هرتلة ف حب البلكونة
بعد رجوعي من بره لقيتني داخل على البلكونة على طول حتى من غير ما اسلم على الموجودين
بقالي زمان مش دخلت البلكونة بتاعتنا. يمكن من اخر مرة محمد كان عندي ودخلنا وقفنا فيها شوية وقبل كده مش فاكر اخر مرة كانت امتى بس اكيد من زماااااااااااان جدا
ساعتها قالللي حلو اوي احساس البلكونة بتاعتكوا
عنده حق
انا باحب جدا اقعد ف البلكونة بتاعتنا فعلا
احط الكراسي قدام بعض وافرد رجل وامدد وابص لفوق واسرح
وانا بابص لفوق اعد ف النجوم والهوا بيخبط ف وشي ومع ذلك عمري ماعرفت اميز مجموعات النجوم
حاولت كتير اميز مجموعات النجوم اللي كنت باسمع عنها واقرا عنها ف الكتب
بلكونتنا احلى مافيها انها مش قريبة اوي من الارض فأشم ريحة التراب ولا عالية اوي فأدوخ وانا فيها
اصل انا اكتشفت ان عندي فوبيا الادوار العليا
من ايام شغلي القديم لما طلعت 40 متر من 60 ومش قدرت اكمل بعدها
ساعتها واجهوني بحقيقة مرضي
دانا شفت ايام ف الشغل ده ربنا مايرجعها ايام على رأي سواق التاكسي ف اعلان ميلودي
لكن للاسف فيها مشكلة
البلكونة طبعا
هي مش مشكلة البلكونة لكنها مشكلة شارع
شارعنا لا ينام طول اليوم
تسمع اصوات الناس والعربيات والكلكسات والزحمة مالية الدنيا
مش باحس اني ف بيتنا لكن ف سوق عكاظ
بس برضه باحب البلكونة
ده كفاية لما ارفع راسي وابص بعيد الاقي شعلة مصنع التكرير البعيد كأنها شمعة عيد الميلاد اللي منورة التورتة
حاسس براحة فظيعة دلوقت
غريبة اوي فعلا
دايما باحس براحة هنا
معقول مفعول البلكونة يكون كده
بس دي مش اي بلكونة دي بلكونة بيتنا
انا ليه مش بآجي هنا كتير
انا ليه مش بآجي هنا من زمان
مع اني اتخنقت قبل كده كتير جدا
طب انا ليه جيت هنا بعد زمان
طب انا ليه مرتاح دلوقت
يمكن علشان ممدد رجلي وسايب نفسي ومفضي دماغي وباصص للسما والهوا بيخبط ف وشي
هو ده صحيح الطقس المثالي بتاع البلكونة علشان تستمتع بيها
بس ايه ده
فين النجوم؟
فين القمر؟
انا مش هاعرف اميز النجوم دي بقى؟
فين السما؟
عينيا حصلها ايه؟
هو احنا النهاردة كام ف الشهر؟
44 comments:
تاني مرة اول كومنت
في اية انهاردة يلا زي بعضة
المهم احساس حلو جدا
فعلا انك تتامل ودي حالة من التامل
والسرحان
وانك سايب نفسك وبتفتح مخك اكتر
انا بقي ادامي البحر نانااااااا
هو انت من مصر صح
يلا سلام
كلامك يدل على رومانسيتك .. وعلى فكره أنا عندى سؤال .. هى البلكونه اللى فى الصوره دى بلكونة ميين ؟؟؟
... أنا كمان بتعجبنى جداً بلكونة بيتنا .. بس للأسف أنا ممكن أقعد بالست ساعات قاعده بس مش بعمل حاجه غير أنى أتفرج على الشجر والرمل والطيور اللى تيجى تاكل من الأرض .. وعينى بتوجعنى جداً لما ببص فوق على السما .. بس بيجلى ساعات .. و يكون بليل أوى .. وأعمل زيك كده .. وشويه أبص على السما وأعد النجوم وشويه أبص على الأرض ..( فى الغالب هتحول قريب )
احساسك جميل فى الكتابه ...
