حديث أصدقاء

ينفع كده يا عم بابا؟ مش عارف اعمل حاجة من ساعة ما سيبتني ... باعمل كل حاجة بس بتطلع بايظة كأن الاخسن اني مش أعملها ... مش لاقي حد أتكلم معاه ... مش كنا بنتكلم كتير أنا عارف بس كنت بتعرف على طول ان فيه حاجة ... كل مرة اكون متعكنن كنت بتقولي والضحكة ماليه وشك : عملت ايه يا مهندس؟ معكنن ولا متعكنن ؟ أقولك انت شايف ايه ؟ تقوللي ابني مش حد يقدر يعكننه ... ده يعكنن بلد 

دلوقتي مش بقيت عارف اضحك ..مش عارف أضحك من قلبي بعدك ... بأضحك بس بتطلع ضحكة بايخة مش من القلب ..فاكر كل مرة كنا نتفرج فيها على ماتش أنا و اخواتي وتطلع تقول هاتولنا أي حاجة نضحك عليها . كان أقل حاجة بتضحكك حتى لو كان فيلم لسمير غانم أو مسرحية لأحمد بدير !!!

مشيت وأخدت حاجة مني مش عارف أجيب غيرها ... مش قادر أنسى أخر مرة شفت فيها قبل ما يقفلوا التوب الابيض على وشك ... ساعتها قلتلك وسط دموعي : انت اللي كسرت الاتفاق يا بابا .... مش كنت واعدني انك هاترقص ف فرحي 

قبل ما تمشي بيومين كنت معاك والدكتور قالنا هنمشي من الرعاية بكرة وسألتك قلتلي انك تمام ... طب أديني صدقت كلامك وأتأخرت عليك تاني يوم ... يوميها مش اتكلمنا كتير على أساس اننا هانديها تاني يوم لما نطلع الاوضه العادية ... مش كنت عارف انك بتخبي عليا وانك مش تمام ولا حاجة ... مش كنت عايز تقلقني كالعادة...

حتى ف دي مش عايز تقلق حد معاك ؟؟؟

أخر يوم مش كنت عارف انه هايكون الاخير ... والله مش كنت عارف مع ان الممرض قاللي لما لقاني بأعيط جنبك : اقراله سورة الملك ويس ... بس برضه مش فهمت ... والله مش كنت عايز امشي لولا انك شاورتلي بالسلام .... قلتلك عايزني أمشي ؟ هزيت راسك بالموافقة أو انا اللي اتهيألي كده .... فعلا كنت عايزني امشي ولا ده كان وداعك ليا؟ انت مشيت يا بابا بعد ما اتاكدت اننا خرجنا من اب المستشفى ... التقرير بيقول كده .... ياريتني مش كنت مشيت 

أوقات كتير باقوم مفزوع وقلقان احسن تكون عايز حاجة وقبل ما اقوم اجري على اوضتك علشان اشوفك افتكر ... وارجع انام واقوم مفزوع تاني و تالت ...

معظم الناس بتقوللي : مش باين عليك انك زعلان .. افرح علشان عرفت اخبي اني زعلان أوي ... علشان انت علمتني كده ... "مش تبين لحد ايه اللي بيزعلك علشان مش يمسك عليك نقطة ضعف " .. بس انا عايز اعيط ... هاعيط لوحدي ...  دي كمان تبقى نقطه ضعف ...

مش عارف أكون الكبير ... مش عارف آخد بالي من ماما و أطمن على أماني وأولادها وأخللي أمير يبقى أحسن وأعمل كونترول على أدهم و أود الناس وأسأل عليهم  ... الموضوع صعب أوي من غيرك ...

هو أنت ليه مش جيت ليا لحد دلوقتي زي ما جيت لكل الناس ف الحلم ؟؟ هو انت زعلان مني كده ؟؟ هابقى كويس علشان تجيلي وتكلمني زي ماكنت بتعمل زمان ...

بابا .... وحشتني أوي ... ربنا يرحمك

في مثل هذا اليوم

من 3 سنين بالظبط

كانت "ولــــــــــــــو" وكتبت أول بوست

والنهاردة بعد 3 سنين

باقول لكل حد عدى هنا مرة

بأحبـــــــــــــــكوووووووووووووووووووووووا

وبأحب المكان ده جدا

ومهما بعدت أو اتأخرت

هايفضل المكان ده والناس اللي فيه اقرب ليا من اماكن كتييير و ناس كتييير جدا

كل سنة وأنا طيب وبلوجي بخير

الصورة من

http://marvinquinones.blogspot.com/

كل ما أفكر

وانا كل ما أفكر
ابطل
افكر
ابطل افكر فيك
بياخدنى حنينى
وليه بلاقينى
حبيبى
بأنادى عليك

وبحب الناس الرايقة

وبحب الناس الرايقه .. اللي بتضحك على طول

اما العالم المتضايقه .. انا لأ مليش في دول

ومليش في الدمع لا لا ..

