هنا رجع يكتب ولــــــــــــــــــو

في مثل هذا اليوم

2010-05-26T10:16:00.004+03:00

من 3 سنين بالظبط

كانت "ولــــــــــــــو" وكتبت أول بوست

والنهاردة بعد 3 سنين

باقول لكل حد عدى هنا مرة

بأحبـــــــــــــــكوووووووووووووووووووووووا

وبأحب المكان ده جدا

ومهما بعدت أو اتأخرت

هايفضل المكان ده والناس اللي فيه اقرب ليا من اماكن كتييير و ناس كتييير جدا

كل سنة وأنا طيب وبلوجي بخير

الصورة من

http://marvinquinones.blogspot.com/

كل ما أفكر

2010-01-08T20:05:00.003+02:00

وانا كل ما أفكر
ابطل
افكر
ابطل افكر فيك
بياخدنى حنينى
وليه بلاقينى
حبيبى
بأنادى عليك

وبحب الناس الرايقة

2009-10-31T19:23:00.003+02:00

وبحب الناس الرايقه .. اللي بتضحك على طول

اما العالم المتضايقه .. انا لأ مليش في دول

ومليش في الدمع لا لا ..

ولا في الناس الشياله

كل اللي فـ قلبه حاجه ..

اول بـ اول بيقول

2009-10-09T18:02:00.001+02:00

انا مابقتش حمل جرح
انا مابقتش استنى فرح
انا مابقتش
ع الليالي قادر

2009-09-30T18:27:00.002+02:00

لكل من ظلمته وهم كثر
اطمئنوا
فالله يثأر لكم

لا إله إلا انت سبحانك
اني كنت من الظالمين

المعنى الحقيقي للفوز

2009-08-12T18:19:00.002+03:00

من قريب قبل كام سنة وبالتحديد ف مسابقه الاوليمبياد الخاص على ملعب مدينة سياتل وعلى خط البداية لمسابقه الجري وقف تسعه متسابقين يستعدوا علشان يخوضوا السباق كلهم من متحدي الاعاقه سواء جسدية او عقلية

مع ضربة المسدس كلهم انطلقوا ف السباق اللي كانوا بيستعدوله بقالهم شهور وكل واحد فيهم بيحلم انه يكون الفايز

كلهم بدأوا الجري ماعدا واحد. ولد منهم اتكعبل وهو بيجري ووقع على الارض وبدأ يبكي وسمعه التمانية اللي بيتسابقوا معاه

بدأ باقي المتسابقين يقللوا من سرعتهم وبصوا وراهم فوجدوا صاحبهم واقع على الارض بيبكي فعملوا ايه؟

كل التمانية لفوا اتجاههم ورجعوا لمكان زميلهم اللي على الارض. كل التمانية عملوا نفس التصرف

وواحده منهم نزلت قعدت جنبة وطبعت بوسة على خده وقالتله مش تزعل انت هاتبقى احسن وبعدها ساعدوه يقوم وقام التسعه شبكوا ايديهم مع بعض وبدأوا يجروا ماسكين ايد بعض لحد ما وصلوا لخط النهاية كلهم ف نفس الوقت

كل اللي ف الاستاد وقف وفضلوا يصفقوا مدة طويلة والناس اللي كانت موجودة هناك بتقول ان المشهد مش ينفع يتحكي مهما وصفوا ومع ذلك لسه الناس بتحكي القصه لغاية دلوقت وده يخلينا نتعلم حاجة

انه المهم ف الحياه اكبر من مجرد اننا نحقق الفوز لنفسنا ونهزم الاخرين ولكن الاهم اننا نساعد الاخرين على الفوز ولو كان ده معناه اننا نقلل من خطواتنا او حتى تغيير مسار حياتنا كله.

لازم نقول للامانة ان القصه فيها كتير من الحقيقه ويمكن الحقيقي فيها اكبر وان كان فيه جزء من المبالغه ف عدد الاشخاص اللي رجعت فوفقا لمكتب واشنطن للاوليمبياد الخاص ان المسابقه حصلت بالفعل و بالتحديد سنة 1976 في مدينة سبوكان بواشنطن وانه بالفعل وقع متسابق ف بداية السباق ورجع له اتنين من المتسابقين لمساعدته على الوقوف واكملوا السباق مع بعض ووصلوا لحد النهاية سوا ولكن هما مجرد اتنين بس وباقي المتسابقين اكملوا السباق كأن شئ لم يكن

وبرغم اننا هانكون اقرب لتصديق القصه الاخيرة عن القصه الاولي وبرغم ان معظمنا هانقول ان دول اتنين من ذوي الاحتياجات الخاصه وكمان مش كل المجموعه وان القصور العقلي هو اللي بيدفع متحدي الاعاقه للتعامل بصورة طفوليه والنظر للعالم نظرة المتفائل لكن اللي بيقول كده بيناقض كلامه اكتر من انه يثبت وجهه نظرة لان تنظيم مسابقه للاوليمبياد الخاص من الاساس امر متعب وشاق ومش مجرد يوم اجتماعي لتعارف فئة من البشر لها امكانيات محدودة لاشخاص عندها بعض تأخر ف الاتيعاب او حتى اعطاء فرصه الجري لشخص عنده رجل او ايد واحده لكن المسابقات دي مسابقات لها تنظيم عالي وبتتاخد على محمل الجد من كل القائمين على التنظيم والمشتركين فيها كل واحد بيعمل اللي يقدر عليه على امل ان ربنا يوفقه و يتوج تعبه بالفوز

وعلشان كده اللي لازم ناخد بالنا منه انه فيه ناس بغض النظر عن اي اعتبارات تانية اتصرفت بطريقه عفوية واتخلت عن احلامها لاثبات ذاتها والوصول للقمة ف سبيل تقديم المساعدة لشخص قد لاتربطهم بيه اي علاقه

القسم بتاع الاوليمبياد الخاص بيقول " دعوني أفوز ولكن ان لم استطيع الفوز فدعوني اكون شجاعا ف المحاولة"

اللي كنت عايز اوصله من القصه دي انه بمناسبة قرب دخول رمضان ياريت كل واحد مننا نتعلم من الناس دي اننا نحاول على اد ما نقدر نساعد بعض ونعيش رمضان زي ماربنا عايز ونكون مع بعض مش بس نعمل لنفسنا بس علشان مش المهم اننا نفوز بس لكن الاهم اننا نساعد اللي حوالينا ف الفوز وده ف حد ذاته يعتبر فوز لينا

رمضــــــــــــان كريــــــــــــــــم وكل عام وانتم الى الله اقرب وعلى طاعته أدوم

ياتري هافضل موجود ؟

2009-03-14T13:23:00.001+02:00

وبتقع حبات العنب من عنقودها واحدة ورا واحدة

وخايف مش الاقي غيري على فرع الشجر

وساعتها مش هايكون بقائي بأختياري

تهييس بن هلفطه آل اي كلام

2009-02-24T12:44:00.001+02:00

المفتش كورمبو كسل اوي وبقى يجيب فوازير اعبط من الاول بعد ما جاله سحس بومب يساعده لانه حس بنفسه لما لقى اللي معاه اغبى من السمك
اشمعنى السمك؟
لانه وبرغم ان الناس بتصطاده من آلاف السنين مش اتعلم ولسه لحد دلوقت برضه بياكل الطعم
مش بقولكم غبــــــــــــــــي

نور ومهند اخدوا كل الشهرة بتاعه المسلسلات التركيه اللي غزت مصر فجأه واشتهروا اكتر من ريدج وكلارك لما جم مصر وعملوا اعلان ماربيلا بتاع الشعر وانا باحب منصور اوبل
يمكن علشان من الرواد
مع ان المسلسل اللي شغال دلوقت عامل صداع ف بيتنا وبيستنوه اكتر مابيستنوني لما ارجع من السفر
اصل اللي فهمته ان انور بيك بينافس كرم بيك برضه على حب شهرزاد بيكه
اللي يغيظ بقى ان الواد كينان ابنها مش فارقه معاه امه تتجوز مين
- مبدأ انها تتجوز اصلا تاني الكلام فيه عندنا يطير فيها رقاب -
المهم امه تبقى مبسوطة وكمان الست الدادة بتاعته شاغلاله كل وقته
بس الواحد خايف الواد يلقط منها طريقه الكلام ويبقى خواجه ويكلم الرجاله والستات بصيغه المذكر
بس زي ماعنوان المسلسل بيقول كله بيروح
ويبقى الحب

قرد موبينيل بعد ماسافر اعارة لجمهورية شونبونجو رفض العودة مصر تاني
ماهو برضه عنده حق الراجل بيعاملوه معاملة الملوك وممسكينه وزارة تعليم هناك مش ف مصر اللي حبسينوه ف قفص وبيجيبوا العيال يرموة بقشر السوداني بعد ماياكلوه هما

سيد ابو حفيظة بتاع نشرة الخامسة والعشرون شخصيه مصريه صميمة
مش سهل ان لم يكن مستحيل نلاقي حد ليه الهيئة المميزة دي الا لو كان مصري ابن مصري
وابن مصر ايـــــــه؟
برافو
ابن مصر عامل كاريه وغاسل ايديه
بس السؤال اللي بيشغل بال الناس كلها
فين البطيخة اللي ف الايد اليمين والجورنال اللي ف الايد الشمال
ولا هو بيشتغلنا وعامل فيها مصري
عايزين تعرفوا الاجابة؟

تابعونـــــــــــا

سمعتوا اظرف خبر : والله امي ندهيتلي بفرحه مش حسيتها ف صوتها من ايام ما الاهلي رفض احتراف ابوتريكة وقالتلي اقرا الخبر ده والله انا كنت واثقه انهم هاينصفوكوا

وخللوا بالكوا من الجمع للمجهول ده ابص الاقي
لكل اعسر لا تحزن فقد اثبتت الدراسات انك انسان طبيعي " الاهرام"
الحمد لله انا طلعت انسان اساسا

بينما يغني تامر حسني بأغنيته المتصدرة مبيعات شارعي شهاب وتقاطع محيي الدين ابو العز ونادي الصيد
" افتكرلي اي حاجة كانت حلوة مني"
مش لقيت اي حاجة تخليني أحقق أمنيته
سامحني ماشفتش منك يوم حلو
الهي ما يرجعها أيام
ويالا غور بقى

اما وانا باستمع واستمتع باغنية العملاق الهادي الراسي موسيقار الاجيال " قالولي هان الود عليه " مش صدقتهم وهما بيأكدولي الخبر وبيقنعوني التفت لمستقبلي اللي بيضيع فقلتلهم كفايه حرام عليكوا مش تشوهوا الصورة الحلوة دي
وأرد عليهم نفس رده بتلقائية
اطمنوا
"هو افتكرني عشان ينساني ؟

وده معاد جايزة البوست
لكل واحد وصل لحد هنا احب اقوله انت بطل احسن من صابر ايوب بتاع اتصالات

وعلشان كده لازم اكافئك علشان تيجي تاني

والنبي تبقى تيجي الله يكرمك

يقعدلك ف عينك وبلوجك وعافيتك
شوية كتب هايعجبوكوا جدا
وعد

"ScHiZoPhReNiAt"

2009-01-30T20:08:00.000+02:00

اخوكو مش مجنون لكني مش عاقل
اكيد مانيش عربيد لكني مش فاضل
وحالي ماهوش مظبوط لكنه مش مايل
انا مهتم جدا لكني مش سائل

وكأن شئ لم يكن

2009-01-14T20:46:00.001+02:00

لقاء الملائكة

2008-11-15T00:00:00.003+02:00

كان مرة فيه ولد صغير بيقضي كل وقته انه يحلم

وف مرة كان حلمه انه يقابل ملاك من الملايكة اللي بيسمع عنهم على طول

وف لحظة قرر انه يروح للمكان اللي بيعيش فيه الملايكة ولانه عارف ان الملايكة مكانهم بعيد عنه اوي قرر انه يستعد للرحلة الطويلة
جاب شنطة المدرسة وملاها ساندوتشات وكيك وعصير وبدأ رحلته
فضل ماشي واول ما تعب بص لقى محطة و لقى واحده ست كبيرة ف السن قاعدة على محطة الاتوبيس بتتفرج على الناس والعربيات.