معلش طولت عليك .. وعلى فكره بناءاً على طلبك .. أنا نزلت بوست جديد عندى فى البلوج عن أخر حاجه انا كتبتها .. يارب تقراها ومتقولش عليها أيه الكلام اللى ملوش لازمه ده
:D
انا معاك ان القاعدة في البلكونة ليها طعم تاني وبتكون مريحة جدا بس مش في كل الاوقات البلكونة حلوة فعلا بالليل عشان تعرف تعد النجوم براحتك
يعني متدخلش البلكونة في عز الحر والشمس تاكل دماغك وتقولي مريحة ههههههههههههه
على فكرة الجلوس قدام البحر والشاطئ مش عليه ناس كتير والدنيا هادية مريح فوق ما تتصور استمتاع حقيقي
تحياتي
:)
بحاول اكتب تعليق لكن مش لاقية الحقيقة تعليق مناسب..
البلكونة مكان محبب للنفس بالفعل الجلوس فيه .. أحب بلكونة منزلنا في بلدتي الاصلية وأحب الجلوس فيها خاصة انها تحمل الكثير من الذكريات مع الوالد رحمه الله
وبلكونة المنزل الحالي أحب كثيرا الجلوس فيها وقت الفجر أنظر الى النجوم لا أحاول عدا لها فقط استمتع بلمعانها الفضي الجميل..
حاولت انا ايضا النظر للنجوم كمجموعات كما درسنا فكنت انجح تارة وافشل تارات كثيرة..
الحقيقة بوست حرك الكثير من المشاعر في النفس
دمتم بكل خير اخونا الكريم ولــو
مش زي بلكونة بيتنا برده
:)
حلو أوي البوست... بجد حسسني بالراحة أوي و أنا بقرؤه
مش عندي كلام كتير أوي بس فعلا بوست مريح أوي يا ولــو
:) تحياتي.... للبلكونة
قلتلك ما تجبيش سيرتي قبل كده حصل ولا لأ
ثم شارعكم مش دايما صاحي في يوم بينام فيه
:)
انت مش ناوي تعزمني على البلكونه ولا أيه؟
وحشتني
طيب بدال البلكونة دي حلوة كدا ماتعملها مزار سياحي ولا بلاش سياحي علشان الناس منفضين اليومين دول
اعملها مزار سياحي بس مجاني
واي واحد مدايء ييجي ويئعد فيها شويه
قولت ايه؟:)
سلام بئي فكرتني بالبلكونة بتاعتنا اروح اقعد فيها شويه:D
my hope$
حلوة مش كدة؟
اللهم لا حسد
البحر ذات نفسياته
عادي مانا قدامي عمارة صفراااااااااااا
وشارع طويل
مش فرقت كتير يعني
اشمعنى مش اكون من مصر يعني
علشان مصنع التكرير
طب ماهو انا اصلا مهندس بترول وشغال ف مطروح
يبقى مطروح مش تبع مصر
اما انتوا عليكوا تحكمات
غريبة
منوراني
banota
كلامي لايدل على حاجة
اوعوا تتغروا ياجماعة
انا مش مسئول عن اي فكر خاطئ قد يصيب الناس اللي بتيجي
اما عن صورة البلكونة فانا اللي متأكد منه حاجة واحدة
انها مش بتاعتنا خالص
الشجر والرمل والطيور
انتوا ساكنين فين اصلا؟
دي بلد عمولة دي ولا ايه
اكيد عجبني ومش تخافي مش قلت كده والله
متشكر جدا
ايامنا الحلوة
انا مجنون اقعد ف البلكونة قبل الساعة 10 بالليل
اصلا البلكونة بتاعتنا عاملينها بحيث انها تبدأ تظهر من اول 8 وانتي طالعة لغايه 9 الصبح تقوم ملمومة تاني
وكل ده توماتيكي توماتيكي
التكنولوجيا بتفرق برضه يا جماعة
وكمان معاها اوبشن انك تاخديها المصيف مع الايس تانك والشمسيات
فيه اكتر من كده
موضوع البحر ده بقى مش تقوليلي انا قعدت قدام البحر ومش فيه بني ادم موجود ف مجال دايرة نص قطرها 2 كيلو
تصوري البحر ملاكي ومش فيه غيرك وغيره والسما من فوقك
فيه اكتر من كده راحة
اي خدمة احنا نحب نغيظ اللي بيزورونا
منوراني دايما
همسة قلم
مجرد مرورك بجد بيفرحني جدا
ماشاء الله يعني فعلا الحاجات دي ممكن تبان فعلا
امال انا كنت فاكرهم بيضحكوا علينا
يعني ايه اشوف الدب الاكبر ف السما
طب ده كلام ؟
دانا مش باشوفه ف جنينة الحيوانات
بس طالما شفتيهم يبقى انتي اصدق
خالص امتناني
wish i were a butterfly...