ولا في الناس الشياله

كل اللي فـ قلبه حاجه ..

اول بـ اول بيقول

انا مابقتش حمل جرح
انا مابقتش استنى فرح
انا مابقتش
ع الليالي قادر

لكل من ظلمته وهم كثر
اطمئنوا
فالله يثأر لكم

لا إله إلا انت سبحانك
اني كنت من الظالمين

المعنى الحقيقي للفوز

من قريب قبل كام سنة وبالتحديد ف مسابقه الاوليمبياد الخاص على ملعب مدينة سياتل وعلى خط البداية لمسابقه الجري وقف تسعه متسابقين يستعدوا علشان يخوضوا السباق كلهم من متحدي الاعاقه سواء جسدية او عقلية

مع ضربة المسدس كلهم انطلقوا ف السباق اللي كانوا بيستعدوله بقالهم شهور وكل واحد فيهم بيحلم انه يكون الفايز

كلهم بدأوا الجري ماعدا واحد. ولد منهم اتكعبل وهو بيجري ووقع على الارض وبدأ يبكي وسمعه التمانية اللي بيتسابقوا معاه

بدأ باقي المتسابقين يقللوا من سرعتهم وبصوا وراهم فوجدوا صاحبهم واقع على الارض بيبكي فعملوا ايه؟

كل التمانية لفوا اتجاههم ورجعوا لمكان زميلهم اللي على الارض. كل التمانية عملوا نفس التصرف

وواحده منهم نزلت قعدت جنبة وطبعت بوسة على خده وقالتله مش تزعل انت هاتبقى احسن وبعدها ساعدوه يقوم وقام التسعه شبكوا ايديهم مع بعض وبدأوا يجروا ماسكين ايد بعض لحد ما وصلوا لخط النهاية كلهم ف نفس الوقت

كل اللي ف الاستاد وقف وفضلوا يصفقوا مدة طويلة والناس اللي كانت موجودة هناك بتقول ان المشهد مش ينفع يتحكي مهما وصفوا ومع ذلك لسه الناس بتحكي القصه لغاية دلوقت وده يخلينا نتعلم حاجة

انه المهم ف الحياه اكبر من مجرد اننا نحقق الفوز لنفسنا ونهزم الاخرين ولكن الاهم اننا نساعد الاخرين على الفوز ولو كان ده معناه اننا نقلل من خطواتنا او حتى تغيير مسار حياتنا كله.

لازم نقول للامانة ان القصه فيها كتير من الحقيقه ويمكن الحقيقي فيها اكبر وان كان فيه جزء من المبالغه ف عدد الاشخاص اللي رجعت فوفقا لمكتب واشنطن للاوليمبياد الخاص ان المسابقه حصلت بالفعل و بالتحديد سنة 1976 في مدينة سبوكان بواشنطن وانه بالفعل وقع متسابق ف بداية السباق ورجع له اتنين من المتسابقين لمساعدته على الوقوف واكملوا السباق مع بعض ووصلوا لحد النهاية سوا ولكن هما مجرد اتنين بس وباقي المتسابقين اكملوا السباق كأن شئ لم يكن

وبرغم اننا هانكون اقرب لتصديق القصه الاخيرة عن القصه الاولي وبرغم ان معظمنا هانقول ان دول اتنين من ذوي الاحتياجات الخاصه وكمان مش كل المجموعه وان القصور العقلي هو اللي بيدفع متحدي الاعاقه للتعامل بصورة طفوليه والنظر للعالم نظرة المتفائل لكن اللي بيقول كده بيناقض كلامه اكتر من انه يثبت وجهه نظرة لان تنظيم مسابقه للاوليمبياد الخاص من الاساس امر متعب وشاق ومش مجرد يوم اجتماعي لتعارف فئة من البشر لها امكانيات محدودة لاشخاص عندها بعض تأخر ف الاتيعاب او حتى اعطاء فرصه الجري لشخص عنده رجل او ايد واحده لكن المسابقات دي مسابقات لها تنظيم عالي وبتتاخد على محمل الجد من كل القائمين على التنظيم والمشتركين فيها كل واحد بيعمل اللي يقدر عليه على امل ان ربنا يوفقه و يتوج تعبه بالفوز

وعلشان كده اللي لازم ناخد بالنا منه انه فيه ناس بغض النظر عن اي اعتبارات تانية اتصرفت بطريقه عفوية واتخلت عن احلامها لاثبات ذاتها والوصول للقمة ف سبيل تقديم المساعدة لشخص قد لاتربطهم بيه اي علاقه

القسم بتاع الاوليمبياد الخاص بيقول " دعوني أفوز ولكن ان لم استطيع الفوز فدعوني اكون شجاعا ف المحاولة"