الولد قام قاعد جنبها وقام فاتح شنطتة ومطلع علبة عصير وكان هايشربها لما التفت للست اللي قاعدة جنبه وفكر ان شكلها تعبان وممكن تكون جعانة فقام مطلع ساندوتش من الشنطة ومد ايده للست

فالست مدت ايدها واخدت الساندوتش وشكرته بابتسامه
الابتسامة بتاعه الست كانت من الحلاوة للدرجة اللي خلت الولد يتمنى يشوف الست دي بتبتسم مرة تانية

فقام مادد ايده مرة تانية جوة الشنطة ومطلع علبة عصير ومديها للست اللي تاني اخدتها منه وابتسمتله ابتسامة تانية حس الولد معاها انها يمكن احسن من الاولانية وكان ف منتهى السعادة
فضل الولد والست الكبيرة قاعدين ياكلوا ويشربوا اكتر من 3 ساعات من غير مايقولوا كلمة لحد ما الدنيا بدأت تضلم

وهنا حس الولد انه اتاخر وانه محتاج يروح يرتاح
قام الولد وحط شنطته على ضهره ويادوب مشي هما خمس خطوات قام واقف ومتدور ورجع جري للست الكبيرة وقام حاضنها اوي فالست ضحكت ف وشه وابتسمت احلى ابتسامة ف الدنيا بالنسبة له
الولد رجع البيت ومامته شافته فاستغربت من حالة السعادة والرضا اللي ماليه وشه فسألته ايه حصله النهاردة خلاه ينبسط ويفرح اوي كده؟
الولد رد بكل تلقائية: اصلي اتغديت مع واحد من الملايكة النهاردة
وحتى قبل ما مامته تظهر استغراب من كلامه قام قايل : بس تعرفي الملايكة دول بيبتسموا احلى ابتسامة ف الدنيا كلها
وف نفس الوقت ف مكان تاني كانت الست الكبيرة رجعت لبيتها ماليها نفس احساس السعادة والرضا اللي عند الولد لدرجة ان ابنها اندهش جدا من حالة الفرح اللي والدته كانت عليها فسألها : ايه اللي مخليكي فرحانة اوي كده النهاردة يا ماما؟
وبنفس تلقائية رد الولد على مامته ردت الست على ابنها : اصلي اكلت النهاردة مع واحد من الملايكة
وقبل ما تستنى رد ابنها كملت كلامها وقالت : بس تعرف انا كنت متوقعه الملايكة اكبر من كده بكتير

Too often we underestimate the power of a touch, a smile, a kind word, a listening ear, an honest compliment, or the smallest act of caring; all of which have the potential to turn a life around.

الناس بتدخل حياتنا لسبب معين مع اختلافه لكن لازم لوجودهم ف حياتنا سبب وممكن يكون وجودهم لفترة صغيرة او لباقي عمرنا
فمش تضمن وجود حد طول الوقت واغتنم الفرصه وافرح بوجودك معاهم طالما هما موجودين معاك

الحدوتة بتاعة

Julie A. Manhan

النسبية من منظور اخر

2008-10-18T00:14:00.003+02:00

شدني جدا سؤال كان مكتوب ف مجلة مجهولة الغلاف ولا يمكن الاستدلال عن اسمها

ولا عارف بتاعة مين ولا بتقول ايه
كانت مجرد ورقة مقطوعة ومرمية باهمال ف الارض بعد ما تقريبا اتمسح بيها شوية زيت وقعوا من طبق فول كان حد بيتسحر بيه امبارح ف الشغل وجة الحظ انها تقع تحت عيني ف وقت كنت فيه حاسس بقمة الملل ومش لاقي حاجة اعملها
السؤال بقى بيقول : علل
وضح من وجهه نظرك العقيمة ايه اعظم اكتشاف عرفته البشرية؟
ايوة قال العقيمة وانا هاجيب حاجة من بيتنا
فانا قمت مترجم السؤال للغة العربية بتاعتنا علشان اقدر افهمه وبعدها سألت نفسي لو حد سألك السؤال ده كان هايبقى ايه ردك ساعتها يا ابو العريف؟
وبرغم انه سؤال شكله يخض فاكيد الانطباع الاول عنه هايكون حاجة من اتنين مالهمش تالت
يا اما هاتعتبرة سؤال رخم الغرض منه احراجك واظهارك ف صورة وحشة هي اصلا صورتك الحقيقية لو انت من الناس اللي معلوماتها العامة بعافية شوية لانك بكل بساطة مش هاتكون عارف يعني ايه كلمة اكتشاف اساسا علشان تقدر تعرف اعظمها
يا اما هاتعتبرة فرصة عظيمة للتعريف بقيمة معلوماتك لو انت من هواة المنظرة وهاتختار اكتشاف مش فيه حد سمع عنه غيرك او ممكن مش يكون اكتشفوه من الاصل وتفضل تعيد وتزيد ف السبب اللي خلاك اخترته من دون كل الاكتشافات علشان تبين ان حضرتك عملاق المعرفة والمبحر ف كنوز العلم المجهول
وعلى الرغم ان السؤال كان ليه ردين مالهمش تالت
انا بقى لقيتني بأرد الرد التالت اللي كنت فاكره مش موجود بس الصراحة دخل دماغي جدا مع انه المفروض يكون الرد اللي ينط ف دماغ اي حد يتسأل السؤال ده وساعتها حسيت باحساس اجمل من احساس عبدالحميد ارسطو فيلسوف السبتية لما اختاروه حكم ف الماتش النهائي ف الدورة الرمضانية
قلت ايه حضرتي بقى ؟

قلت ان الموضوع نسبي
بمعنى ان كل واحد هايختار اكتشاف استفاد بيه بطريقة او باخرى ويقول علية اعظم اكتشاف ف الدنيا من غيرة كان ميزان الطبيعة هايختل
يعني الانسان القديم هايعتبر النار اعظم اكتشاف علشان بعد ما كان بياكل اللحمة نية بقى ياكلها نص سوى

ومريض السكر هايقول ان الانسولين ده اعظم اكتشاف

والقبطان هايقول انه قانون الطفو هو اعظم اكتشاف علشان من وراه بيسترزق ويعمله كام نقله بالمركب بتاعه ويرجع ف اخر الليل معاه عشين جنية ونص كيلو لحمة

وتامر حسني هايقول انه شريط الكاسيت

ونادية الجندي هاتقول عمليات التجميل وهكذا
طبعا سامعكم ف نفس واحد بتقولوا : ايوة وبعدين طب فين الاجابة؟ ما اي حد هايقول كده. يعني انت بسلامتك جبت التايهة . ما احنا عارفين.
بصراحة اتحرجت من نفسي اوي وانا شايف صوابعكم اللي مش عايزة قطعها عمالة تشاور عليا وتقول : عبيط ده ولا ايه؟
حسيت اني عملت زي اللامؤاخذة الحمار اللي بيلف ف ساقية بيلف ويدور حوالين نفس النقطة مش جاب جديد
بس انا مقتنع بكده. ان الموضوع نسبي بس قعدت طبعا افكر ف اكتشاف انا عارفه علشان اقوله علشان مش يبقى منظري وحش قدام نفسي
يعني لحفظ اراقة دماء ماء الوجة بس
وقلت البترول هو اعظم اكتشاف علشان لقيتلي فية شغلانة اكل منها عيش بدل ما ابقى عواطلي
بس مش كانت الفكرة راضية تسيبني وفضلت مسيطرة عليا لحد ما اللمبة اللي فوق دماغي نورت دلالة على الاكتشاف الكبير
النسبية طلعت ف حد ذاتها اكتشاف
هيييييييييييييييييييييييه
ايوة والله بجد زي ما بقولكوا كده
يعني انا ف التمام الحمد لله واقدر بكل ثقة اطلع لكل واحد ضحك عليا فيكوا لساني وانا منشكح
يبقى بالنسبة ليا الجواب النهائي هو النسبية اعظم الاكتشافات
واحد رخم يقولي طب ايه اسبابك ودوافعك
يابن اللذينا يا بارد
بس ولو
على مين يا معلم ده انا الرخامة مشتقة من اسمي
النسبية دي حلت لنا مشاكل كتير جدا كنا ممكن نقع فيها وممكن بسببها حياتنا تضيع وحياة ناس تانية معانا
اديلكم مثال
واحدة بتقول لجوزها اول ما صحي من النوم: بتحبني اد اية يا ابو مرسي
طبعا ده سؤال لا ينم عن خير

الحاجة ام مرسي عايزة توقع الراجل ف الخية وهو مش ف وعية علشان تخلعه
كمان ده سؤال مالوش اجابة. يعني هايقولها ايه ؟ باحبك اوي . طب اوي دي كام كيلو ؟ يبقى باحبك جدا . و جدا دي اقسها بالمتر ولا بالميل؟
مشكلة مالهاش لازمة فعلا لكن جت النسبية وحلت الموضوع ف كلمتين
بتحبني اد اية ؟ من غير ما يفكر وبكل تلقائية يرد : باحبك آاااااااد الدنيا دي كلها.
يابن اللعيبة يا اينشتاين
الراجل نسب مقدار الحب اللي" المفروض " يحبه لمراته بحجم الدنيا
دلوقت الكرة ف ملعبها قوليلي الدنيا اد ايه اقولك باحبك اد ايه
بصراحة انا لقتني باصقف للراجل ودماغه
وبعدها لقيت المشاهد بتكر قدامي زي الخيط
لما حد صايع يحب يخوفك منه ويحب يوصلك انك هاتتعب معاه يقولك ايه؟

باستخدام النسبية برضه
يقولك انا صايع بحر . انت تعرف البحر اد اية ؟ اكيد لأ
لما تعجبك حاجة وتحب تبين مدى اعجابك ده تقول ايه ؟
دي جامدة اخر حاجة . لما توصل للاخر هاتعرف عاجباني اد ايه
لما تلاقي واحد ماشي ووشه سبعات وتمانيات وتسأله بكل براءة : الدنيا عاملة معاك ازاي ياعم الحاج؟
يقولك كلمة تلخص كل حياته : زي الزفت . الراجل ادهالك وش ومش محتاج تعرف حاجة تاني علشان يبان حاله ولو سألته سؤال تاني يبقى انت البعيد حمار
لما ام توصف لابنها العروسة اللي جايباها ليه تقوله : دي خدودها تفاح امريكاني
لما حد يقولك انه مستحمل البلاوي اللي بيشوفها يقولك: ده صابر صبر ايوب
لما حد يوصفلك واحد منكد عليه حياته وبيعامله بتكبر يقولك: ده متفرعن عليا " نسبة لفرعون "
لما حد يقولك انه فاهمك وانه حاسس انك بتستعبطه يقولك: انت فاكرني هندي
لما حد يحكيلك عن واحد ماشي يبهدل ف خلق الله ضرب وقلة قيمة تقوله: ليه هو هيركليز
لما حد بيعلن عن المنتج المصري يقولك : لا تقولي صيني ولا ياباني من صنع بلدنا ولو جيبته هاتجيلي تاني
يعني مش هايستحمل معاك يومين
داليا البحيري لما سألت خالد النبوي عن طموحاته الضايعة ف الفيلم
كان ايه الحوار؟
هي : واحلامك يا يوسف ؟
قالها ايه؟ ضاعت ؟ لأ . اتبخرت ؟ برده لأ
قالها : زي الهوا
لو قدرت هي تمسك الهوا هو هايقدر يحقق احلامه بس يبقى يقابلني بقى
دي فيروز بذات نفسها عملت كده
"شايف البحر شو كبير .. كبر البحر بحبك "
ياسلام عليكي . تطبيق رائع لاكتشاف اروع
انك تنسب حاجة مش قادر تعبر عن قيمتها الحقيقية لحاجة تانية معروفة ف المجمل فده انا شايفه قمة العبقرية
تصوروا الراجل اللي مراته سألته ده كان قعد يفكر ف مدى حبه وهانفترض انه بيحبها فعلا كان ممكن يكون ايه مصيرالمستقبل معاه هو وعياله من غير النسبية ده لو اعتبرنا ان مراته ست طيبه ومش هاتخلص عليه وقتي
لو الراجل اللي سألته عن احواله قعد يفكر ف اد ايه حياته وحشة مين كان هايحس باللي هو فيه من غير النسبية
مين كان هايستنى يسمع منه اساسا . وقيس على كده كل حاجة ف دنيتنا دي
رحمك الله يا اينشتاين

