان كده

فتحت بلوج جديد اسمه

coverall

هايبقى فيه شوية مواقف حصلتلي وهاتحصلي ان شاء الله

وكمان نزلت تاج جديد ف البلوج التاني

انا الذي لا اعرفه

يا اغرقوا بقى ف التدوينات وادعولي علشان مش عارف عندي شوية حاجات ف دماغي عايز احسمها

القرار .... قرارك

ساعات كتير بنتحط ف مواقف صعبة لازم فيها نتخذ قرار على اساسه بيتحدد مصيرنا او مستقبلنا
وطبيعي اننا ياما بننجح ف ان ربنا يهدينا للقرار الصح وبالتالي نحمد ربنا على انه ارشدنا للقرار ده او بنفشل ف اتخاذ القرار ده اما عن خطأ او عدم درايه او عدم تقدير للامور واعطائها قدرها الحقيقي او استخفاف او خوف او اي سبب تاني المهم ان المحصله ف الاخر بتكون غالبا ندم وبعدها نفضل نلوم نفسنا لباقي عمرنا او نكتشف ف وقت لاحق ان القرار ده كان فيه خير بعد كده
لكن ف المجمل اكيد كل حد فينا مر عليه الموقف ده وبغض النظر عن النجاح او الفشل ف اتخاذ القرار المناسب فأكيد ده بيسيب معانا ذكرى ودرس بنحاول نتعلم منه ونحمد ربنا ان القرار ده يخصنا احنا ومش يخص حد تاني احنا ممكن بسببه نأذيه او نجرحه بدون ذنب منه الا انه كان مرتبط بشكل او بآخر بالموضوع

طيب ايه الموقف بأه لما تلاقي نفسك مطالب بأتخاذ قرار مش يتعلق بيك لكن بيتعلق بأنسان تاني مش تعرفه ولا عمرك شفته لكن قرارك ده بيتوقف عليه حياه الشخص التاني ده الحاليه والمستقبليه ومش حياته بس لكن ممكن حياه اسرته بالكامل
صدقوني ده اخر موقف تتمنى انك تمر بيه
فجأه تلاقي نفسك مضطر انك تتخذ قرار انت نفسك مش تقدر تتحمل نتيجته رغم انك مش مرتبط بالموقف ده من قريب او من بعيد لكن بتكون صدفه انك ف الوقت والمكان مش فيه غيرك اللي تقدر اما تغير حاجه كبيره جدا او انك تفضل تأنب نفسك باقي حياتك انك كان ف مقدورك انك تتصرف ومش اتصرفت
الموضوع انا عارف انه مبهم لكنه موقف عدى عليا ولاقيت نفسي مسئول وقدامي قرارين لازم اخد قرار منهم واتحمل نتيجته مع العلم اني مش اقدر اتحمل اي من النتايج دي
وعلشان تقدروا تتصوروا الموقف اكتر ويكون حكمكم موضوعي انا هاحكيلكم الحكايه يمكن تلاقوا تفاصيل مش مهمه بس انا للاسف فاكر الموقف زي ماحصل قدامي كاني بأتفرج على الاعادة

كان يوم حد ومش كنت كملت اسبوع ف الشغل بتاعي الساعه كانت تقريبا تمانيه بالليل و كنت راجع من مطروح انا والسواق ووصلنا لاول بوابة بندخل من خلالها للموقع ودي بعيدة عن اقرب منطقة مأهوله بأي كائنات حيه بمسافه لاتقل عن 50 كم طبعا بنهدّي علشان المطب الصناعي وكمان علشان الحرس يشوفوا الرخص وتصريح الدخول
احنا: سلاموا عليكوا والسواق بيمد ايده بالتصريح والرخصة
الحارس: وعليكم السلام يا هندسة لا خلي الورق معاكم دلوقت احنا بس عايزين منكم خدمة لوجه الله
انا بدون تفكير: أأمر خير؟
الحارس: فيه بس واحد تعبان جدا وعايزينكم تودوه للاسعاف اللي ف مدخل الطريق – ده على بعد 100 كم تقريبا – علشان حالته صعبه جدا
انا: طب هو فين بس
الحارس: اتفضل شوفه الراجل ياولداه مش بيحط منطق
طبعا نزلت انا والسواق جري لقينا واحد بيموت بمعنى الكلمة وجسمه حته تلج ومش باين ان جسمه فيه نقطة دم واحده
انا : طب ياجماعه الراجل ده تبع مين وبقاله اد ايه كده
الحارس: والله يا هندسة مانعرف احنا لاقينا واحد قام داخل علينا وقام واقع من غير ماينطق كلمة وبقاله على الحال ده ييجي ساعه ونص
انا : طب مش اتصلتوا بالموقع جوه ليه
الحارس: والله اتصلنا وقلنالهم الراجل بيموت لكن قالوا شوفه تبع مين ولو تبع ..... – اللي هي اسم الشركه صاحبه الموقع- هاتوه للدكتور – وده مكانه برده على مسافه ييجي 50 كم - واحنا لا عارفين نروح ولا نيجي
حارس تاني: حسبي الله ونعم الوكيل فيهم الدكتور مكسل ييجي والتاني بيطمن الاول اذا كان تبعهم ولا لأ قبل ما يهز طوله
يعني لو مش تبعهم هايسيبوه يموت؟
انا: يا عم تبعهم ايه وبتاع ايه ده تبع ربنا طب مش فيه حد عمل ليه حاجه سخنه ولا حاجه الراجل شكله بقاله يومين ماشي ف الصحرا
الحارس: والله ماعندنا غير برتقانه فصصناها واديناهاله لكن زي ما انت شايف مش داري بالدنيا
السواق قام مناديني على جنب وقايلي: الراجل ده بيموت واحنا لو خدناه ف العربية هايموت مننا ف الطريق ومش هانلاقي حد يقبل ميت و هانروح ف داهيه بيه
انا طبعا تنحت وقلتله يعني نسيبه يموت
السواق: انا بأرسيك على اللي بيحصل هنا وانت لو قد المسئوليه دي فانا مش ادها