اللي كنت عايز اوصله من القصه دي انه بمناسبة قرب دخول رمضان ياريت كل واحد مننا نتعلم من الناس دي اننا نحاول على اد ما نقدر نساعد بعض ونعيش رمضان زي ماربنا عايز ونكون مع بعض مش بس نعمل لنفسنا بس علشان مش المهم اننا نفوز بس لكن الاهم اننا نساعد اللي حوالينا ف الفوز وده ف حد ذاته يعتبر فوز لينا

رمضــــــــــــان كريــــــــــــــــم وكل عام وانتم الى الله اقرب وعلى طاعته أدوم

ياتري هافضل موجود ؟

وبتقع حبات العنب من عنقودها واحدة ورا واحدة

وخايف مش الاقي غيري على فرع الشجر

وساعتها مش هايكون بقائي بأختياري

تهييس بن هلفطه آل اي كلام

المفتش كورمبو كسل اوي وبقى يجيب فوازير اعبط من الاول بعد ما جاله سحس بومب يساعده لانه حس بنفسه لما لقى اللي معاه اغبى من السمك
اشمعنى السمك؟
لانه وبرغم ان الناس بتصطاده من آلاف السنين مش اتعلم ولسه لحد دلوقت برضه بياكل الطعم
مش بقولكم غبــــــــــــــــي

نور ومهند اخدوا كل الشهرة بتاعه المسلسلات التركيه اللي غزت مصر فجأه واشتهروا اكتر من ريدج وكلارك لما جم مصر وعملوا اعلان ماربيلا بتاع الشعر وانا باحب منصور اوبل
يمكن علشان من الرواد
مع ان المسلسل اللي شغال دلوقت عامل صداع ف بيتنا وبيستنوه اكتر مابيستنوني لما ارجع من السفر
اصل اللي فهمته ان انور بيك بينافس كرم بيك برضه على حب شهرزاد بيكه
اللي يغيظ بقى ان الواد كينان ابنها مش فارقه معاه امه تتجوز مين
- مبدأ انها تتجوز اصلا تاني الكلام فيه عندنا يطير فيها رقاب -
المهم امه تبقى مبسوطة وكمان الست الدادة بتاعته شاغلاله كل وقته
بس الواحد خايف الواد يلقط منها طريقه الكلام ويبقى خواجه ويكلم الرجاله والستات بصيغه المذكر
بس زي ماعنوان المسلسل بيقول كله بيروح
ويبقى الحب

قرد موبينيل بعد ماسافر اعارة لجمهورية شونبونجو رفض العودة مصر تاني
ماهو برضه عنده حق الراجل بيعاملوه معاملة الملوك وممسكينه وزارة تعليم هناك مش ف مصر اللي حبسينوه ف قفص وبيجيبوا العيال يرموة بقشر السوداني بعد ماياكلوه هما

سيد ابو حفيظة بتاع نشرة الخامسة والعشرون شخصيه مصريه صميمة
مش سهل ان لم يكن مستحيل نلاقي حد ليه الهيئة المميزة دي الا لو كان مصري ابن مصري
وابن مصر ايـــــــه؟
برافو
ابن مصر عامل كاريه وغاسل ايديه
بس السؤال اللي بيشغل بال الناس كلها
فين البطيخة اللي ف الايد اليمين والجورنال اللي ف الايد الشمال
ولا هو بيشتغلنا وعامل فيها مصري
عايزين تعرفوا الاجابة؟

تابعونـــــــــــا

سمعتوا اظرف خبر : والله امي ندهيتلي بفرحه مش حسيتها ف صوتها من ايام ما الاهلي رفض احتراف ابوتريكة وقالتلي اقرا الخبر ده والله انا كنت واثقه انهم هاينصفوكوا

وخللوا بالكوا من الجمع للمجهول ده ابص الاقي
لكل اعسر لا تحزن فقد اثبتت الدراسات انك انسان طبيعي " الاهرام"
الحمد لله انا طلعت انسان اساسا

بينما يغني تامر حسني بأغنيته المتصدرة مبيعات شارعي شهاب وتقاطع محيي الدين ابو العز ونادي الصيد
" افتكرلي اي حاجة كانت حلوة مني"
مش لقيت اي حاجة تخليني أحقق أمنيته
سامحني ماشفتش منك يوم حلو
الهي ما يرجعها أيام
ويالا غور بقى

اما وانا باستمع واستمتع باغنية العملاق الهادي الراسي موسيقار الاجيال " قالولي هان الود عليه " مش صدقتهم وهما بيأكدولي الخبر وبيقنعوني التفت لمستقبلي اللي بيضيع فقلتلهم كفايه حرام عليكوا مش تشوهوا الصورة الحلوة دي
وأرد عليهم نفس رده بتلقائية
اطمنوا
"هو افتكرني عشان ينساني ؟

وده معاد جايزة البوست
لكل واحد وصل لحد هنا احب اقوله انت بطل احسن من صابر ايوب بتاع اتصالات

وعلشان كده لازم اكافئك علشان تيجي تاني

والنبي تبقى تيجي الله يكرمك

يقعدلك ف عينك وبلوجك وعافيتك
شوية كتب هايعجبوكوا جدا
وعد

"ScHiZoPhReNiAt"