انتي جايه تغيظينا ف مكاننا ولا ايه
ليه يعني بلكونتكوا فيها حمام سباحة ولا ملاهي ادهم
ولا يمكن علشان بتبص على جنينة يبقى خلاص
هههههههههه
كويس ان البوست عجبك
ده اقل حاجة عندي
بجد بجد فرحت جدا انه عجبك
بس ياريت يكون عجبك فعلا مش تكون مجرد مجاملة
انسان مقيد
الله هو الناس عمالة تخبط فيا ليه ف البوست ده
والله اشيله
وبعدين انت تعرف شارعنا اكتر مني
اه صحيح مانت جارنا وعارف بس برضه بيبقى صاحي
انا باشوفه بالليل بيكون صاحي ومعاه مج النسكافيه كمان
اعزمك على البلكونة؟
بصراحة انا لاحظت انك معجب بيها واحنا عيلة محافظة لو فعلا عاجباك اتقدم رسمي وانا اكسرها وانا اوديها لحد البيت
احنا بنشتري راجل
قلب ينبض لله
لا ماهو مفعولها مش مع اي حد
انا ممكن اعرف سر الخلطة وابقى انشر المقادير بعد كده
كيف تجعل بلكونتك مثل بلكونة ولو
وكل واحد يحضر مع نفسه لكن بلكونتي
لاااااااااا
انا كده مش هاعرف اشوفها بعد كده
دي بلدنا كلها هاتبقى عندنا
ايوااااه كل واحد يقعد ف بلكونته
وابقوا قابلوني لو لقيتوا حد بعد كده ف الشوارع
ماهو بص بقى
دى اول زيارة ليا لمدونتك وان شاء الله مش الاخيرة لكن مش اول تعليق لانى علقت على موضوع الاصحاب ده
بس احساسك حلو وانا بقى سبقتك فى وصف الراحة اللى بتيجى من ورا القعاد فى البلكونة ولو زرت مدونتى هتعرف اللى بقوله ويلا بقى نخليها اتحاد مهندسين البلكونات العرب واحنا وراك ياريس..
وبعدين انت جيت فى الاخر ولخبطلى دماغى
اتاااااااااااااااااريك بتقول هرتلة فى البلكونة!!!
انا تانى وتالت موضوعين كتبتهم فى مدونتى كانوا بالعنوان ده:
شرفة منزلنا الصغيرة 1
شرفة منزلنا الصغيرة 2
بس انا تقريبا حولتهم لدرافت من كام يوم
فى البلكونة بحس ان انا عايشة حياة تانية معزولة فيها عن الناس كلها
ايه ده هو انا مقولتلكش
انا بقى من وانا صغيره وانا يدوروا عليه ميلقونيش غير فى البلكونه كنت بقرا واذاكر واتامل واغنى وعايشه حياه كامله فيها دا انا ياما تنحت فى السما واستنيت يطلعلى المحروس ابن جيران الى بيقولوا عليه ده من اى شباك قدامى بس ابدا وحياتك:))
لحد ما جاه اليوم المشئوم طن طن طاااان
ورجعت من المدرسه يوم لقتها ضحيه مؤامره دنيئه كسروها ياحاتم وضموها على الشقه وراحت ياولدى وبقى منها الذكرى
بس اشطه يعنى خلاص مش محتجاها ربنا هدانى واتحجبت واتلميت فى البيت ههههه
يالا ربنا معاك عشان انت ضربت خالص:))
تحياتى
شيماء:))
السلام عليكم
اول ما قريت كلامك افتكرت بلكونة بيتنا لما كنت بقعد فيها لحد اذان الفجر والهواء يلطش فى الواحدويقعد يفكر فى الدنيا
............
