mY woNdeR WorLd

اوقات لما اكون زعلان من حد او متضايق من حاجه او بامر بفتره انعدام وزن - وده

بيحصل كتير - والاقي حد يقولي ماتزعلش انا حاسس بيك

انا حاسس باللي انت حاسس بيه
ساعتها كنت استغرب جدا وكان عقلي يرفض الفكره تماما ويقول ازاي!!!!

ازاي تحب اكله وانت عمرك مش دوقتها
ازاي تعرف طريق عمرك مش مشيت فيه
ازاي تتميز ف شغل انت عمرك مش اشتغلته قبل كده
ازاي تفتقد احساس وانت عمرك مش عشته ف حياتك
ازاي يوحشك شعور وانت عمرك مش حسيت بيه
ازاي تعيش تجربه انت اصلا مش دخلت فيها

ازاي
ازاي
ازاي

تساؤلات كنت مؤمن بيها ومش مقتنع بغيرها
لغايه وقت قريب
لغايه ما عملت البلوج بتاعي
ساعتها ايماني اختلف
واقتناعي اتهز
انا اتعلقت جدا بيكم من غير ما اشوفكم او حتى اعرف اساميكم

اتعلقت بيكم زي ما كنت وانا صغير متعلق ب توم وجيري ودول كنت باعتبرهم عيلتي ف وقت من الاوقات

اتعلقت بيكم لدرجه انه مش بقيت متصور ان انتم اشخاص ممكن اقابلكم ف الشارع والشغل والجامع والمواصلات
لا
انتم شخصيات خياليه وبلوجر ده عالم فانتازيا
عالم مش ينفع فيه ان حد يختفي او يبعد
لكن للاسف مش دي هي الحقيقه
الحقيقه انكم زيي تمام
بني ادمين زي ملايين الناس التانيه بمشاغلها وظروفها وهمومها واحزانها ومساوئها
ناس بتمشي وناس بتزهق وناس بتسافر وناس بتكتئب وناس بترحل

بس الفرق انكم بتعبروا عن نفسكم ف زمن بقى فيه حريه التعبير خيال

الفرق انكم عايزين الدنيا احلى ف زمن كل حاجه فيه تدعو لليأس

الفرق انكم مش مقتنعين بأن الدنيا كلها اسود بس
لأ الدنيا فيها ابيض وفيها الوان

الفرق انكم كلكم على الرغم من اختلاف الافكار والدراسه والاعمار والتوجهات بيجمعكم لغه حوار راقي بغض النظر عن اسلوبه

الفرق انكم بتحسوا بناس انتوا مش عارفينهم شخصيا وممكن تكونوا ماتعرفوش حتى اسمهم وتبذلوا كل مجهود ممكن عشان تخلوهم يحسوا بشعور افضل

الفرق انكم بتتمنوا الخير لكل الناس وبتقدموا اي مساعده بدون انتظار لمقابل

الفرق انكم – بقصد او بدون قصد – بتسيبوا بصمه او ذكرى او تجربه او درس او ابتسامه ف كل مره تكتبوا فيها

الفرق انكم بتكتبوا بس لما تحسوا بأهميه الكتابه سواء ليكم او لغيركم مش عشان مضطرين للكتابه

واكتر واكتر

انا فعلا متشكر ليكم جدا
انا متشكر لعالم بلوجر الحقيقي
وان كنت هافضل اعتبره عالمي الخيالي
عالمي اللي مش بأخجل اني اظهر فيه على حقيقـتي بدون رتوش او تجميل
عالمي اللي بألجأ اليه لاسترداد نفسي لما يرهقني البحث عنها

ساعتها باقول ان حياتي بتبتدي من هنا