اخوكو مش مجنون لكني مش عاقل
اكيد مانيش عربيد لكني مش فاضل
وحالي ماهوش مظبوط لكنه مش مايل
انا مهتم جدا لكني مش سائل

وكأن شئ لم يكن

لقاء الملائكة

كان مرة فيه ولد صغير بيقضي كل وقته انه يحلم

وف مرة كان حلمه انه يقابل ملاك من الملايكة اللي بيسمع عنهم على طول

وف لحظة قرر انه يروح للمكان اللي بيعيش فيه الملايكة ولانه عارف ان الملايكة مكانهم بعيد عنه اوي قرر انه يستعد للرحلة الطويلة
جاب شنطة المدرسة وملاها ساندوتشات وكيك وعصير وبدأ رحلته
فضل ماشي واول ما تعب بص لقى محطة و لقى واحده ست كبيرة ف السن قاعدة على محطة الاتوبيس بتتفرج على الناس والعربيات.

الولد قام قاعد جنبها وقام فاتح شنطتة ومطلع علبة عصير وكان هايشربها لما التفت للست اللي قاعدة جنبه وفكر ان شكلها تعبان وممكن تكون جعانة فقام مطلع ساندوتش من الشنطة ومد ايده للست

فالست مدت ايدها واخدت الساندوتش وشكرته بابتسامه
الابتسامة بتاعه الست كانت من الحلاوة للدرجة اللي خلت الولد يتمنى يشوف الست دي بتبتسم مرة تانية

فقام مادد ايده مرة تانية جوة الشنطة ومطلع علبة عصير ومديها للست اللي تاني اخدتها منه وابتسمتله ابتسامة تانية حس الولد معاها انها يمكن احسن من الاولانية وكان ف منتهى السعادة
فضل الولد والست الكبيرة قاعدين ياكلوا ويشربوا اكتر من 3 ساعات من غير مايقولوا كلمة لحد ما الدنيا بدأت تضلم

وهنا حس الولد انه اتاخر وانه محتاج يروح يرتاح
قام الولد وحط شنطته على ضهره ويادوب مشي هما خمس خطوات قام واقف ومتدور ورجع جري للست الكبيرة وقام حاضنها اوي فالست ضحكت ف وشه وابتسمت احلى ابتسامة ف الدنيا بالنسبة له
الولد رجع البيت ومامته شافته فاستغربت من حالة السعادة والرضا اللي ماليه وشه فسألته ايه حصله النهاردة خلاه ينبسط ويفرح اوي كده؟
الولد رد بكل تلقائية: اصلي اتغديت مع واحد من الملايكة النهاردة
وحتى قبل ما مامته تظهر استغراب من كلامه قام قايل : بس تعرفي الملايكة دول بيبتسموا احلى ابتسامة ف الدنيا كلها
وف نفس الوقت ف مكان تاني كانت الست الكبيرة رجعت لبيتها ماليها نفس احساس السعادة والرضا اللي عند الولد لدرجة ان ابنها اندهش جدا من حالة الفرح اللي والدته كانت عليها فسألها : ايه اللي مخليكي فرحانة اوي كده النهاردة يا ماما؟
وبنفس تلقائية رد الولد على مامته ردت الست على ابنها : اصلي اكلت النهاردة مع واحد من الملايكة
وقبل ما تستنى رد ابنها كملت كلامها وقالت : بس تعرف انا كنت متوقعه الملايكة اكبر من كده بكتير

Too often we underestimate the power of a touch, a smile, a kind word, a listening ear, an honest compliment, or the smallest act of caring; all of which have the potential to turn a life around.

الناس بتدخل حياتنا لسبب معين مع اختلافه لكن لازم لوجودهم ف حياتنا سبب وممكن يكون وجودهم لفترة صغيرة او لباقي عمرنا
فمش تضمن وجود حد طول الوقت واغتنم الفرصه وافرح بوجودك معاهم طالما هما موجودين معاك