بصراحه كلامه خلاني اخاف
ساعتها رن جرس التليفون وكان محمد صاحبي وخرجت اكلمه وقلتلهم طب حاولوا تعرفوا ده مين وجه هنا ازاي
رجعت بعد دقيقه والراجل زي ماهو وزاد ان وشه بقى ازرق بدرجه رهيبه
طبعا انا دماغي هاتنفجر

السواق عنده حق وكمان الراجل مش هايتحمل اننا نخرج بيه وانا مش اقدر اتحمل ذنبه وخصوصا انه لسه بيتنفس
المهم قلت للسواق :خلاص هانوديه وربنا يتولاه ويتولانا معاه
السواق: طب احنا لو رحنا لغايه الاسعاف مش هانعرف نرجع علشان البنزين مش مكفي
الحارس: ياعم ربنا هايرزقكم بس مش تقفلها ف وشنا
انا: الكلام ده بجد ؟
السواق: والله زي ما باقولك وممكن يخلص قبل مانوصل ونموت احنا وهو من البرد
وفجأه جاء صوت مش عارف جه من فين لكنه قال
خلاص خدوه للدكتور جوه وهما كلهم 50 كم ولو البنزين خلص ابقوا اشتروا من جوه
الفكره نورت ف دماغي وقلت تمام هو ده الحل يالا بينا على الدكتور حتى لو حالته صعبه يبقى يطلع بالاسعاف المجهزه اللي جوه وربنا يسترها بقى ف العشر دقايق دول
السواق: بس واحد من الحرس دول ييجي معانا علشان يبقى شاهد ان احنا واخدينه ميت
انا: ياعم حبه تفاؤل وربنا يسترها عليه وعلينا ايدك بس معانا علشان الراجل مش قادر يتحرك
بعد ما دخلناه العربيه السواق قام حاطط رجله على البنزين كأنه بينتقم ولاقيته ماشي على 180 بصراحه مش عارف علشان نلحق نغيث الراجل ولا خايف يموت مننا بس انا ف كل الاحوال مش قدرت اتكلم ف حاجه مع ان الطريق مش ينفع تمشي عليه بأكتر من 120 بس ف الظروف دي مش ينفع اتكلم ف امن وسلامه واربط الحزام قبل ما تدور العربيه

والحمد لله وصلنا العياده ف وقت قياسي
الراجل الحمد لله تم اسعافه ف الاخر والدكتور قال ان اللي عنده صدمه نفسيه علشان فضل ماشي ف الصحرا مسافه طويله ف الجو ده والوقت ده بس ان شاء الله هايبقى كويس
اللي بقى مش بقى كويس هو انا
فضلت افكر انه هل اللي انا عملته ده هو الصح وهل لو كان لاقدر الله جراله حاجه وحصل زي ما السواق يقول كان ايه هايبقى الموقف وهل اللي انا عملته ده لو كانت الامور مش مشيت كده وحصل حاجه وحشه انا كده اكون اضريت بالسواق وبصاحب الشركه اللي استأمني وحطني ف موقف مسئوليه وهل لو مش كان فيه صوت مجهول قال نروح بيه للعياده كنت هاتصرف بعد اد ايه وتصرفي اصلا هايكون ايه وهل ممكن كنت اتأخر لغايه ما لاقدر الله يحصل حاجه وان كنت استبعد اني كنت هاسيبه فهل انقاذ بني ادم مسأله الوقت مهمه ف حالته تستاهل ان الواحد يفكر ف اي حاجه تانيه
اسئله كتيير جدا دارت ف بالي لكن الكلمه الوحيده اللي مش كنت هاسامح نفسي عليها لو كان حصل حاجه وحشه هي
انت المسئول والقرار قرارك