الله يسامحك فكرتنا بالذى مضى :ي
.................
بجد اسلوبك جامد ورشيق فى الكتابة
..............
البوست على بعضه جميل وعجبنى خاتمته
.........
سلاااااااااااااام
يا بلاكوناتك يا حاتم
ازيك يا بشمهندس عامل ايه
ويا سيدى متشكرين جدا جدا على تشريفكم مدونتى
واسفة بجد على الغياب الطويل
انا فاكرة اخر مرة قعدت فى البلاكونة كان فى الامتحانات وكنت باين بذاكر قانون تجارى او قانون التنفيذ ..من ساعتها ما تنتهاش تانى :ي
استمر كده فى اقتناص لحظات التأمل والصفاء مع النفس..فى اى حتة مهما كانت
تحياتى
ياعم مصر يعني كايرو
بس ان بقول مصر للشمولية
اصل ممكن تكون القاهرة او الجيزة او محافظة مثلا 6اكتوبر
او محافظة حلوان
انت عارف مصر فيها كام محافظة
ههههه
عايزة اقولك ان انت كدا هتحب البلكونة اكتر علشان
كل حد دخل
وعلق اول ما هتقف ف البلكونة هتفتكر البوست دة
وتفتكر كل تعليق
اة والبحر ذات نفساويتة
سلام
comment deleted
اهلااااااان
فينك ياعم من زمان
بقالي كام بوست كده مش باشوف الاسم ده
بس اللي نفسي اعرفه مدونتك اسمها ايه
ياريت تسيب لينك المدونة علشان نبقى نزورك
ولا انت زي مقيد صديقي لابس طاقية الاخفا
habiba
شرفتيني لاول مرة
ماهو بصى بقى انا بصراحة اي حد يقولي الكلمتين دول مش بيجي تاني بس برضه انا متفائل ان شاء الله
سبقتيني ازاي
انتي تعرفي بلكونتنا ولا ايه؟
البلكونة دي على فكرة انا كده هابدأ اشك فيها
كل الناس عمالة تقولي اه القعدة ف البلكونة وبتاع
دي طلعت معروفة اكتر مني
اتحاد مين
انا اهلاوي صميم وباكره اسرائيل وباحب ابوتريكة
انا ماليش ف السياسه وبعدين كمان ريس
لاااااااااا
دي كده امن دولة وش
انا ماعرفكوش اساسا ولا نازل الشرقية دي لحد ما اموت
نورتيني
جيداء
اولا نورتيني لاول مرة
لا بقى انا شامم ريحة اتهامات وبتاع
والله ماقريت اي حاجة عن البلكونة ولا كنت بادخلها من زمان
مش باقولكم البلكونة دي بتخونني مع شتى المدونين
خاينااااااااااااااااااااه
شرفتيني واتمنى تكرار الزيارة
do not press F1
شرفتيني لاول مرة
بالذي مضي
ليه ايه اللي حصل البلكونة هربت مع شباك من العمارة التانية
ماهو الواحد دلوقت ممكن يصدق اي حاجة على البلكونات
اه ناس كتير قالولي ازاي بتخلي اسلوبك رشيق كده
الاجابة ببساطة الرياضه والمية الكتير والنوم بدري
هو ده سر رشاقة اسلوبي
متشكر جدا ليكي
nermeen
لاااااااا مش مصدق عيني
معقول
وزارة العدل كلها عندنا
نورتيني بعد غياب
كفاية ايه المواد دي
دانا لو منك اسيب المنطقة واهاجر
ياساتر ده كلام يدوه لطلبة ف الجامعة
امال اللي عايزين يأدبوهم ف السجون يدوهم ايه
ايروبكس
تحياتي
my hope$