الحدوتة بتاعة

Julie A. Manhan

النسبية من منظور اخر

شدني جدا سؤال كان مكتوب ف مجلة مجهولة الغلاف ولا يمكن الاستدلال عن اسمها

ولا عارف بتاعة مين ولا بتقول ايه
كانت مجرد ورقة مقطوعة ومرمية باهمال ف الارض بعد ما تقريبا اتمسح بيها شوية زيت وقعوا من طبق فول كان حد بيتسحر بيه امبارح ف الشغل وجة الحظ انها تقع تحت عيني ف وقت كنت فيه حاسس بقمة الملل ومش لاقي حاجة اعملها
السؤال بقى بيقول : علل
وضح من وجهه نظرك العقيمة ايه اعظم اكتشاف عرفته البشرية؟
ايوة قال العقيمة وانا هاجيب حاجة من بيتنا
فانا قمت مترجم السؤال للغة العربية بتاعتنا علشان اقدر افهمه وبعدها سألت نفسي لو حد سألك السؤال ده كان هايبقى ايه ردك ساعتها يا ابو العريف؟
وبرغم انه سؤال شكله يخض فاكيد الانطباع الاول عنه هايكون حاجة من اتنين مالهمش تالت
يا اما هاتعتبرة سؤال رخم الغرض منه احراجك واظهارك ف صورة وحشة هي اصلا صورتك الحقيقية لو انت من الناس اللي معلوماتها العامة بعافية شوية لانك بكل بساطة مش هاتكون عارف يعني ايه كلمة اكتشاف اساسا علشان تقدر تعرف اعظمها
يا اما هاتعتبرة فرصة عظيمة للتعريف بقيمة معلوماتك لو انت من هواة المنظرة وهاتختار اكتشاف مش فيه حد سمع عنه غيرك او ممكن مش يكون اكتشفوه من الاصل وتفضل تعيد وتزيد ف السبب اللي خلاك اخترته من دون كل الاكتشافات علشان تبين ان حضرتك عملاق المعرفة والمبحر ف كنوز العلم المجهول
وعلى الرغم ان السؤال كان ليه ردين مالهمش تالت
انا بقى لقيتني بأرد الرد التالت اللي كنت فاكره مش موجود بس الصراحة دخل دماغي جدا مع انه المفروض يكون الرد اللي ينط ف دماغ اي حد يتسأل السؤال ده وساعتها حسيت باحساس اجمل من احساس عبدالحميد ارسطو فيلسوف السبتية لما اختاروه حكم ف الماتش النهائي ف الدورة الرمضانية
قلت ايه حضرتي بقى ؟

قلت ان الموضوع نسبي
بمعنى ان كل واحد هايختار اكتشاف استفاد بيه بطريقة او باخرى ويقول علية اعظم اكتشاف ف الدنيا من غيرة كان ميزان الطبيعة هايختل
يعني الانسان القديم هايعتبر النار اعظم اكتشاف علشان بعد ما كان بياكل اللحمة نية بقى ياكلها نص سوى

ومريض السكر هايقول ان الانسولين ده اعظم اكتشاف

والقبطان هايقول انه قانون الطفو هو اعظم اكتشاف علشان من وراه بيسترزق ويعمله كام نقله بالمركب بتاعه ويرجع ف اخر الليل معاه عشين جنية ونص كيلو لحمة

وتامر حسني هايقول انه شريط الكاسيت

ونادية الجندي هاتقول عمليات التجميل وهكذا
طبعا سامعكم ف نفس واحد بتقولوا : ايوة وبعدين طب فين الاجابة؟ ما اي حد هايقول كده. يعني انت بسلامتك جبت التايهة . ما احنا عارفين.
بصراحة اتحرجت من نفسي اوي وانا شايف صوابعكم اللي مش عايزة قطعها عمالة تشاور عليا وتقول : عبيط ده ولا ايه؟
حسيت اني عملت زي اللامؤاخذة الحمار اللي بيلف ف ساقية بيلف ويدور حوالين نفس النقطة مش جاب جديد
بس انا مقتنع بكده. ان الموضوع نسبي بس قعدت طبعا افكر ف اكتشاف انا عارفه علشان اقوله علشان مش يبقى منظري وحش قدام نفسي
يعني لحفظ اراقة دماء ماء الوجة بس
وقلت البترول هو اعظم اكتشاف علشان لقيتلي فية شغلانة اكل منها عيش بدل ما ابقى عواطلي
بس مش كانت الفكرة راضية تسيبني وفضلت مسيطرة عليا لحد ما اللمبة اللي فوق دماغي نورت دلالة على الاكتشاف الكبير
النسبية طلعت ف حد ذاتها اكتشاف
هيييييييييييييييييييييييه
ايوة والله بجد زي ما بقولكوا كده
يعني انا ف التمام الحمد لله واقدر بكل ثقة اطلع لكل واحد ضحك عليا فيكوا لساني وانا منشكح
يبقى بالنسبة ليا الجواب النهائي هو النسبية اعظم الاكتشافات
واحد رخم يقولي طب ايه اسبابك ودوافعك
يابن اللذينا يا بارد
بس ولو
على مين يا معلم ده انا الرخامة مشتقة من اسمي
النسبية دي حلت لنا مشاكل كتير جدا كنا ممكن نقع فيها وممكن بسببها حياتنا تضيع وحياة ناس تانية معانا
اديلكم مثال
واحدة بتقول لجوزها اول ما صحي من النوم: بتحبني اد اية يا ابو مرسي
طبعا ده سؤال لا ينم عن خير