من غيرك الدنيا كانت هاتبقى سلطة

الجواب و عنوانه

2008-09-30T22:00:00.002+02:00

كعادتي كل سنة لازم اعيد عليكوا والعيدية السنة دي قصه زي السنة اللي فاتت المهم انها تعجبكوا

كل سنة وانتم طيبين

مشهد خارجي وهايبقى داخلي كمان شوية / صباح يوم عادي

اول حاجة عملتها منى اول ما النهار طلع انها راحت لصاحبتها وصديقه عمرها رشا بعد ما رشا كلمتها مكالمة قلقتها جدا وخلتها مش عرفت تنام

رشا كانت ف حالة صعبة جدا وبالعافيه قدرت تفهم منى من كلام صاحبتها انها واقعة ف مشكلة كبيرة مسيطرة عليها وبتمر بأزمة وانها محتاجة ليها جدا

رنت منى جرس الباب فتحت مامة رشا واول ما شافت منى راحت واخداها ف حضنهاو قالتلها الحقيني يا منى صاحبتك هاتموت مني

انا مش عارفة مالها من امبارح لقيناها رجعت من برة دخلت على اودتها وهما دقيقتين ولقينا هيستيريا البكا مسكتها وعمالة تصرخ وتكسر ف كل اللي قدامها

انا خايفة عليها جدا هي مش بتتكلم غير معاكي ارجوكي حاولي تعرفي مالها

مش فيه اي حاجة توصلنا للحالة دي
دي بنتي الوحيدة وبدأت مامت رشا تبكي فرق قلب منى للحالة اللي فيها صاحبتها و مامتها

فقالت ليها اطمني يا طنط ان شاء الله مش ماشية غير لما رشا تضحك تاني

كل حاجة هاتبقى تمام استأذنك انا داخلالها

دخلت منى على رشا ف الاوضه فاتخضت من منظرها

لقت المكان متدمر ومخدات متقطعة ومرايات مكسورة

الاوضه ف حالة دمار شامل

لكن الاكتر انها لقت صاحبتها ف ركن الاوضه ف حالة وحشة جدا ومنهارة تماما

منى اتصدمت من المنظر ومش قدرت تتمالك اعصابها وبدأت تعيط وهنا حست صاحبتها رشا ان منى موجودة ف الاوضة

وكأنها غريق ف وسط البحر لقي خشبة يتعلق عليها قامت جريت عليها واترمت ف حضنها وقعدوا الاتنين يعيطوا مع بعض

بعد فترة مش عارف اد ايه بصت منى ف وش صاحبتها وقالتلها ليه كل ده هو فيه حاجة تستاهل ان الجمال ده كله يعمل ف نفسه كده

بصت رشا ف الارض بصة انكسار كانت ابلغ من اي رد

منى قلقت وبدأت تستجوب رشا

قوليلي انا اختك وكاتمة اسرارك احكيلي علشان لو انتي ف ورطة نقدر نفكر سوا وان شاء الله كله يتحل

ردت رشا : الا مشكلتي انا. انا اللي استاهل

انا اللي امنت له وحبيته رغم الفوارق الكبيرة بينا واللي كل الناس كانت شايفاها الا انا وتبدأ ف العياط مرة تانية

منى بترد بريبة : تقصدي سي زفت كريم

عمل ايه تاني

اوعي يكون حصل منه حاجة

لو زعلك انا اقطعلك رقبته

رشا تعيط بصوت اعلى من غير ما ترد

تتضايق منى وتمسك رشا بعصبية وتقول ردي عليا عمل ايه الحيوان ده

رشا بصوت مش مسموع من كتر العياط : قعد يضحك عليا بكلامة ويوهمني لحد ما اخد اغلى حاجة عندي

تخبط منى بايدها على صدرها وتقول يانهار اسود

انتي اكيد اتجننتي ازاي ده حصل

ترد عليها رشا ارجوكي انا باتقطع مش طايقه انا مش قادرة اصدق ازاي قدر يضحك عليا

منى تصرخ فيها : هو انا لسه قلت حاجة انت دماغك كانت فين لما ده حصل ازاي

رشا وسط البكا : ياريتني ما شفته ياريتني ماعرفته

استغل حبي ليه واني مش بارفضله طلب وقام عمل عملته

منى بعصبية : وفين سي زفت ده دلوقت طبعا بيتهرب منك

انا مش قادرة افهم ازاي مش اتعلمتي من كل الافلام والمسلسلات اللي بنشوفها

رشا تبص لصاحبتها وتمسح دموعها فتبان لمعة غريبة ف بصتها كأنها افتكرت حاجة مهمه : هاييجي غصب عنه اصله مش اخد كل حاجة

منى : انتي عبيطة يا بنتي مين اللي يجي ده هو عايز ايه تاني منك

رشا بفرحة : اصله اخده من غير الشاحن

منى وعلامات البلاهه على وشها: شاحن ؟؟؟!!!! هو كريم اخد ايه بالظبط ؟

رشا بكل اسى وانكسار : اخد الاي بوود بتاعي

!!!!!!!!!!!

الخلاصة :

لو كنت فاكر انك بتفهمها وهي طايرة

فمش بالضرورة تكون بتفهمها قبل ما تطير

استناها لحد ما تطير

لحسن تفهمها غلط

او تكتشف انها مش بتطير اساسا

*منفذ الى الجنة

2008-09-18T01:48:00.000+02:00

الحكاية دي حكاية راجلين كانوا بيتعالجوا ف نفس المستشفى وكمان كانوا قاعدين مع بعض ف نفس الاوضه واحد منهم كان مريض بمرض مياة على الرئة وكجزء من العلاج كان كل يوم لازم يقعد بعد الضهر لمدة ساعة علشان تصريف السوائل الموجودة على الرئه

الراجل ده كان السرير بتاعه جنب الشباك الوحيد اللي ف الاوضه

التاني كان ف الناحية التانية من الاوضة وكان مش مسموح له حتى انه يحرك دماغه لكن كان دايما نايم على ضهره وباصص لسقف الاوضه طول الوقت

الاتنين اتعرفوا على بعض وكان كل وقتهم وهما صاحيين بين العلاج والكلام مع بعض

اتكلموا مع بعض عن كل حاجة

البيت والعيله ووظايفهم واصحابهم وشغلهم وحتى ذكريات الطفولة والدراسه وفترة التجنيد حتى ايام الاجازات كانوا بيحكوا لبعض كانوا بيقضوها ازاي

كل يوم بعد صلاة العصر بالظبط على طول الراجل اللي قاعد جنب الشباك كان يتعدل ف مكانه ويقعد لمدة ساعة زي ما الدكتور قال

كان بيفضل طول الساعة دي يحكي لصاحبه ف الناحية التانية من الاوضه على كل حاجة هو شايفها من الشباك

لدرجة ان الراجل اللي قاعد ف اخر الاوضه بقى يستنى الساعه دي بفارغ الصبر

ده كان الوقت الوحيد الي كان بيحسسه انه لسه عايش ف الدنيا

كان الراجل يقعد جنب الشباك اللي كان موجود ويحكي لصاحبه على الجنينة اللي بيطل عليها الشباك

بيحكيله انها كانت جنينة كبيرة وفيها بحيرة بط ف النص بيلفوا جواها والاطفال اللي بيلعبوا على المراجيح وراكبين مراكب والشباب اللي ماشيين ماسكين ايد بعض ومشبكينها وماشيين وسط الورد اللي على كل لون وشكل

كل ده وراه منظر السما الصافيه بيكمل صورة ربنا ابدعها

كان كل ما الراجل اللي جنب الشباك يوصف حاجة صاحبه ف اخر الاوضه يغمض عينيه ويتخيل كل حاجة بتتوصف له وكأنه بيتفرج على فيلم سينما

كل يوم الراجل جنب الشباك يوصف حاجة جديدة بتحصل بره المستشفى ومهما كانت الحاجة اللي بيوصفها كان الراجل ف اخر الاوضه بيعمل نفس الحاجة

يغمض عينيه ويعيش كل كلمة وكل صورة بيوصفها الراجل جنب الشباك

مش بقى محتاج انه يبص على الشباك صاحبه بينقله كل حاجة بتحصل وهو يغمض عينيه ويشوفها بتحصل قدامه

مرت الايام والاسابيع وكل يوم بعد صلاه العصر بالظبط يبدأ الراجل جنب الشباك يوصف لصاحبه اللي بيحصل بره الشباك

وف يوم قبل العصر بالظبط دخلت الممرضه عليهم علشان تديهم الدوا لقت الراجل جنب الشباك نايم وعلى وشه احلى ابتسامة ف الدنيا وقد فارقته الحياه

مات الراجل جنب الشباك وزعل عليه كل الناس خصوصا صاحبه اللي سابه لوحده

الراجل ف اخر الاوضه

عدت الايام ممله بطيئة وف يوم طلب الراجل ف اخر الاوضه من الممرضة انه ينتقل مكان صاحبة المرحوم

الممرضه وافقت وف ساعتها بدأت تنقل الراجل الممدد على سريره من مكانه لمكان صاحبة

ف الجانب التاني من الاوضه وبعد ما اتاكدت ان الراجل مرتاح ف مكانه الجديد ودعته وسابته لوحده

اول حاجة عملها الراجل بعد ماسابته الممرضه انه حاول يتحرك

حاول ببطء وبكل الالم والتعب استجمع لراجل قواه رغم الخطورة اللي ممكن يتعرضلها ومال على جنبة اليمين لاول مرة من زمان علشان ياخد اول نظرة من فترة طويله على العالم اللي موجود بره الاوضه وببطء شديد رفع عينة علشان يبص على الشباك

اتفاجأ جدا لما لقى قدامة حيطة مش عليها اي حاجة حتى لو صورة

نادى على الممرضة وقالها انه مش عايز يكون ف المكان ده هو عايز يبقى مكان زميله اللي كان بيوصفله كل يوم اروع المناظر اللي بيشوفها

عايز يكون جنب الشباك

ابتسمت الممرضة وقالتله ان هو ده مكان زميله

بس اصلا زميله كان لا يمكن يعرف ان فيه شباك على الحيطة حتى لو موجود علشان كان كفيف

وكملت كلامها وقالتله

هو يمكن كان بس بيحاول يسليك

* البوست كان قصة انجليزي قريتها وعجبتني فحاولت اترجمها واحطها يمكن تعجب حد تاني

احلى طعم للسعادة بتديهولنا الدنيا بيكون لما نخللي اللي حوالينا سعدا مهما كان احساسنا اللي بنمر بيه

لو عايز تحس انك تملك الدنيا كلها فكر ف الحاجات اللي ربنا انعم بيها عليك ومش كنت تقدر مهما كنت تملك انك تشتريها

استمتع بيومك على اد ما تقدر وعيش النهاردة بكل طاقتك علشان بكرة لسه مش موجود

رباعيات الا ربع

2008-08-24T00:09:00.003+03:00

انا لما بافرح باضحك من جوة قلبي
ولما ازعل بيتفرش بالحزن دربي
هو الناس مش عايزة زعل ولا ايه
طب كيف اخلي ساعتها وشي يخبي