مصر يعني كايرو
يعني الادب والاحترام
يعني ولا بحر ولا جو ولا اكل ولا شرب ولا راحة ولسه عايشين
الحمدلله على كل حاجة
مصر كام محافظة ؟
مصر دولة مش محافظة يا متعلمة يابتاعة المدارس
انا عارف بيدوكوا شهادات ازاي؟
افتكر ايه ولا ايه
ده كل اللي هنا طلعوا بيرتاحوا ف البلكونات
امال اللي في الشوارع دول مين؟
مصر احتلوها يا رجالة
همسات دافئة
يمكن قلتي وانا مش سمعت
عظيم والله بس انتي متأكدة ان كان فيه شبابيك اساسا ولا انتوا كنتوا بتبصوا على جنينة ولا مصنع ولا اي حاجة سد وخلاص كده يبقى هايطلعلك ابن جيران منين ؟ من السخان؟
ايه ده ؟ هو المتحجبات مش بيطلعوا البلكونات؟
امال امي ليه قاعدة هناك على طول؟
تفتكري مستنيه ابن الجيران برضه؟
طب وابويا بيعمل ايه معاها
على فكرة انا هاهد البلكونة دي احسن
شفتي بقى اهلك كان عندهم حق
دي بتخلي الواحد يفكر ف حاجات غريبة
انا فعلا لسعت جامد
طيب مقبولة منك ياسيدي
وانت يا بتهزر
يا فعلا مش فاهم قصدي
وفي كلتا الحالات مش مشكلة
ومن ناحية الاحتلال فا اكيد محتلين
سلام
بقى كدااااااااااااا؟؟؟؟؟
اممممممممممممممممممممم
بتشك فيا وفى مصداقيتى طيب روح مدونتى وانت تعرف انى ضفتك عندى علشان اجى عندك على طول والشراقوة لبعضهم بس بعد حكاية انك تبيعنا دى وتقول انك بتخاف من امن الدولة دى خلااااااااااااص انا بقى اللى هبيعك.
وبعدين والله والمصحف ماعرف بلكونتكوا دى ولا عمرى شفتها الا اذا كانت جمب الجامعة بقى
عموما بنمسى ياهندسة
بدون مبالغه انا بعمل كده بالظبط
وخصوصا وقت العشا كده
واشغل الاغانى اللى بحبها واحط السماعه فى ودنى وابص للسما
بجد بجد احلى حاجه فى الدنيا
اما بالنسبه للنجوم انا كان ليه نجمه هى الوحيده اللى كانت بتفضل موجوده لغايه ما الشمس تطلع واروح الكليه كأنها مستنيه تودعنى
بجد شعور جميل انك تصاحب نجمه
بس للاسف مابقتش موجوده النجمه دى
اسفه انى طولت واتكلمت عن نفسى بس بجد البوست بتاعك ده فكرنى بحاجات حلوه
دى اول زياره واول تعليق ليا يا بشمهندز
الواضح ان كل الناس فى علاقه عاطفيه بينها وبين بلكونة بيتهم
انا الصيف الى فات كنت بنام ف البلكونه طول الليل وعلى ما انام اقعد ابص للسما
شيء مريح جدا
على فكره الشجر والرمل والطيور ( وفى خرفان كمان احنا مربينها )
فى الجنينه بتاعت بيتنا .. والبلكونه أكيد هتبص على الجنينه .. وعلى فكره أنا ساكنه فى الدقى
:D:D:D
من غير يا بشمهندس ولا حضرتك
ده أول مروري
لقيت المدونات ال3 قافله
حتي اشعار اخر
ولما عملت الافتتاح مرة تانيه قلت أبارك لقيت مش في تعليقات
عموما عود أحمد وان شاء الله المرة اللي جايه أجي ألاقي ال3 مدونات مفتوحين والاقي مكان وسط الزحمة بقي