الحاجة ام مرسي عايزة توقع الراجل ف الخية وهو مش ف وعية علشان تخلعه
كمان ده سؤال مالوش اجابة. يعني هايقولها ايه ؟ باحبك اوي . طب اوي دي كام كيلو ؟ يبقى باحبك جدا . و جدا دي اقسها بالمتر ولا بالميل؟
مشكلة مالهاش لازمة فعلا لكن جت النسبية وحلت الموضوع ف كلمتين
بتحبني اد اية ؟ من غير ما يفكر وبكل تلقائية يرد : باحبك آاااااااد الدنيا دي كلها.
يابن اللعيبة يا اينشتاين
الراجل نسب مقدار الحب اللي" المفروض " يحبه لمراته بحجم الدنيا
دلوقت الكرة ف ملعبها قوليلي الدنيا اد ايه اقولك باحبك اد ايه
بصراحة انا لقتني باصقف للراجل ودماغه
وبعدها لقيت المشاهد بتكر قدامي زي الخيط
لما حد صايع يحب يخوفك منه ويحب يوصلك انك هاتتعب معاه يقولك ايه؟

باستخدام النسبية برضه
يقولك انا صايع بحر . انت تعرف البحر اد اية ؟ اكيد لأ
لما تعجبك حاجة وتحب تبين مدى اعجابك ده تقول ايه ؟
دي جامدة اخر حاجة . لما توصل للاخر هاتعرف عاجباني اد ايه
لما تلاقي واحد ماشي ووشه سبعات وتمانيات وتسأله بكل براءة : الدنيا عاملة معاك ازاي ياعم الحاج؟
يقولك كلمة تلخص كل حياته : زي الزفت . الراجل ادهالك وش ومش محتاج تعرف حاجة تاني علشان يبان حاله ولو سألته سؤال تاني يبقى انت البعيد حمار
لما ام توصف لابنها العروسة اللي جايباها ليه تقوله : دي خدودها تفاح امريكاني
لما حد يقولك انه مستحمل البلاوي اللي بيشوفها يقولك: ده صابر صبر ايوب
لما حد يوصفلك واحد منكد عليه حياته وبيعامله بتكبر يقولك: ده متفرعن عليا " نسبة لفرعون "
لما حد يقولك انه فاهمك وانه حاسس انك بتستعبطه يقولك: انت فاكرني هندي
لما حد يحكيلك عن واحد ماشي يبهدل ف خلق الله ضرب وقلة قيمة تقوله: ليه هو هيركليز
لما حد بيعلن عن المنتج المصري يقولك : لا تقولي صيني ولا ياباني من صنع بلدنا ولو جيبته هاتجيلي تاني
يعني مش هايستحمل معاك يومين
داليا البحيري لما سألت خالد النبوي عن طموحاته الضايعة ف الفيلم
كان ايه الحوار؟
هي : واحلامك يا يوسف ؟
قالها ايه؟ ضاعت ؟ لأ . اتبخرت ؟ برده لأ
قالها : زي الهوا
لو قدرت هي تمسك الهوا هو هايقدر يحقق احلامه بس يبقى يقابلني بقى
دي فيروز بذات نفسها عملت كده
"شايف البحر شو كبير .. كبر البحر بحبك "
ياسلام عليكي . تطبيق رائع لاكتشاف اروع
انك تنسب حاجة مش قادر تعبر عن قيمتها الحقيقية لحاجة تانية معروفة ف المجمل فده انا شايفه قمة العبقرية
تصوروا الراجل اللي مراته سألته ده كان قعد يفكر ف مدى حبه وهانفترض انه بيحبها فعلا كان ممكن يكون ايه مصيرالمستقبل معاه هو وعياله من غير النسبية ده لو اعتبرنا ان مراته ست طيبه ومش هاتخلص عليه وقتي
لو الراجل اللي سألته عن احواله قعد يفكر ف اد ايه حياته وحشة مين كان هايحس باللي هو فيه من غير النسبية
مين كان هايستنى يسمع منه اساسا . وقيس على كده كل حاجة ف دنيتنا دي
رحمك الله يا اينشتاين

من غيرك الدنيا كانت هاتبقى سلطة

الجواب و عنوانه

كعادتي كل سنة لازم اعيد عليكوا والعيدية السنة دي قصه زي السنة اللي فاتت المهم انها تعجبكوا

كل سنة وانتم طيبين

مشهد خارجي وهايبقى داخلي كمان شوية / صباح يوم عادي

اول حاجة عملتها منى اول ما النهار طلع انها راحت لصاحبتها وصديقه عمرها رشا بعد ما رشا كلمتها مكالمة قلقتها جدا وخلتها مش عرفت تنام

رشا كانت ف حالة صعبة جدا وبالعافيه قدرت تفهم منى من كلام صاحبتها انها واقعة ف مشكلة كبيرة مسيطرة عليها وبتمر بأزمة وانها محتاجة ليها جدا

رنت منى جرس الباب فتحت مامة رشا واول ما شافت منى راحت واخداها ف حضنهاو قالتلها الحقيني يا منى صاحبتك هاتموت مني

