منك لله يا غينابي . كان زماننا متدلعين

ف يوم كنت باتكلم مع حد عزيز عليا وقالي قولي حدوته وساعتها كان ردي اني مش بأعرف اقول حواديت

النهاردة بعد فترة من اليوم دة هأحكي ليكم وليه الحدوته اللي طالبني بيها

اتمنى انها تعجبكم

يحكى أنه في قديم الزمان كان هناك ملك ومادام هو ملك يبقى اكيد بيحكم مملكه والمملكة بتاعته دي كانت من اكبر الممالك الموجودة ف وقتها
الملك ده مره طلع ف رحله صيد ف غابه من غابات المملكة بتاعته .
ملك بقى والارض كلها تبعه
المهم بعد ما ظبط نفسه وموّت يجي نص حيوانات المملكة و اصطادله اللي يأكله هو وبلده خمس سنين قدام رجع القصر بتاعه منفوش زي ديك البرابر كأنه حرر فلسطين
بس ماشي بيعرج زي الاستاذ عبدالحليم لما غنى "مشيت على الاشواك" ومش قادر يدوس على رجله ياولداه
اول ما دخل نادى على الوزير بتاعه – اللي هو دلوقت رئيس الوزرا عندنا - و ف ثانيه طبعا الوزير كان قدامه بيقوله شبيك لبيك كل رحله وانت طيب يا مولاي عقبال ما تتطلع جبل الموت – وطبعا باين من الاسم ان الجبل ماحدش طلعه ونزل تاني – ماعلينا الملك قاله يا وزير حنشار – ده اسمه ماهو زمان الاسامي كانت كده ماكانوش ألفوا" دليل كيف تختار اسم لطفلك" لسه - انا الرحله دي بهدلتني اخر بهدله رجلي باظت ياوزير اتصرف ف الحال شوفلي مرهم "هيموكلار" ادهن رجلي ولا حاجه
طبعا ده بسبب ان الملك عمره ماطلع رحله زي دي قبل كده واكيد يعني ماكانش لسه فيه اسفلت وبلاط ورمله يتفرد بيها الشوارع لما المسئولين الكبار يعدوا
الوزير قاله احنا استدعينا كبار الاطباء ف المملكة وكلهم تحت امر مولاي ورجلك هاترجع زي ماكانت حتى لو اضطرينا نجيب رجل جديده من شارع عبدالعزيز نركبها مكان القديمه وندفع الفرق
الملك مش عجبه الحل المؤقت ده
كل مره هاروح اصطاد اركب رجل جديده مش موال هو و بعدين لو الناس ف المملكة شموا خبر هاتبقى فرصة للمعارضه انهم يطلعوا بقى ويقولوا شوفوا الملك الفافي بتاعكم ويقوّموا البلد عليه ودول ناس صعايدة اهم حاجه عندهم الخشونة
قام امر ان كل المملكة بتاعته تتغطى طريق طريق وشارع شارع وغابه غابه بالجلد الطبيعي
افترا بقى
طبعا الوزير تنح قدامه على اساس ان الموضوع ده هايحتاج ملايين الاطنان من جلد البقر والخرفان ده غير الفلوس المتلتله اللي هايتكلفها المشروع المنيل ده فمش هايتفضل حاجة ف البلد تتسرق
الوزرا زمان كانوا بيخافوا على فلوس البلد !!!!
بس طبعا قاله امرك مطاع يا سيد الانطاع كله هايبقى تمام ف الحال
وساعتها كان قاعد معاه الحاج غينابي حكيم الزمان – ابو دقن بيضه طويله ده – اللي دايما بتشوفوه ف الافلام
الحاج غينابي مش عجبه الحوار وقال ايه التهييس اللي مش جايب همه ده
الراجل ده كل مره يطلع علينا بافتكاسة تودي ف داهية
وقام قايل للملك طب ياعم الحاج بدل ماتفرش الممكلة كلها جلد عشان خروجه بتحصل كل عشرميت سنه مره وانت بتحكم شويه كلاب - ده كلام غينابي وانا اكيد من الكلاب دول - هما اللي هايستفيدوا مع انهم مايستاهلوش النعيم ده ايه رأيك نجيبلك حته جلد تتغطي بيها رجل الابعد ويبقى حافظنا على الرجل الملكيه وفضل الشعب ف عذابه
مش عايزين نفتح عينيهم على النعيم ده مش هانعرف نلمهم بعد كده ومش بعيد يطلعلك واحد يقولك عايزين تداول للسلطه والكلام الفارغ بتاع المتعلمين ده
الملك عجبته الفكره مش عشان رجله لكن عشان الشعب هايفضل متبهدل
قاله برافو عليك يا حاج غينابي
صحيح التعليم بيفرق والدقن البيضا دي مش طلعت اونطه
وساعتها كان اول جزمة تتعمل ف العالم

اللي نستفيده من القصه دي بغض النظر عن ان كل الحكام بيحبوا يقرفوا الشعوب بتاعتهم
انه علشان العالم يبقى مكان يصلح العيش فيه
الاحسن انك تغير من نفسك قبل ماتفكر ف تغيير العالم

تحديث مهم

**************

بعد تزايد الطلب على معرفة معنى غينابي

رجعت للمراجع والمعاجم والقواميس وبرضه مش عرفت معناها ايه

قمت خاطف رجلي للمملكة اللي كان عايش فيها

اكتشفت بقى ان ليه حفيد

وبرضه بيشتغل حكيم زمانه

وعرفت منه ان غينابي اسمه الحقيقي هيثم

اتبسطوا كده

اهي القصة باظت

منك لله ياغينابي الشهير ب هيثم

ضيعت مني السجاد زمان وبوظتلي الحدوتة دلوقت