تحياتي ودمت بخير
lyssandra
:(
ثانكس
مش تعمل كدا تاني
سلام
my hope$
هو انا بصراحة بصراحة
كنت بأهزر
وانا اسف لو كنت ضايقتك والله مش اقصد
من ناحية الاحتلال
انا مش شايف حاجة من عندي الاحتلال مداري المنظر
ابص من الناحية التانية ؟
ولا قصدك انك كاسكندرانية بتعتبري ان اسكندرية محتلة من المصيفين اللي بيروحوا عندكوا وخصوصا اهل القاهرة
خلاص مش رايحين تاني وكمان هاسحب البحر من عندكوا واوديه الاقصر واسوان اهو يبلبطوا شوية بدل جهنم اللي عايشين فيها
مش دول بلد واحدة على رأي شيكو بتاع ورقة شفرة ؟
وابقوا ورونا اسكندرية دي بقى هاتعيش من غيرنا ازاي
سلام
habiba
الصراحة رحت
تصدقي شكل مدونتك بقى احلى كتير لما ضيفتي اسمي فيها
حقيقي مش تواضع هههههه
ماهو المشكلة ان جاية جديد مش تعرفي ان بيني وبين الحكومة حبال ود
طب اسألي الناس ف المدونة
العمر مش بعزأة يا حبيبة يا بنتي وبكرة لما تكبروا انتي واخواتك المدونين هاتعرفوا قيمة التضحية اللي انا عملتها
يووووووووة
مش عارف باتقمص الادوار ف الردود جامد
البلكونة بقى انا حبستها وعرفت منها تعرف مين بالظبط
وعرفتهم واحد واحد واحدة واحدة
بس انا هاسيبكوا تراجعوا نفسكوا وتعترفوا احسن
سلام
لست ادري
منوراني لاول مرة
بدون مبالغة انتي دماغك عالية جدا
اللهم لاحسد
اما بالنسبة للنجوم
دي بقى مش هاقدر امنع نفسي
مصاحبة نجمة ؟
مش بقت موجودة؟
يانهار ابيض انا تأثيري جامد كده
انا الناس بتقولي عينك وحشة بس مش كنت فاكر للدرجة دي
طب يمكن اتجوزت و قصة هروبها عايزين تلزقوها لي
متشكر جدا
nile_queen
منوراني لاول مرة اعتقد
ودي حاجة تشرفنا يا فندم
بالظبط الناس قاعدة تحب ف البلكونات ورغيف العيش بقى بنص جنية
طب انا اول ما اتولي زمام الخلافة هأمر بهدم البلكونات
اساسا هاخللي كل البيوت دور واحد ومن غير فتحات على الشارع
يانا يانتوا ف البلد دي
دوريلك بقى على حتة تانية تنامي فيها
سعيد بزيارتك
banota
اها
كده وضحت
ساكنين ف الدقي
يبقى تعملوا اللي عايزينة ان شالله تحفروا انفاق وتشقوا الترع
دي بلد فوزي العندليب
يعني حصااااااااااااااااااانة
lyssandra
اعتقد ان ده المرور التاني ولا عايزة تهربي من الرسوم
عادي احنا مدونة من غير رسوم
قولي مرات دخولك عادي
هههههه
نورتيني على العموم
يافندم والله كنت عايز اعمل نيولوك لكن اخواتي بقى مش عازوا هما حرين
عاجبهم المنظر ده يستحملوا زي ما قلتلهم
وان شاء الله تشرفي ف اي وقت ودايما مكانك محفوظ
مش هاتدفعي ؟
خلاص محفوظ
تحياتي
my hope$
اسف
اخر مرة
منكن اطلع الساندوتشات علشان جعان ؟
متشكر جدا جدا
Post a Comment