انا مش عارفة مالها من امبارح لقيناها رجعت من برة دخلت على اودتها وهما دقيقتين ولقينا هيستيريا البكا مسكتها وعمالة تصرخ وتكسر ف كل اللي قدامها

انا خايفة عليها جدا هي مش بتتكلم غير معاكي ارجوكي حاولي تعرفي مالها

مش فيه اي حاجة توصلنا للحالة دي
دي بنتي الوحيدة وبدأت مامت رشا تبكي فرق قلب منى للحالة اللي فيها صاحبتها و مامتها

فقالت ليها اطمني يا طنط ان شاء الله مش ماشية غير لما رشا تضحك تاني

كل حاجة هاتبقى تمام استأذنك انا داخلالها

دخلت منى على رشا ف الاوضه فاتخضت من منظرها

لقت المكان متدمر ومخدات متقطعة ومرايات مكسورة

الاوضه ف حالة دمار شامل

لكن الاكتر انها لقت صاحبتها ف ركن الاوضه ف حالة وحشة جدا ومنهارة تماما

منى اتصدمت من المنظر ومش قدرت تتمالك اعصابها وبدأت تعيط وهنا حست صاحبتها رشا ان منى موجودة ف الاوضة

وكأنها غريق ف وسط البحر لقي خشبة يتعلق عليها قامت جريت عليها واترمت ف حضنها وقعدوا الاتنين يعيطوا مع بعض

بعد فترة مش عارف اد ايه بصت منى ف وش صاحبتها وقالتلها ليه كل ده هو فيه حاجة تستاهل ان الجمال ده كله يعمل ف نفسه كده

بصت رشا ف الارض بصة انكسار كانت ابلغ من اي رد

منى قلقت وبدأت تستجوب رشا

قوليلي انا اختك وكاتمة اسرارك احكيلي علشان لو انتي ف ورطة نقدر نفكر سوا وان شاء الله كله يتحل

ردت رشا : الا مشكلتي انا. انا اللي استاهل

انا اللي امنت له وحبيته رغم الفوارق الكبيرة بينا واللي كل الناس كانت شايفاها الا انا وتبدأ ف العياط مرة تانية

منى بترد بريبة : تقصدي سي زفت كريم

عمل ايه تاني

اوعي يكون حصل منه حاجة

لو زعلك انا اقطعلك رقبته

رشا تعيط بصوت اعلى من غير ما ترد

تتضايق منى وتمسك رشا بعصبية وتقول ردي عليا عمل ايه الحيوان ده

رشا بصوت مش مسموع من كتر العياط : قعد يضحك عليا بكلامة ويوهمني لحد ما اخد اغلى حاجة عندي

تخبط منى بايدها على صدرها وتقول يانهار اسود

انتي اكيد اتجننتي ازاي ده حصل

ترد عليها رشا ارجوكي انا باتقطع مش طايقه انا مش قادرة اصدق ازاي قدر يضحك عليا

منى تصرخ فيها : هو انا لسه قلت حاجة انت دماغك كانت فين لما ده حصل ازاي

رشا وسط البكا : ياريتني ما شفته ياريتني ماعرفته

استغل حبي ليه واني مش بارفضله طلب وقام عمل عملته

منى بعصبية : وفين سي زفت ده دلوقت طبعا بيتهرب منك

انا مش قادرة افهم ازاي مش اتعلمتي من كل الافلام والمسلسلات اللي بنشوفها

رشا تبص لصاحبتها وتمسح دموعها فتبان لمعة غريبة ف بصتها كأنها افتكرت حاجة مهمه : هاييجي غصب عنه اصله مش اخد كل حاجة

منى : انتي عبيطة يا بنتي مين اللي يجي ده هو عايز ايه تاني منك

رشا بفرحة : اصله اخده من غير الشاحن

منى وعلامات البلاهه على وشها: شاحن ؟؟؟!!!! هو كريم اخد ايه بالظبط ؟


رشا بكل اسى وانكسار : اخد الاي بوود بتاعي

!!!!!!!!!!!



الخلاصة :

لو كنت فاكر انك بتفهمها وهي طايرة

فمش بالضرورة تكون بتفهمها قبل ما تطير

استناها لحد ما تطير

لحسن تفهمها غلط

او تكتشف انها مش بتطير اساسا

*منفذ الى الجنة

الحكاية دي حكاية راجلين كانوا بيتعالجوا ف نفس المستشفى وكمان كانوا قاعدين مع بعض ف نفس الاوضه واحد منهم كان مريض بمرض مياة على الرئة وكجزء من العلاج كان كل يوم لازم يقعد بعد الضهر لمدة ساعة علشان تصريف السوائل الموجودة على الرئه

الراجل ده كان السرير بتاعه جنب الشباك الوحيد اللي ف الاوضه

التاني كان ف الناحية التانية من الاوضة وكان مش مسموح له حتى انه يحرك دماغه لكن كان دايما نايم على ضهره وباصص لسقف الاوضه طول الوقت