مش عجبي

من خمستااااشر سنه كان انا وكنت هو

2008-07-15T14:44:00.006+03:00

بعد اسبوع عصيب من الشغل جت الفرصة اني انزل البلد
والشواطئ مليانة بشر لكن اخيرا شفت ناس بهدوم طبيعية مش اوفرولات
محتاج اقعد على البحر جدا بس طبعا الناس محتلة المساحة كلها يادوب بس شايف البحر من بعيد بس طبعا ريحة البحر مالية الجو وده المهم بالنسبة لي
انا احساس البحر بيوصلي من الريحة
من بعيد لمحت ولد صغير يعني تقريبا يدي بالكتير عشر سنين
علق معايا اوي ولقتني مركز معاه جدا وحتى فصلت عن باقي اللي بيحصل حواليه
اشمعنى ده بالذات اللي يلفت نظري جامد كده
يعني هو ولد عادي مش امور زيادة مثلا ولا اصلا اعرف دمه خفيف مثلا ولا فيه حاجة مميزة تلفت النظر للدرجة بس انا حسيت اول ما شفته بحاجة غريبة
ركزت شوية وشغلت الذاكرة
ايوه اهو بدأت افتكر
انا شفت الولد ده قبل كده بس فيييييين؟؟
عيني لسه عليه مراقباه وهو عمال يضحك ويتنطط ويلعب ف المية وهو راكب العوامة بتاعته وبيشاور لاخوة الصغير انه يجمد قلبه ويلمس المية
ماشاء الله بيضحك من قلبه شفت سنته وهي بتلمع لما الشمس وقعت عليها تمام زي ما باشوف ف افلام الكرتون
قعدت اراقبة طووول اليوم وهو بيلعب ف المية وهو بيبني بيت على الرمل وهو بيلعب كورة مع اخوة الصغير وهو بياكل الساندوتشات اللي مامته عاملاها وهو بيجيب ايس كريم
من الاخر قضيت النهار كله باتفرج عليه ومش سيبته غير وهو بيلبس هدومة علشان ماشيين
ساعتها بس افتكرت انا شفت الولد ده فين
او بمعنى اصح ليه الولد ده دون باقي الناس علق معايا كده
الولد ده هو انا
قبل 15 سنه بالظبط انا كان شكلي كده بالمللي
كنت باتصرف كده بالمللي

كنت باعمل كده بالمللي
كنت باشبهه بدرجة مش طبيعية
كنت زيه بطريقه مش تتصدق او انا اللي حسيت كده
وانا ف سنه كده كنت برضه باضحك من قلبي

وانا ف سنه كنت باعيش الدنيا كانها الجنة
نفس الروح ونفس الحياة ونفس التصرفات البريئة
وبدأت افكر
امال انا ايه اللي حصللي
ازاي ف عشر سنين بس اتحول للنقيض كده
ازااي اتحولت لحد تاني غير الولد الطيوب اللذيذ اللي بيضحك من قلبه واللي مش بيحسب حساب اي حاجة غير انه يستمتع بكل لحظة تفوت عليه ومش يقرر غير انه يفرح بكل لحظة ويعمل كل حاجة توصله للحالة دي
يمكن الولد ده لسه كده علشان لسه مش كبر ولسه مش عاش ف الدنيا ولا شاف ولا قابل ولا اتعامل مع حاجات تضايقه وتتعبه
ساعتها قلبي وجعني
معقول الولد ده لما يبقى ف سني هايبقى زيي كده
لا طبعا يارب لأ
انا مش اتمناله انه يبقى زيي بعد مايكبر
اتمنى انه يفضل كده على طول تفضل ضحكتة ماليه وشه وتفضل نظرته للدنيا انها هي السعادة وان كل وقت بيمر عليه لازم يعيشه ويعمل اللي يقدر عليه علشان يفرح
لقيتني بدون وعي رحت ناحيته وضحكت جدا ف وشه ومديت ليه ايدي فالولد استغرب بس سلم عليا قمت قلتله على طول
انا عايزك توعدني انك تفضل زي مانت كده على طول

عايز ضحكتك تفضل ماليه وشك مهما حصل وعايزك دايما فرحان مهما حصل

عايزك تشكر ربنا دايما على اي حاجة تحصلك
الولد استغرب اوي وقاللي هو حضرتك مين
قلتله: انا ؟
انا انت كمان 15 سنه لو مش عملت اللي قلتلك عليه
طبعا الولد مش فهم حاجة المهم انا كملت كلامي وقلتله صدقني انت مش هاتحب تكون انا بعد 15 سنه من دلوقت
واديته ضهري ومشيت وانا بادعيلة من كل قلبي انه مش يبقى كده

مش يبقى زيي كمان 15 سنه

مواقف متفرقة

2008-06-23T09:10:00.011+03:00

ايه يا توما رأيك ف الطقم ده ؟

يابن اللذينا . اية اللون ده ؟ ده انت بس ناقصلك بقصماتاية

اشمعنى ؟

وتبقى كوباية شاي بلبن

ايه يابني فينك ؟

حتوووووووم . والله مفحوت ف الشقة . بأعمل النور

طب ربنا معاك يا كوتش اشوفك قريبا

ايه يابني ندالة الشراقوة دي مافيش حتى أي مساعدة لاخوك الغلبان

بص انا الحاجة الوحيدة اللي اعرفها ف النور اني اتكهرب

سلام يا مان ابقى خلينا نشوفك

ان شاء الله . انت ساكن فين

مش هاتوه انزل شبرا النملة واسأل على مصطفى الف مين يدلك

لا ياعم انا مش هاقدر

ليه بس !!!؟؟؟؟

اصلي من عيلة بايجون

باقولك ايه

قول مانا عارفك حقنة

ماتعرفش الاوبرا بكام ؟

لا انا باستعمل ..... امممم

نمشيها هيركود

علشان الرقابة

ابقوا استحملوا بقى

2008-06-22T11:21:00.003+03:00

هرتلة ف حب البلكونة

2008-06-16T01:46:00.007+03:00

بعد رجوعي من بره لقيتني داخل على البلكونة على طول حتى من غير ما اسلم على الموجودين

بقالي زمان مش دخلت البلكونة بتاعتنا. يمكن من اخر مرة محمد كان عندي ودخلنا وقفنا فيها شوية وقبل كده مش فاكر اخر مرة كانت امتى بس اكيد من زماااااااااااان جدا

ساعتها قالللي حلو اوي احساس البلكونة بتاعتكوا

عنده حق

انا باحب جدا اقعد ف البلكونة بتاعتنا فعلا

احط الكراسي قدام بعض وافرد رجل وامدد وابص لفوق واسرح

وانا بابص لفوق اعد ف النجوم والهوا بيخبط ف وشي ومع ذلك عمري ماعرفت اميز مجموعات النجوم

حاولت كتير اميز مجموعات النجوم اللي كنت باسمع عنها واقرا عنها ف الكتب

بلكونتنا احلى مافيها انها مش قريبة اوي من الارض فأشم ريحة التراب ولا عالية اوي فأدوخ وانا فيها

اصل انا اكتشفت ان عندي فوبيا الادوار العليا

من ايام شغلي القديم لما طلعت 40 متر من 60 ومش قدرت اكمل بعدها

ساعتها واجهوني بحقيقة مرضي

دانا شفت ايام ف الشغل ده ربنا مايرجعها ايام على رأي سواق التاكسي ف اعلان ميلودي

لكن للاسف فيها مشكلة

البلكونة طبعا

هي مش مشكلة البلكونة لكنها مشكلة شارع

شارعنا لا ينام طول اليوم

تسمع اصوات الناس والعربيات والكلكسات والزحمة مالية الدنيا

مش باحس اني ف بيتنا لكن ف سوق عكاظ

بس برضه باحب البلكونة

ده كفاية لما ارفع راسي وابص بعيد الاقي شعلة مصنع التكرير البعيد كأنها شمعة عيد الميلاد اللي منورة التورتة

حاسس براحة فظيعة دلوقت

غريبة اوي فعلا

دايما باحس براحة هنا

معقول مفعول البلكونة يكون كده

بس دي مش اي بلكونة دي بلكونة بيتنا

انا ليه مش بآجي هنا كتير

انا ليه مش بآجي هنا من زمان

مع اني اتخنقت قبل كده كتير جدا

طب انا ليه جيت هنا بعد زمان

طب انا ليه مرتاح دلوقت

يمكن علشان ممدد رجلي وسايب نفسي ومفضي دماغي وباصص للسما والهوا بيخبط ف وشي

هو ده صحيح الطقس المثالي بتاع البلكونة علشان تستمتع بيها

بس ايه ده

فين النجوم؟

فين القمر؟

انا مش هاعرف اميز النجوم دي بقى؟

فين السما؟

عينيا حصلها ايه؟

هو احنا النهاردة كام ف الشهر؟

لحظة تمنيت فيها ان اكون مش هنا

2008-06-15T00:31:00.003+03:00

ف اللحظة دي

ف الثانية دي

ف الدقيقة دي

ف الساعة دي

ف اليوم ده

مش عايز غير حاجة واحدة بس

ف الدنيا دي

انا عايز اعيش ف كوكب تاني

ولـــــــو" بقالها سنة"

2008-05-25T12:30:00.002+03:00

بقالي هنا سنة !!!!! مش مصدق بصراحة

عدى عليا ف بلوجر 365 يوم ... سنة اديتني خبرة ومعارف يكفوني 30 سنة

كنت سمعت مقولة عجبتني جدا واقتنعت بيها كانت بتقول :

من يكتب يعرض افكارة في طبق ليتذوقها الآخرين

فعلا انا ف بلوجر تذوقت اصناف والوان كتييير جدا من الافكار اللي كنت باستغرب ساعات كتير انها ممكن تكون موجودة وحد مقتنع بيها من الاساس

عرفت ناس كتير وعرفت حاجات كتير واتعلمت حاجات كتير واتغير عندي مفاهيم كتير

حبيت حاجات مش كنت باحبها وزهقت من حاجات كنت مدمن ليها

عرفت ناس كبيره ف السن لكن ليها تفكير عصري جدا وعرفت ناس اصغر مني لكن تفكيرهم سابق سنهم

عرفت ان الابداع والموهبة مش حكر على اللي بيدخلوا كليات نظرية لكن اكتشفت ان الكليات العمليه خصوصا هندسة وصيدلة كمان فيها ناس قمة ف الابداعوموهبة

عرفت ان الكليات النظريه مش فيها ناس دماغها فاضيه لكن معظمهم ناس بتهتم بمواضيع جدية ومهمة

عرفت ان مش كل البنات بتفكر ف الموضه ومنتظرة ابن الحلال وتفكيرهم سطحي لكن عرفت بنات دماغها توزن بلد

عرفت ان مش كل الولاد بيفكروا ف الكورة لكن عرفت اولاد رغم صغر سنهم لكنهم مهموين بقضايا مش ف دماغ رئيس جمهورية

عرفت ان مش كل الاخوان اعداء للبلد ومش متطرفين ومعاديين لأي فكرة تعارضهم لكن فيهم ناس كتير جدا قمة ف حب الوطن والديموقراطية ورجاحة العقل

عرفت ان مش علشان مش هاتسمع يبقى اسكت لكن اتكلم زي ماناس كتير عملت وفعلا عملوا فرق

عرفت ناس عايشه ف احلام وردية وعايزة الدنيا تبقى احسن وعرفت ناس واقعية بتدعو لتغيير حياتنا وترك سلبياتنا

عرفت ان كل ناس بلدنا بتحب بلدنا

عرفت ناس الواحد يفخر انه يقول انه مصري علشان يرتبط معاهم باي صلة حتى لو كانت فقط الجنسية

عرفت ناس قمة ف الرزانة وعرفت ناس قمة ف خفة الدم والانطلاق

عرفت ناس بتحب الدنيا اوي بس مش بتغرها وعرفت ناس بتحب ربنا اوي وبرضه بتتمتع بدنيتها

انا باشكر كل واحد قريتله كلمة عجبتني انه حببني ف بلدي وخلاني فخور ان فيها ناس ماشاء الله

وباشكر كل حد عدى من هنا واداني دقيقة من وقته وبادعي ان يكون كل حد عدى من هنا مش حس ان وقته ضاع بدون استفادة فلو مش كان عجبه البلوج فيارب مش يكون كرهه

سعيد جدا بمعرفة كل حد فيكوا

بوست جديد

الصاحب الصاحب والصاحب المعرفة

2008-05-25T12:24:00.000+03:00

واحد صاحبي سألني مرة : ايه الفرق بين الصاحب الصاحب والصاحب المعرفة؟

انا بصراحة استغربت السؤال بس حاولت ابان بمظهر الشاب العالم ببواطن الامور فقلت: ايه العبط ده ؟

معروف ان الصاحب الصاحب : صاحب والصاحب المعرفة : معرفة

طبعا ضحكنا بعد ما قلت الكلمتين دول وبعد ما قالي :الله ينور عليك نورت المحكمة حبس 10 سنين مع الشغل

قاللي : طب بطريقة تانية ايه الفرق بين ( س ) وبينك ؟

انا قلتله : عروستي !!!!

