Wednesday, August 29, 2012

حديث أصدقاء


ينفع كده يا عم بابا؟ مش عارف اعمل حاجة من ساعة ما سيبتني ... باعمل كل حاجة بس بتطلع بايظة كأن الاخسن اني مش أعملها ... مش لاقي حد أتكلم معاه ... مش كنا بنتكلم كتير أنا عارف بس كنت بتعرف على طول ان فيه حاجة ... كل مرة اكون متعكنن كنت بتقولي والضحكة ماليه وشك : عملت ايه يا مهندس؟ معكنن ولا متعكنن ؟ أقولك انت شايف ايه ؟ تقوللي ابني مش حد يقدر يعكننه ... ده يعكنن بلد 

دلوقتي مش بقيت عارف اضحك ..مش عارف أضحك من قلبي بعدك ... بأضحك بس بتطلع ضحكة بايخة مش من القلب ..فاكر كل مرة كنا نتفرج فيها على ماتش أنا و اخواتي وتطلع تقول هاتولنا أي حاجة نضحك عليها . كان أقل حاجة بتضحكك حتى لو كان فيلم لسمير غانم أو مسرحية لأحمد بدير !!!

مشيت وأخدت حاجة مني مش عارف أجيب غيرها ... مش قادر أنسى أخر مرة شفت فيها قبل ما يقفلوا التوب الابيض على وشك ... ساعتها قلتلك وسط دموعي : انت اللي كسرت الاتفاق يا بابا .... مش كنت واعدني انك هاترقص ف فرحي 

قبل ما تمشي بيومين كنت معاك والدكتور قالنا هنمشي من الرعاية بكرة وسألتك قلتلي انك تمام ... طب أديني صدقت كلامك وأتأخرت عليك تاني يوم ... يوميها مش اتكلمنا كتير على أساس اننا هانديها تاني يوم لما نطلع الاوضه العادية ... مش كنت عارف انك بتخبي عليا وانك مش تمام ولا حاجة ... مش كنت عايز تقلقني كالعادة...
حتى ف دي مش عايز تقلق حد معاك ؟؟؟

أخر يوم مش كنت عارف انه هايكون الاخير ... والله مش كنت عارف مع ان الممرض قاللي لما لقاني بأعيط جنبك : اقراله سورة الملك ويس ... بس برضه مش فهمت ... والله مش كنت عايز امشي لولا انك شاورتلي بالسلام .... قلتلك عايزني أمشي ؟ هزيت راسك بالموافقة أو انا اللي اتهيألي كده .... فعلا كنت عايزني امشي ولا ده كان وداعك ليا؟ انت مشيت يا بابا بعد ما اتاكدت اننا خرجنا من اب المستشفى ... التقرير بيقول كده .... ياريتني مش كنت مشيت 

أوقات كتير باقوم مفزوع وقلقان احسن تكون عايز حاجة وقبل ما اقوم اجري على اوضتك علشان اشوفك افتكر ... وارجع انام واقوم مفزوع تاني و تالت ...

معظم الناس بتقوللي : مش باين عليك انك زعلان .. افرح علشان عرفت اخبي اني زعلان أوي ... علشان انت علمتني كده ... "مش تبين لحد ايه اللي بيزعلك علشان مش يمسك عليك نقطة ضعف " .. بس انا عايز اعيط ... هاعيط لوحدي ...  دي كمان تبقى نقطه ضعف ...

مش عارف أكون الكبير ... مش عارف آخد بالي من ماما و أطمن على أماني وأولادها وأخللي أمير يبقى أحسن وأعمل كونترول على أدهم و أود الناس وأسأل عليهم  ... الموضوع صعب أوي من غيرك ...

هو أنت ليه مش جيت ليا لحد دلوقتي زي ما جيت لكل الناس ف الحلم ؟؟ هو انت زعلان مني كده ؟؟ هابقى كويس علشان تجيلي وتكلمني زي ماكنت بتعمل زمان ...

بابا .... وحشتني أوي ... ربنا يرحمك

6 comments:

عالمى ازرق said...

البقاء لله
ربنا يرحمة ويغفرله ويؤجرك خير على صبرك على فراقه
عارف .. مش محتاج تمارس كل طقوس الحزن قدام الاخرين بس فيه اشخاص بيعيشوا لحظات الحزن بالتقسيط المؤلم جدا
فكر انه مسافر وهتتقابلوا .. هترتاح كتير ، فكر فى كل الاحتمالات الوحشة اللى كانت ممكن تحصله .. المرض .. الالم وافتكر ان ربنا له حكمه علشان هو ارحم الراحمين بينا
كل ما يوحشك اعمله حاجه تفرحه اى عمل لله توهب ثوابه له .. صدقه .. وروحله اتكلم معاك هيحس بيك ويسمعك

ادعيله يكون فى افضل مكان عند ربنا
كنت اتمنى ابعتلك التعليق فى ظروف افضل

momken said...

رحمه الله رحمه واسعه

البقاء لله اسكنه الله فسيح جناته


خالص العزاء

همسات دافئه said...

:(
ربنا يرحمه ويصبرك
أكيد هو ف مكان أحسن

Wish I were a Butterfly ... said...

اكيد صعبة اوي من غيره
:(((((

اكيد عمر الدنيا ما هترجع زي ماكانت تاني

ربنا يرحمه ويؤنس وحدته.. ووحدتك يا حاتم:( ....... ربنا يصبرك

almthaly said...


شركة المثالية للتنظيف
شركة المثالية للتنظيف بالدمام
شركة المثالية للتنظيف بالخبر

شركة المثالية said...


شركة تنظيف منازل بالجبيل افضل شركة خدمات منزلية بالجبيل نظافة شاملة مع التعقيم والتلميع وابادة الحشرات شركة تنظيف بالجبيل شركة المثالية هي افضل شركة نظافة بالجبيل والمنطقة الشرقية تقدم لعملائها افضل جودة وارخص الاسعار بالاضافة الي تقديم الخدمات من خلال عمالة مدربة وذات خبرة كبيرة بمجالات التنظيف ومكافحة الحشرات , فلا تتردد في الاتصال بشركة تنظيف بالجبيل للحصول علي كل ما هو مميز ولضمان الحصول علي منزل امن نظيف راقي خالي من المواد الضارة والميكروبات

شركة تنظيف منازل بالجبيل
شركة تنظيف بالجبيل