الاتنين اتعرفوا على بعض وكان كل وقتهم وهما صاحيين بين العلاج والكلام مع بعض

اتكلموا مع بعض عن كل حاجة

البيت والعيله ووظايفهم واصحابهم وشغلهم وحتى ذكريات الطفولة والدراسه وفترة التجنيد حتى ايام الاجازات كانوا بيحكوا لبعض كانوا بيقضوها ازاي

كل يوم بعد صلاة العصر بالظبط على طول الراجل اللي قاعد جنب الشباك كان يتعدل ف مكانه ويقعد لمدة ساعة زي ما الدكتور قال

كان بيفضل طول الساعة دي يحكي لصاحبه ف الناحية التانية من الاوضه على كل حاجة هو شايفها من الشباك

لدرجة ان الراجل اللي قاعد ف اخر الاوضه بقى يستنى الساعه دي بفارغ الصبر

ده كان الوقت الوحيد الي كان بيحسسه انه لسه عايش ف الدنيا

كان الراجل يقعد جنب الشباك اللي كان موجود ويحكي لصاحبه على الجنينة اللي بيطل عليها الشباك

بيحكيله انها كانت جنينة كبيرة وفيها بحيرة بط ف النص بيلفوا جواها والاطفال اللي بيلعبوا على المراجيح وراكبين مراكب والشباب اللي ماشيين ماسكين ايد بعض ومشبكينها وماشيين وسط الورد اللي على كل لون وشكل

كل ده وراه منظر السما الصافيه بيكمل صورة ربنا ابدعها

كان كل ما الراجل اللي جنب الشباك يوصف حاجة صاحبه ف اخر الاوضه يغمض عينيه ويتخيل كل حاجة بتتوصف له وكأنه بيتفرج على فيلم سينما

كل يوم الراجل جنب الشباك يوصف حاجة جديدة بتحصل بره المستشفى ومهما كانت الحاجة اللي بيوصفها كان الراجل ف اخر الاوضه بيعمل نفس الحاجة

يغمض عينيه ويعيش كل كلمة وكل صورة بيوصفها الراجل جنب الشباك

مش بقى محتاج انه يبص على الشباك صاحبه بينقله كل حاجة بتحصل وهو يغمض عينيه ويشوفها بتحصل قدامه

مرت الايام والاسابيع وكل يوم بعد صلاه العصر بالظبط يبدأ الراجل جنب الشباك يوصف لصاحبه اللي بيحصل بره الشباك

وف يوم قبل العصر بالظبط دخلت الممرضه عليهم علشان تديهم الدوا لقت الراجل جنب الشباك نايم وعلى وشه احلى ابتسامة ف الدنيا وقد فارقته الحياه

مات الراجل جنب الشباك وزعل عليه كل الناس خصوصا صاحبه اللي سابه لوحده

الراجل ف اخر الاوضه

عدت الايام ممله بطيئة وف يوم طلب الراجل ف اخر الاوضه من الممرضة انه ينتقل مكان صاحبة المرحوم

الممرضه وافقت وف ساعتها بدأت تنقل الراجل الممدد على سريره من مكانه لمكان صاحبة

ف الجانب التاني من الاوضه وبعد ما اتاكدت ان الراجل مرتاح ف مكانه الجديد ودعته وسابته لوحده

اول حاجة عملها الراجل بعد ماسابته الممرضه انه حاول يتحرك

حاول ببطء وبكل الالم والتعب استجمع لراجل قواه رغم الخطورة اللي ممكن يتعرضلها ومال على جنبة اليمين لاول مرة من زمان علشان ياخد اول نظرة من فترة طويله على العالم اللي موجود بره الاوضه وببطء شديد رفع عينة علشان يبص على الشباك

اتفاجأ جدا لما لقى قدامة حيطة مش عليها اي حاجة حتى لو صورة

نادى على الممرضة وقالها انه مش عايز يكون ف المكان ده هو عايز يبقى مكان زميله اللي كان بيوصفله كل يوم اروع المناظر اللي بيشوفها

عايز يكون جنب الشباك

ابتسمت الممرضة وقالتله ان هو ده مكان زميله

بس اصلا زميله كان لا يمكن يعرف ان فيه شباك على الحيطة حتى لو موجود علشان كان كفيف

وكملت كلامها وقالتله

هو يمكن كان بس بيحاول يسليك

* البوست كان قصة انجليزي قريتها وعجبتني فحاولت اترجمها واحطها يمكن تعجب حد تاني

احلى طعم للسعادة بتديهولنا الدنيا بيكون لما نخللي اللي حوالينا سعدا مهما كان احساسنا اللي بنمر بيه

لو عايز تحس انك تملك الدنيا كلها فكر ف الحاجات اللي ربنا انعم بيها عليك ومش كنت تقدر مهما كنت تملك انك تشتريها

استمتع بيومك على اد ما تقدر وعيش النهاردة بكل طاقتك علشان بكرة لسه مش موجود