وبعد ما زهق مني ومن انه ممكن يلاقي عندي الاجابة قاللي درس عمري

فرق كبير بين ان يكون ليك واحد ممكن تقول عليه صاحبي بكل ما تحمله الكلمة من معنى وبين واحد تعرفه بس بتقول عليه صاحبي

الصاحب المعرفة ده حد انت فعلا تعرفه. تعرف اسمه وعنوانه وبتشوفه من وقت للتاني وممكن تلاقي ان فيه حاجات كتير بينكوا مشتركة شخص بيرتاحلك وبترتاحله

طبعا انا لايمكن افوت فرصة زي دي فقلتله : ده احنا يابني . انت بتتكلم عننا . بس كل ده وبتقول :- معرفة !!!!

قاللي وملامحة اتغيرت وبصوت بقى هادي بطريقة مش طبيعية : للاسف صح ده احنا بس اسمع للاخر

ممكن يكون كل ده بيحصل فعلا لكنك بتكتشف ان صاحبك المعرفة ده مش بيشاركك حياتك . ساعات كتير مش بيفهم تصرفاتك وبيستغرب افعالك وتكتشف انه مش يعرف عنك اي حاجه خالص

لا بتحب ايه ولا بتكره ايه ولا بتعرف مين ولا عايش ازاي ولا بتفكر وتحس بايه

تكتشف انكوا بتعرفوا بعض بس من غير ما تعرفوا بعض

لو بصينا للناحية التانية على الصاحب الصاحب

فده حد بتحبه وبتهتم بيه وتفتكره حتى وهو بعيد ومش موجود

شخص بتأتمنه على حياتك واسرارك

ناس بتفتكرهم لما تشوف حاجه بيحبوها او حاجه كانت عاجباهم او حاجه ممكن تليق عليهم

كل ده تعرفه علشان انت عارفهم كويس . تعرف بيحبوا ايه وبيحسوا بأيه

ناس دايما ف بالك وبتفكر فيهم باستمرار

الصاحب الصاحب حد بتحس بالراحة لما تتكلم معاه وتدور عليه علشان تطمن على احواله ولما مش يبان يومين تحس بالقلق والخوف عليه لغايه ماتطمئن

علشان انت عايز تطمن وعلشان انت عارف ومتأكد ان ده هايكون نفس فعله ف حاله انقلب الوضع

ناس بتسأل عليك لمجرد انها تطمن مش علشان مصلحة او علشان ده واجب

ناس بتسأل علشان الاصحاب مش بيحتاجوا سبب يسألوا بيه على بعض

الصاحب الصاحب بيقولك الحقيقة بدون خجل او مواربة وعارف انك هاتتفهم وبيخاف عليك علشان عايزلك الاحسن

دايما موجود لما تحتاجه وبيسمعك من غيرماتطلبه وبيقولك على الصح بدون انتظار لمقابل

مش بيضحك عليك ولا بيستغلك ولا بيجرحك ولو عمل حاجه تضايقك بتكون من غير قصد ويفضل يحاول بكل الطرق بعدها انه يعوضك

حد بيحبك حب انت نفسك مش بتبقى حاسس اد ايه

الصاحب الصاحب بيبكي لبكاك وبيفرح لفرحك

اخر واحد ماشي ف الفرح واول واحد جاي ف الحزن

بيكون موجود لما الدنيا كلها مش موجودة

هو اللي بيوقفك عن الغلط وبيواجهك بأخطائك ويساعدك علشان تعالجها

هو اللي بيقف جنبك ويمدلك ايده يعلمك ويتعلم منك

الصاحب الصاحب هو الشخص اللي حياتك لا يمكن كانت تكون زي ماهي ف وجوده

طبعا انا ساعتها عرفت اني مش كنت بالنسبة له اكتر من واحد معرفة بس اتعلمت بعدها اني اكون مع اي حد اعرفه صاحب بجد

علشان كده انا بافخر اني اقول ان كل واحد فيكم بالنسبه لي

الصاحب الصاحب

اهلا اهلا بالصيف

2008-04-23T07:57:00.010+02:00

مع دخول فصل الصيف انا كمان بالاقيني داخل معاه ف حالة تأخر صيفي

ودي زي البيات الشتوي بس اصلي ممكن اتأخر لكن مش باحب البيات برة البيت

بيجيلي حالة من الاكتئاب والاحباط والكسل والخمول وعدم القدرة على التنفس والزهق وكل الصفات الرخمة دي

وتفضل الافكار السوداويه وحالات الشتت الفكري والانكماش النفسي تطل عليا من فوق دماغي مسببه ليا حالة من الضغط الرهيب على الجمجمة

وطبعا انا بسبب كده مش باعرف اعمل بالنصيحة الاخوية الي بتجيني من كل الناس وهي اني اكبر الجمجمة

وده ف النهاية بيؤدي بيا لحالات من الصمت الرهيب المصاحب لبلاهة من النوع المتأخر اللي مش ينفع معاها علاج

فتلاقيني ف النهاية متنح زي بورتيريه يمثل الانسان المعاصر ف ادنى مستوى ليه ناقص يتعلق على حيطة

او تمثال من تماثيل الجاهلية

ولاني باحاول اغير الجو العام اللي بيأثر على حاجات كتير ف حياتي

لاقيت عقلي الباطن بينادي عليا من بعيد وبيفكرني برباعيه من رباعيات صلاح جاهين تدعو للتأمل

وانا من مكاني احب اهديها لنفسي ولكل اللي بيمر بحالتي ولكل اللي حاطط ف جدول اعماله او خططه المستقبليه انه يكئب على نفسه خميس وجمعة ويصحى السبت كويس من بدايه الاسبوع

مع طبعا اهداء رقيق للصديق العزيز مقيد ولبابا وماما وجوز خالتي وسلسلة مطاعم هارديز وشارع طلعت حرب اللي عمرنا ما مشينا فيه انا وانتيمي الا واتخانقنا ومع ذلك لازم نمشي فيه

ربنا مش يقطعلنا عادة

وفي نهاية الفقرةاحب اسمع اغنيه حكيم الاغنية الافروصعيدية

لو ماكنتش انت تدلعني

هادور على حد تاني

مش هاستناك اكيد

و انا متأكد ان كل الناس مش هاتعمل بالكلام ده زي مانا هاعمل بالظبط

لكن اهو بنحاول

حاسب من الأحزان وحاسب لها

حاسب على رقابيك من حبلها

راح تنتهي ولابد راح تنتهي

مش انتهت أحزان من قبلها؟

على الهامش

احب اوجة اعتذار واجب لكل اصدقائي اللي بيعبروني وبيسألوا عليا من مدونين

انا اسف اني بقالي فترة مش بأرد على كومنتات ووالله كنت هابدأ ارجع ارد من البوست اللي فات

بس بصراحة لاقيت ان الكومنتات دماغها عالية اوي فمش عرفت اوصل للدماغ دي

اصلي طلعت ميه واحد وتمانين سم حسب اخر استطلاع للرأي اجرته محطه بي بي سي العربية

انا اسف هاتسامحوني ؟

انا مش طويل و...... انا قصير ... ولابلاش

على هامش تاني غير الاولاني

الصورة لاتمت ليا بصلة

ولا يؤخذ بيها ف برنامج ذهب ولم يعد

او عند استخراج شهادة اعفاء الخدمة العسكرية

ف ضهر البوست علشان مش لاقي هامش تاني

ابقوا

تعالوا

زوروني كل شهر مرة

حرام تنسوني بالمرة

تحديث مهم

اكتشفت اني للاسف اقصر كمان مما كنت متوقع

صديقي مقيد واجهني بحقيقتي المرعبة وهي اني لا اتجاوز ال 175 سم

ولذلك انا باعترف اني فعلا مش طويل ولا اهبل لكني قصير و...

ربنا يسامحك يا مقيد فوقتني من حلمي الجميل وهو اني اكون لاعب باسكت

بس عادي ممكن احول مسار واطلع بتاع بولينج

بيني وبينك يحكم الحاج اينشتاين

2008-03-27T15:41:00.002+02:00

كان دايما بيبقى فيه سؤال هو الشغل الشاغل ف حياتي وتكون كل حياتي متوقفة على إجابة السؤال ده

وطبعا الأسئلة دي درجات

تختلف صعوبتها باختلاف سني وقدرة عقلي على استيعاب الأشياء

فتطورت الاسئله من

هو ليه القمر ماشي ورايا ف كل حته كأنه بيراقبني وكل ما ابصله الاقيه بيبصلي ويضحك كأنه بيغيظني ويقولي مش هاتروح مني انا دايما وراك

وأزاي السما دي عاليه كده وليه إحنا مش بنطولها مهما جيبنا سلالم وحطناها فوق بعض

مرورا بازاي السفينة بتمشي على الميه مع إني لما حاولوا يعلموني العوم كنت هاغرق مع فارق الأوزان

وازاي الشيطان كان وسط الملايكة اللي ربنا أمرهم يسجدوا لسيدنا آدم مع انه من نار وهما من نور

و ازاي الناموس بيتقتل بصاعق الناموس واحنا ولا يجرالنا حاجه

وازاي لحد دلوقت مش قادرين يوصلوا لحل ف أزمة رغيف العيش

وازاي الناس لسه لغاية دلوقت بتحط فلوس بالملايين عند واحد بيديهم فايده اكبر من فايدة البنك اللي أصلا فيه شبه اجماع إنها حرام

وازاي الناس لغاية دلوقت بتدفع فلوس علشان تسافر ايطاليا

مع ان احتمال نجاحهم ف الوصول من الأساس لا تتعدى 10 %

بس اللي عرفته ان اي سؤال لازم يكون ليه إجابة

مش شرط ان الناس تعرفها

لكن أكيد الاجابه دي موجودة عند حد ما هايظهر ف وقت ما علشان يجاوب سؤال فضل يحير ناس كتير وقت كبير جدا

بس برده لازم يكون السؤال ده حوالين حاجه ماديه او معلومة

بمعني انه موضوع السفن ده كان هايبقى أسطورة لو قانون الطفو وموضوع مركز الثقل ده مش كانوا اكتشفوه وموضوع الناموس ده كان هايبقى لغز لو مش كانوا اكتشفوا ان كل حاجه ليها تردد معين لو لعبت فيه تقدر توصل انك تقضي على الحاجة دي

بس لو كان الموضوع نسبي اعتقد انه صعب جدا اننا نتوصل لاتفاق حواليه

زي ان الناس بتحاول تسافر لغايه دلوقت علشان هما هنا أصلا مش عايشين فحتى لو احتمال انه مش يوصل 90% فاحتمال انه يوصل ويكمل 10 % وده يكفيه بالنسبة لظروفه ومش بيعتبر ده انتحار زي ما كتير ممكن يقولوا

انا بقى السؤال اللي مسيطر عليا دلوقت من النوع النسبي
وعشان كده كل ما أتكلم مع حد فيه الاقي رأي مختلف عن اللي قبله

وفيه كتير جدا آراء مقنعة مع الاختلاف الشديد بينها وبين بعض

لكن هو ده السمة اللي بتخلي الموضوع نسبي

أنا لسه لحد دلوقت مش قلت على السؤال اللي محيرني لكن هو ده نفسه السؤال

ازاي يكون فيه موضوع شاغل بال حد لدرجه ممكن تدفعه للجنون ويعتقد ان حياته كلها متوقفة على حل السؤال ده في حين انه عند حد تاني موضوع هايف جدا وممكن يتهمك بالسطحية والرفاهية الزايدة

لدرجة انك تفكر ف موضوع تافه زي ده

واقتبس هنا جمل بالنص من صاحبي الانتيم مع ان ده الحاله اللي بيمر بيها :

" فين ده من قضيه فلسطين واللي بيحصل ف العراق وأزمة رغيف العيش والأم المثالية اللي جت ف العاشرة مساءا وكانت حالتها تقطع القلب"

كل ده صح لكن أنا بالنسبة ليا

الإجابة عن أسئلتي أهم ملايين المرات من كل اللي فات

علشان بسهولة جدا انا لو فضلت على الحال اللي انا فيه مش هاقدر أحس بكل اللي بيحصل من حواليا

لاني مش عارف الاقي نفسي

فازاي واحد مش لاقي نفسه يروح يدور على حاجه تانيه

انا ممكن تكون اجابتي سطحية بالفعل

بس ده اقتناعي

انا لو مش لقيت حل لأزماتي الشخصية مش هاقدر من الأصل احس ان فيه أزمات عامة بتدور حواليا

وف النهاية أنا قلت من الأول ان الموضوع ف الأول وف الاخر

نسبــــــــــي

من أجلك أحببت نفسي

2008-03-03T00:28:00.003+02:00

لطالما كنت في شدة السخط على هذا الكائن المسمى

" أنا "

كنت أراني شخص لا يعلم سبب وجوده ف هذه الحياة
شخص لا يستحق التواجد على هذه الأرض

وجئتي انتي

فصححتي لي مفاهيمي

علمتيني ان اقّدر وجودي
اخبرتيني اني شخص فريد

وبدوني

يختل العالم

بدوني ستصبح هناك حلقه مفقوده في نظام الخليقة
حياه مفقودة

يفتقدها أفراد عائلتي
صديق مفقود

يُبحث عنه داخل دائرة اصدقائي
دور مفقود

لم يتم أدائه داخل هذا العالم

علمتيني ان اقّدر تفرُدي
ان وجودي هبة من الله اعطاها لي وحدي
فلابد لي ان اقوم بدوري الذي رسمه الله لي
فبدوني

سيختل نظام الكون
ولكل هذه الاسباب

احببت نفسي
من أجلك انتي احببت نفسي

for all what you did, thank you

2008-02-27T02:38:00.004+02:00

عمر حد فيكم حس انه حاسس بالشكر والامتنان لحد؟
اكيد كلنا

طب وده سؤال
طب عمر حد فيكم حس بالشكر والامتنان لحد يعرفه بس مش يعرفه؟
اه كده هانبتدي نخرّف
اكيد كلنا فاهمين انا اقصد ايه واللي مش فاهم بصراحة يبقى الغلط منه
اكيد بأتكلم عن حد منكم
انا اعرفها زي ما اعرفكم بالظبط
اعرفها بطريقتنا ف معرفة بعض
الحد ده انا مش هاقول اسمها علشان يمكن هي نفسها مش عارفه اني اقصدها

ويمكن مش حاسه اد ايه اللي عملته ده كنت محتاجه بجد

ويمكن علشان مش اعرف اسمها فعلا!

لأ انا اعرف الاسم او على الاقل اعرف الاسم اللي يهمني معرفته
الشخصية دي انا بجد ادين لها بحاجات كتير اهمها طبعا اني بأعتقد انها بطريقة او بأخرى كانت احد الاسباب ف اننا نفضل انا وصاحبي الانتيم مع بعض بعد ما قرر ف لحظة مجنونة انه كفاية لحد هنا مع بعض
انا مش اعرف ايه اللي عملته ومش هاحاول اعرف

بس انا كفاية عليا اني متأكد انها على الاقل دعتلنا من قلبها - وهي حد مستجاب الدعوة على الاقل ف وجهه نظرنا - ففكرت ف ان ابسط رد للجميل ده هو كلمة شكر وامتنان
يمكن هي نفسها مش تفهم اني بأوجه ليها هي الشكر ده علشان هي حد مش بيقدر قيمة اللي بيعملة

تمام زي صاحبي بالظبط ماهو مش كان مقدر قيمة انه يبقى موجود ف حياتي

الحد ده انا بأشكرها وبأتمنالها كل الخير اللي ف الدنيا واللي هي تستاهل اكتر منه

واحب اعتذر لو بطريقة او باخرى عملنا حاجة ضايقتها
وده هو نفس شعور محمد صاحبي لو مش كان اكتر

وليها باهدي الكلمات دي

something simple you did changed somebody's day
something simple you did changed somebody's way
it's in your heart, not in your mind
it's something good inside, you 'll find
so don't say it's nothing i did
don't forget who you are
because for many people,

you 're a shining star

2008-01-26T20:32:00.001+02:00

طبعا بأشكر كل اللي علق على البوست اللي فات وان كنت مش لاقي حاجة غير الشكر ارد بيها على ارائكم وطالما ان كلنا لينا نفس الرأي فأكيد الواحد مش يقلق انه يتحط ف موقف الراجل ده علشان اكيد هألاقي حد ينقذني بدون تردد او تفكير ف العواقب

كنت المفروض هاكتب موضوع جديد لكن جالي مكالمة خرجتني برة حالة الكتابة خالص لكن برضه مش ممكن اسيبكوا المدة الطويلة دي من غير ما تقرولي حاجة

انا عارف اني بقيت بالنسبه ليكم ادمان

عادي يا جماعة انا مقدر وعلشان كده

فتحت بلوج جديد اسمه

coverall

هايبقى فيه شوية مواقف حصلتلي وهاتحصلي ان شاء الله

وكمان نزلت تاج جديد ف البلوج التاني

انا الذي لا اعرفه

يا اغرقوا بقى ف التدوينات وادعولي علشان مش عارف عندي شوية حاجات ف دماغي عايز احسمها

القرار .... قرارك

2008-01-13T12:08:00.000+02:00

ساعات كتير بنتحط ف مواقف صعبة لازم فيها نتخذ قرار على اساسه بيتحدد مصيرنا او مستقبلنا
وطبيعي اننا ياما بننجح ف ان ربنا يهدينا للقرار الصح وبالتالي نحمد ربنا على انه ارشدنا للقرار ده او بنفشل ف اتخاذ القرار ده اما عن خطأ او عدم درايه او عدم تقدير للامور واعطائها قدرها الحقيقي او استخفاف او خوف او اي سبب تاني المهم ان المحصله ف الاخر بتكون غالبا ندم وبعدها نفضل نلوم نفسنا لباقي عمرنا او نكتشف ف وقت لاحق ان القرار ده كان فيه خير بعد كده
لكن ف المجمل اكيد كل حد فينا مر عليه الموقف ده وبغض النظر عن النجاح او الفشل ف اتخاذ القرار المناسب فأكيد ده بيسيب معانا ذكرى ودرس بنحاول نتعلم منه ونحمد ربنا ان القرار ده يخصنا احنا ومش يخص حد تاني احنا ممكن بسببه نأذيه او نجرحه بدون ذنب منه الا انه كان مرتبط بشكل او بآخر بالموضوع

طيب ايه الموقف بأه لما تلاقي نفسك مطالب بأتخاذ قرار مش يتعلق بيك لكن بيتعلق بأنسان تاني مش تعرفه ولا عمرك شفته لكن قرارك ده بيتوقف عليه حياه الشخص التاني ده الحاليه والمستقبليه ومش حياته بس لكن ممكن حياه اسرته بالكامل
صدقوني ده اخر موقف تتمنى انك تمر بيه
فجأه تلاقي نفسك مضطر انك تتخذ قرار انت نفسك مش تقدر تتحمل نتيجته رغم انك مش مرتبط بالموقف ده من قريب او من بعيد لكن بتكون صدفه انك ف الوقت والمكان مش فيه غيرك اللي تقدر اما تغير حاجه كبيره جدا او انك تفضل تأنب نفسك باقي حياتك انك كان ف مقدورك انك تتصرف ومش اتصرفت
الموضوع انا عارف انه مبهم لكنه موقف عدى عليا ولاقيت نفسي مسئول وقدامي قرارين لازم اخد قرار منهم واتحمل نتيجته مع العلم اني مش اقدر اتحمل اي من النتايج دي
وعلشان تقدروا تتصوروا الموقف اكتر ويكون حكمكم موضوعي انا هاحكيلكم الحكايه يمكن تلاقوا تفاصيل مش مهمه بس انا للاسف فاكر الموقف زي ماحصل قدامي كاني بأتفرج على الاعادة

كان يوم حد ومش كنت كملت اسبوع ف الشغل بتاعي الساعه كانت تقريبا تمانيه بالليل و كنت راجع من مطروح انا والسواق ووصلنا لاول بوابة بندخل من خلالها للموقع ودي بعيدة عن اقرب منطقة مأهوله بأي كائنات حيه بمسافه لاتقل عن 50 كم طبعا بنهدّي علشان المطب الصناعي وكمان علشان الحرس يشوفوا الرخص وتصريح الدخول
احنا: سلاموا عليكوا والسواق بيمد ايده بالتصريح والرخصة
الحارس: وعليكم السلام يا هندسة لا خلي الورق معاكم دلوقت احنا بس عايزين منكم خدمة لوجه الله
انا بدون تفكير: أأمر خير؟
الحارس: فيه بس واحد تعبان جدا وعايزينكم تودوه للاسعاف اللي ف مدخل الطريق – ده على بعد 100 كم تقريبا – علشان حالته صعبه جدا
انا: طب هو فين بس
الحارس: اتفضل شوفه الراجل ياولداه مش بيحط منطق
طبعا نزلت انا والسواق جري لقينا واحد بيموت بمعنى الكلمة وجسمه حته تلج ومش باين ان جسمه فيه نقطة دم واحده
انا : طب ياجماعه الراجل ده تبع مين وبقاله اد ايه كده
الحارس: والله يا هندسة مانعرف احنا لاقينا واحد قام داخل علينا وقام واقع من غير ماينطق كلمة وبقاله على الحال ده ييجي ساعه ونص
انا : طب مش اتصلتوا بالموقع جوه ليه
الحارس: والله اتصلنا وقلنالهم الراجل بيموت لكن قالوا شوفه تبع مين ولو تبع ..... – اللي هي اسم الشركه صاحبه الموقع- هاتوه للدكتور – وده مكانه برده على مسافه ييجي 50 كم - واحنا لا عارفين نروح ولا نيجي
حارس تاني: حسبي الله ونعم الوكيل فيهم الدكتور مكسل ييجي والتاني بيطمن الاول اذا كان تبعهم ولا لأ قبل ما يهز طوله
يعني لو مش تبعهم هايسيبوه يموت؟
انا: يا عم تبعهم ايه وبتاع ايه ده تبع ربنا طب مش فيه حد عمل ليه حاجه سخنه ولا حاجه الراجل شكله بقاله يومين ماشي ف الصحرا
الحارس: والله ماعندنا غير برتقانه فصصناها واديناهاله لكن زي ما انت شايف مش داري بالدنيا
السواق قام مناديني على جنب وقايلي: الراجل ده بيموت واحنا لو خدناه ف العربية هايموت مننا ف الطريق ومش هانلاقي حد يقبل ميت و هانروح ف داهيه بيه
انا طبعا تنحت وقلتله يعني نسيبه يموت
السواق: انا بأرسيك على اللي بيحصل هنا وانت لو قد المسئوليه دي فانا مش ادها

بصراحه كلامه خلاني اخاف
ساعتها رن جرس التليفون وكان محمد صاحبي وخرجت اكلمه وقلتلهم طب حاولوا تعرفوا ده مين وجه هنا ازاي
رجعت بعد دقيقه والراجل زي ماهو وزاد ان وشه بقى ازرق بدرجه رهيبه
طبعا انا دماغي هاتنفجر

السواق عنده حق وكمان الراجل مش هايتحمل اننا نخرج بيه وانا مش اقدر اتحمل ذنبه وخصوصا انه لسه بيتنفس
المهم قلت للسواق :خلاص هانوديه وربنا يتولاه ويتولانا معاه
السواق: طب احنا لو رحنا لغايه الاسعاف مش هانعرف نرجع علشان البنزين مش مكفي
الحارس: ياعم ربنا هايرزقكم بس مش تقفلها ف وشنا
انا: الكلام ده بجد ؟
السواق: والله زي ما باقولك وممكن يخلص قبل مانوصل ونموت احنا وهو من البرد
وفجأه جاء صوت مش عارف جه من فين لكنه قال
خلاص خدوه للدكتور جوه وهما كلهم 50 كم ولو البنزين خلص ابقوا اشتروا من جوه
الفكره نورت ف دماغي وقلت تمام هو ده الحل يالا بينا على الدكتور حتى لو حالته صعبه يبقى يطلع بالاسعاف المجهزه اللي جوه وربنا يسترها بقى ف العشر دقايق دول
السواق: بس واحد من الحرس دول ييجي معانا علشان يبقى شاهد ان احنا واخدينه ميت
انا: ياعم حبه تفاؤل وربنا يسترها عليه وعلينا ايدك بس معانا علشان الراجل مش قادر يتحرك
بعد ما دخلناه العربيه السواق قام حاطط رجله على البنزين كأنه بينتقم ولاقيته ماشي على 180 بصراحه مش عارف علشان نلحق نغيث الراجل ولا خايف يموت مننا بس انا ف كل الاحوال مش قدرت اتكلم ف حاجه مع ان الطريق مش ينفع تمشي عليه بأكتر من 120 بس ف الظروف دي مش ينفع اتكلم ف امن وسلامه واربط الحزام قبل ما تدور العربيه

والحمد لله وصلنا العياده ف وقت قياسي
الراجل الحمد لله تم اسعافه ف الاخر والدكتور قال ان اللي عنده صدمه نفسيه علشان فضل ماشي ف الصحرا مسافه طويله ف الجو ده والوقت ده بس ان شاء الله هايبقى كويس
اللي بقى مش بقى كويس هو انا
فضلت افكر انه هل اللي انا عملته ده هو الصح وهل لو كان لاقدر الله جراله حاجه وحصل زي ما السواق يقول كان ايه هايبقى الموقف وهل اللي انا عملته ده لو كانت الامور مش مشيت كده وحصل حاجه وحشه انا كده اكون اضريت بالسواق وبصاحب الشركه اللي استأمني وحطني ف موقف مسئوليه وهل لو مش كان فيه صوت مجهول قال نروح بيه للعياده كنت هاتصرف بعد اد ايه وتصرفي اصلا هايكون ايه وهل ممكن كنت اتأخر لغايه ما لاقدر الله يحصل حاجه وان كنت استبعد اني كنت هاسيبه فهل انقاذ بني ادم مسأله الوقت مهمه ف حالته تستاهل ان الواحد يفكر ف اي حاجه تانيه
اسئله كتيير جدا دارت ف بالي لكن الكلمه الوحيده اللي مش كنت هاسامح نفسي عليها لو كان حصل حاجه وحشه هي
انت المسئول والقرار قرارك

ما انزل اجي معاك

2007-12-31T23:56:00.000+02:00

كعاده اي سنه معايا لازم تنتهي بتأكيد احساس عندي ان السنه الجايه لايمكن تبقى احسن مع اني كنت متفائل جدا ان السنه دي هتخالف توقعاتي وتنتهي باحساس السعاده اللي ملازمني من فتره ما رجعت اشتغل تاني وقلت بلدنا لسه بخير والقادم اجمل على اسم احد الاصدقاء المدونين لكن ربنا مش يقطعلي عادة
جه آخر يوم ف السنة وقالي مش تتخيل اني هاعدي السنه عليك وانت متفائل خد هديه السنه دي وكل سنه وانت بتحلم !!!!!!!!!
انا شايف نظره الشماته ماليه وش السنه دي ولسان حالها بيقول لو كنت عديت من غير ما اديك الهديه بتاعتك يبقى انت اكيد اكيد مش ف مصر
تحبوا تسمعوا الهديه ؟
الاول انا احب اوضح ان اللي هاحكيه ليكوا حدث بالفعل
Based on a true story
وممكن الموقف يتكرر مع اي حد تاني فنصيحه مني
Please don't try this at any where
علشان انا مش مسئول
قبل ما ابدأ احب كمان احيي صديقي المقيد علشان هو السبب ف اتخاذي موقفي اللي هاحكيه كمان شويه وان كان ممكن كان اروح بسببه ف داهيه
هو يسخنني وانا اسخن واعمل هيركيوليز
ماشي ياعم
الموضوع طوّل وانا عارف ان مش فيه حد فاهم حاجه فهابدأ اقولكم على اللي حصل على شكل حكايه
كان ياما كان شاب ( اللي هو انا ) راجع من المعادي راكب تاكسي ورايح على محطه المترو يقابل واحد صاحبه والتاكسي ماشي لابيه ولا عليه اذا بشخص يظهر فجأه قدام التاكسي وعامل اشاره بأيده فهم من خلالها سواق التاكسي انه مطلوب منه انه يقف
فطبعا الراجل بكل بساطه قلل السرعه وقام راكن على جنب يشوف الشخصيه دي عايزه ايه
انا بقى ولا كأني موجود ... هو الراجل شاورلي أنا
فجأه لقينا جثة ضخمة جايه ناحيتنا وانا برضه ولا كأني موجود
المهم انا كنت كاشف من الراجل ده لحد حزام البنطلون بس سمعت صوت رخيم بيقول رخصك يا اسطى وبطاقه اللي معاك – اللي فهمت بعد كده انه يقصدني انا – المهم السواق بكل بساطه قام مطلع الرخص وانا ف مكاني مش اتحركت وكأني مصاب بحالة لا مبالاه فطبعا الشخصيه الجثه انحنت نصف انحناءه علشان تشوف لوح التلج اللي عامل فيها اطرش
ويال هول ما رأيت
واحد مش قدرت احفظ من ملامحه غير ان وشه فيه شنب ولا شنب كبير النجعاوية وكانت دماغه فاضيااااه مش فيها ولا شعره ولابس هدوم عاديه لا تتناسب مع برودة الجو بس انا قلت دي امكانياته ربنا يزيده واكتر حاجه مميزاه انه كان ماسك جهاز لاسلكي ف ايده كان شكل خالد صالح ف الصوره دي بس التاني مش عنده ولا شعره خالص

المهم الراجل بص ليا نظره احتقار وقالي : الامّور مش سامعني
بصيت بأستغراب وقلتله بكل براءه: حضرتك بتكلمني انا
قام باصصلي بنظره تدل على الاستغراب وقاللي : امال بأكلم امي بطاقتك ياد
وهنا استفزتني الكلمه واسترجعت حواري مع المقيد من فتره وافتكرت اني قلتله اني لايمكن اسمح لحد مهما كان انه يهينني ودبت الحماسه ف جسمي واستعنت بالله واستجمعت كلامي وبكل ثقه قلتله : مين حضرتك اصلا علشان تقولي ياد؟
الراجل ودانه احمرت واحس بالاهانه اني ازاي فيه بني آدم مش يعرفه وكمان قدام سواق التاكسي قام قاللي والشرر بطلع من عينيه : مش عارف انا مين طب انزل اعرفك امال انا ماسك اللاسلكي ده منظره

انا الحكومة ياااد

دا انت ليله تيييييييييييييييت سوده
انا بقى قفلت معايا والعرق الصعيدي نفر من دماغي وطلبت معايا تناحه ومطرح ما ترسي دقلها قمت قايله بكل البرود اللي قدرت اجمعه وانا لسه ف مكاني مش اتحركت – طبعا علشان السواق يبقى شاهد من ناحيه ومن ناحيه تانيه علشان مش فيه قلم طايش يمسي على وشي ف البرد ده – وقلتله : هو المفروض اعرفك من اللاسلكي ؟ طب ما السيكيوريتي اللي ف عمارتنا معاه واحد زيه وكمان لابس يونيفورم ومعاه طبنجه
عادي يعني
انا لاقيت غضب ربنا نزل على وش الراجل ده ولاقيته قام مادد ايده من شباك التاكسي وماسكني من الجاكيت وشاددني وقالي : انزل يابن ال تيييييييييت انت خلاص كده مش ليك وجود ف الدنيا بعد النهاردة
قمت بكل حزم وانا بأفلت منه الجاكيت – اصله غالي ولسه مش اتمتعت بيه – وقايله بنبره انا نفسي استغربت طلعت مني ازاي : احترم نفسك وحافظ على كلامك علشان مش تندم بعد كده
قام ساب الجاكيت وباصص لي نظره حيره وان كان حاول يخفيها وقايلي بنبره اللي مش بيهمه حاجه : انت بتشتغل ايه ياد؟
انا تجاهلت نبره الاستخفاف وقلت دلوقت يندم لما يعرف وقلت بكل فخر ولا كأني صلاح الدين الايوبي : أنا مهندس
طبعا تصورت ان الراجل بقى هايتكسف ويعتزر بقى وكده لكن للاسف خاب املي ولاقيته بيضحك ضحك هيستيري واللي غاظني اكتر ان السواق كمان ضحك وكأنه بيقول ايه العبيط ده وقام ساكت اول ما الراجل الضخم قطع ضحكته فجأه والشرار بيطلع من عينه وقام قايل : طب يا حيلتها
مهندس هاه ؟ طب وريني البطاقه
انا ساعتها بصراحه كنت هاتراجع واقول كفايه لحد كده وخصوصا انها اول مره وابقى اكمل المره الجايه لو ربنا اداني العمر وكرمني وخلصني من البلوه دي لكن كلمه حيلتها دي غاظتني بجد هو انا قلتله كابتن منتخب مصر لكره الشواطئ دا انا مهندس وساعتها الشيطان قام اتملك وداني وقالي يا تكمل يا اما هاتتظبّط
انا بصراحه قلت كده كده شكلي هاتظبـّط فيبقى شكلي يبقى كويس على الاقل قدام سواق التاكسي مع اني عاتب عليه انه مش حاول يتدخل ويفهمني الحوار ويهديني كأنه واحد بيتفرج على فيلم هندي ومستمتع جدا وكأنه بيتفرج لأول مره مع انه شاف النهايه كتييييييييير
المهم انا قلت للراجل الجثه بكل العند اللي ف الدنيا واللي يحصل يحصل : وريني بطاقتك انت الاول فلاحظت بدايه الانفجار على وشه فقلت الطف شويه واعمل لآخرتي يمكن ساعتها يفتكرهالي وقلتله موضحا مانا مش كل واحد ماسكلي لاسلكي يقولي طلع البطاقه اطلعهالوه المره الجايه الاقي واحد لابس جلابيه وماسك نبّوت بيهددني ويقولي بطاقتك
وكانت هي دي القشه اللي قسمت ظهر الراجل الجثه ولاقيته قلب واحد تاني خالص اطول واعرض واوحش
وتصورت ان النهارده مش هايعدي عليا الا وانا ف مشرحه زينهم
الراجل قام ماسك باب التاكسي واداله شوطه برجله طبّقه وقام مادد ايده ماسكني من دراعي كان هايكسره لولا اني قمت شاخط فيه وقايله الكلمه الشهيره والقديمه قدم الاهرامات : انا هاوريك يا حيوان انا هاعرفك مركزك وقمت بكل تلقائيه فاتح الموبايل – اصله موتورولا – ودايس اي زرار مش كنت شايف وبعدين لاقيت نفسي باتكلم مع شخص مش موجود اصلا على التليفون اسمه مصطفى باشا
انا : ايوه يا مصطفى باشا انا حاتم يا فندم انا اتبهدلت من رجالتك يا اونكل
وطبعا لاقيت الراجل قام سايبني كأن ثعبان قرصه فأنا قمت مستحلي الحكايه وسكتت فجأه بعدين كملت : واحد حضرتك ماسكني من هدومي وبيشتم وعامل فيها مدير الامن وبيقولي انت النهارده زبون وشتايم وقله ادب انزل معاه حضرتك ؟
الراجل بيبصلي وكأنه بيقول اه يا صايع يابن ال تييييييييييت وانا متقمص الدور جدا ومكمل وقمت ملتفت له وقال بأسأله : اسمك ايه وارجع للتليفون واكلم الباشا الوهمي : ايوه حضرتك ي اونكل مانا قلت اتصل بحضرتك احنا مش لينا بركه غير حضرتك والله بابا بيقولي لو فيه اي حاجه اتصل بعمك مصطفى
لو احنا مش اخدنا حقنا ف البلد مين اللي هاياخده
وبعدين أعلى صوتي واقول : يعني لو كده انزل معاه وحضرتك هاتقابلني شخصيا بس انا اخاف يعمل معايا حركه مش ولابد
واسكت واكمل بعدها : لأ ازاي طبعا عارف حضرتك ممكن تعمل ايه طب دقيقه أسأله
وطبعا قمت باصص للراجل بكل شماته وبأكلمه بقرف مانا بقى بقيت معرفه مصطفى باشا : انت تبع قسم ايه؟
الراجل قام تجاهل سؤالي وقام موجه كلامه من فتره طويله لحد تاني اكتشفت انه السواق واني لسه جوه التاكسي وقاله : اطلع يا اسطى
الراجل لما صدق وقام دايس بنزين على الاخر وانا بقى قمه ف التشفي قمت مطلع دماغي من الشباك

وقايلله : ما انزل اجي معاك
رخم مش كده

ايه رأيكم ف نهاية السنه دي معايا
كل سنه وانتم طيبين وربنا يخليلي مصطفى باشا
شفتوا بقى انا محظوظ اد ايه

طبعا عندي حق اقول ان السنه دي زي غيرها
وسمعني سلام

مصر هي عمي وخيرها جوه فمي

هاروح؟.......مطروح .... انت حر

2007-12-26T09:48:00.000+02:00

عدنا
اخيرا وبعد طول غياب اطل عليكم بالطلة البهية الي انا معروف بيها وانا عارف ان كل حد فيكم مالياه الوحشه والانتظار من ساعة ما سافرت
انا عارف مش محتاجين تحلفوا
ورأفة بحالكم قررت اني ارجع بعد اسبوعين مش تلاته زي ماكنا متفقين
بصراحة كفاية عليكم كده
انا نفسي وحشت نفسي

نرجع بقى للجد
وحشتوووووووووووني جدا
البلوج والبلوجرز واللي بيفكر يبلوج
انا بصراحة مش كنت عارف ان الموضوع ممكن يبقى كده
بس بصراحة ربنا يخلي المقيد صديقي الانتيخ
مش كان محسسني اني مرمي ف الصحرا ولا حاجة وكل الاخبار واصلالي اولا بأول وكل البوستات الجديدة والتعليقات
بصراحة عمل معايا احلى واجب
ربنا يخليه ليا بجد
اكيد عايزين تعرفوا التفاصيل علشان انا جيت رميت الخبر ومشيت بس والله انا رجعت يومها الساعة سبعه بالليل ومشيت تاني يوم الساعة سبعه الصبح
انا الحمد لله اشتغلت ف شركه نشاطها المواد الكيميائيه وقاعد مش بعيد
ف موقع بعيد عن مطروح بتقريبا 150 قول 200 كم
طبعا انا سامع حد بيغلس ويقول فركه كعب
واحب انبهه ان كلامه جارح

الموضوع ده شائك ومش مستحمل هزار
ههههههههههه
المكان جميل جدا هناك بغض النظر عن ان مش معترف بحاجه اسمها اخضر الا ف اضيق الحدود والمنظر كله 3 الوان
الاصفر بلون الصحرا ودي مساحه مغطيه كل المنظر على مرأى البصر ويتقاطع معاها الازرق بلون السما اللي طبعا بالتبعيه بيقلبوا بالليل اسود كناية عن ظلام حالك
هي شركه خاصة وبيطلق عليها ف قطاع البترول شركه خدمات وانا زي مابيقولوا دايما على الوايتنج

- waiting -

وقت مايحتاجونا بنروح وطبعا كعادة اي قطاع بيرتبط بالحكومه بصلة بيتفننوا في ارهاق اللي قدامهم ف دايما بيحتاجونا بالليل اللي هو بعد الساعة واحدة بعد نص الليل وفي هذا الوقت من اليوم في هذه البقعة من الارض لا وجود لكلمة جو كويس - مش موجودة ف القاموس - حد راح قبل كده المشرحة او تلاجة حفظ الفواكه اللي دخل فيها فريد شوقي ومحمود المليجي يتخانقوا فيها مره

متهيألي ارحم
انا مش كنت متصور لغاية ماشفت بعيني ان جهاز قياس درجة الحرارة هناك عامل 2 مئوية
بس احنا لما الدنيا بتبقى مضلمة جدا والشغل مش ملاحقين الواحد بيعمل 3 جوبات

- 3 jobs -

وهي بتتقال عليها كده

ده ف الاسبوع وباقي الوقت مأنتخ ف الفيلا
ايوه فيلا مش تعبانين وطالع عنينا وبعدين ده احنا قاعدين ف اوضه واحدة - وماحدش يسألني سايبين الفيلا كلها وقاعدين ف اوضه؟ هاقوله لينا جيران من شركات شقيقة يا زكي -
احلى حاجة هناك المناظر الطبيعية
لما بتكون العملية هادية - وهي كانت كده ف الفترة اللي انا كنت فيها هناك - بننزل مطروح المدينة
البلد فاضيااااااااااااه وانا عديتهم طلعوا كل سكانها حوالي 350 نسمة

حاجة يعني نظام عيلتنا اكبر منهم
وده طبعا علشان الدنيا شتا والموسم لسه مش بدأ - على اساس ان مطروح بلد سياحي مش بتشتغل غير ف الصيف
كل المطاعم والفنادق والمحلات والبيوت بتشتغل شهور الصيف بس والباقي مغلق لحين وصول الحر

البلد جميله جدا ونضيفه جدا وصغيره جدا بس اهلها بصراحه واسف يعني بارديين جدا جدا جدا

دايما تلاقي ناس ماشيين ف وسط الطريق تديهم كالكس يلفوا ببطء تحس معاه ان الزمن توقف

وبعدين يبصلك باحتقار واستغراب كأنك كائن فضائي وبعدين يلف تاني بنفس البطء ولا كأن فيه حاجة حصلت

ويكمل طريقه عادييييي

المشكلة انهم مقدرين ان ممكن لا قدر الله حد فيهم يجراله حاجه

المفروض ان هو يمشي والناس هي اللي تاخد بالها

طبعا احنا ابناء المحافظات المختلفة بالنسبه ليهم حاجة غريبة نقعد نولع ف نفسنا ونزعق وياحاج ويا ماما ويا انسه ويا استاذ وكأنك بتتكلم لغة غير معترف بيها

يبوصولك بنفس نظرة اللامبالاة دي تخليك تتمنى ان الارض تنشق وتبلعهم

تبلعني انا ليه

هو مين اللي يستاهل

برود ببرود بقى

حاجة تعل من الاخر

ايه؟ مين من مطروح؟

بس ناس طيبين صراحة
ودي شوية صور صورتها بعدسة تليفوني ال 1.3 ميجا - على أدي انا لسه مش قبضت حاجة - استمتعوا بقى

دول هما الكائنات الوحيدة اللي ممكن تلاقيها ف الصحرا - مع البني آدمين طبعا - بس هما اكتر

لو الجمال بتعدي الطريق احنا بنستناها لغاية ماتخلص خالص

احنا لاقيين عمرنا

ده هو المنظر الدائم قدامي وحواليا .. روعة مش كده

ده منظر الغروب كل يوم اشوفه اقعد متنح كده واقول سبحان الله

القمر ف السما منور

شاطئ عجيبه - بصراحة اسم على مسمى -

شفتم صخور بالجمال ده - سبحان الله -

الميه صافية بطريقة رهيبة ماشاء الله

الصخر ده جوه الميه حتى فيه سمكة صغيرة باينة

احلى منظر شفته ف حياتي - قوس قزح -

واخيرا انا وكليوباترا .......

ايوه كليوباترا مرة واحدة

انا اشتغاااااااااااااااالت

2007-12-11T20:17:00.000+02:00

حاتم الشهير ب ولو اشتغل يا مينز

ومينز دي اللي هي

mens

وتقال عند جمع مجموعه من الافراد كلا يطلق عليه

man

وذلك حسب التفسير العلمي للأستاذ مرسي الزناتي ف مدرسه المشاغبين

طبعا مش محتاج اقولكم هاتوحشوني أد ايه

إدعولي

إن شاء الله هما 3 أسابيع

طبعا مش هأكون موجود ف العيد علشان كده

منك لله يا غينابي . كان زماننا متدلعين

2007-12-04T23:45:00.000+02:00

ف يوم كنت باتكلم مع حد عزيز عليا وقالي قولي حدوته وساعتها كان ردي اني مش بأعرف اقول حواديت

النهاردة بعد فترة من اليوم دة هأحكي ليكم وليه الحدوته اللي طالبني بيها

اتمنى انها تعجبكم

يحكى أنه في قديم الزمان كان هناك ملك ومادام هو ملك يبقى اكيد بيحكم مملكه والمملكة بتاعته دي كانت من اكبر الممالك الموجودة ف وقتها
الملك ده مره طلع ف رحله صيد ف غابه من غابات المملكة بتاعته .
ملك بقى والارض كلها تبعه
المهم بعد ما ظبط نفسه وموّت يجي نص حيوانات المملكة و اصطادله اللي يأكله هو وبلده خمس سنين قدام رجع القصر بتاعه منفوش زي ديك البرابر كأنه حرر فلسطين
بس ماشي بيعرج زي الاستاذ عبدالحليم لما غنى "مشيت على الاشواك" ومش قادر يدوس على رجله ياولداه
اول ما دخل نادى على الوزير بتاعه – اللي هو دلوقت رئيس الوزرا عندنا - و ف ثانيه طبعا الوزير كان قدامه بيقوله شبيك لبيك كل رحله وانت طيب يا مولاي عقبال ما تتطلع جبل الموت – وطبعا باين من الاسم ان الجبل ماحدش طلعه ونزل تاني – ماعلينا الملك قاله يا وزير حنشار – ده اسمه ماهو زمان الاسامي كانت كده ماكانوش ألفوا" دليل كيف تختار اسم لطفلك" لسه - انا الرحله دي بهدلتني اخر بهدله رجلي باظت ياوزير اتصرف ف الحال شوفلي مرهم "هيموكلار" ادهن رجلي ولا حاجه
طبعا ده بسبب ان الملك عمره ماطلع رحله زي دي قبل كده واكيد يعني ماكانش لسه فيه اسفلت وبلاط ورمله يتفرد بيها الشوارع لما المسئولين الكبار يعدوا
الوزير قاله احنا استدعينا كبار الاطباء ف المملكة وكلهم تحت امر مولاي ورجلك هاترجع زي ماكانت حتى لو اضطرينا نجيب رجل جديده من شارع عبدالعزيز نركبها مكان القديمه وندفع الفرق
الملك مش عجبه الحل المؤقت ده
كل مره هاروح اصطاد اركب رجل جديده مش موال هو و بعدين لو الناس ف المملكة شموا خبر هاتبقى فرصة للمعارضه انهم يطلعوا بقى ويقولوا شوفوا الملك الفافي بتاعكم ويقوّموا البلد عليه ودول ناس صعايدة اهم حاجه عندهم الخشونة
قام امر ان كل المملكة بتاعته تتغطى طريق طريق وشارع شارع وغابه غابه بالجلد الطبيعي
افترا بقى
طبعا الوزير تنح قدامه على اساس ان الموضوع ده هايحتاج ملايين الاطنان من جلد البقر والخرفان ده غير الفلوس المتلتله اللي هايتكلفها المشروع المنيل ده فمش هايتفضل حاجة ف البلد تتسرق
الوزرا زمان كانوا بيخافوا على فلوس البلد !!!!
بس طبعا قاله امرك مطاع يا سيد الانطاع كله هايبقى تمام ف الحال
وساعتها كان قاعد معاه الحاج غينابي حكيم الزمان – ابو دقن بيضه طويله ده – اللي دايما بتشوفوه ف الافلام
الحاج غينابي مش عجبه الحوار وقال ايه التهييس اللي مش جايب همه ده
الراجل ده كل مره يطلع علينا بافتكاسة تودي ف داهية
وقام قايل للملك طب ياعم الحاج بدل ماتفرش الممكلة كلها جلد عشان خروجه بتحصل كل عشرميت سنه مره وانت بتحكم شويه كلاب - ده كلام غينابي وانا اكيد من الكلاب دول - هما اللي هايستفيدوا مع انهم مايستاهلوش النعيم ده ايه رأيك نجيبلك حته جلد تتغطي بيها رجل الابعد ويبقى حافظنا على الرجل الملكيه وفضل الشعب ف عذابه
مش عايزين نفتح عينيهم على النعيم ده مش هانعرف نلمهم بعد كده ومش بعيد يطلعلك واحد يقولك عايزين تداول للسلطه والكلام الفارغ بتاع المتعلمين ده
الملك عجبته الفكره مش عشان رجله لكن عشان الشعب هايفضل متبهدل
قاله برافو عليك يا حاج غينابي
صحيح التعليم بيفرق والدقن البيضا دي مش طلعت اونطه
وساعتها كان اول جزمة تتعمل ف العالم

اللي نستفيده من القصه دي بغض النظر عن ان كل الحكام بيحبوا يقرفوا الشعوب بتاعتهم
انه علشان العالم يبقى مكان يصلح العيش فيه
الاحسن انك تغير من نفسك قبل ماتفكر ف تغيير العالم

تحديث مهم

**************

بعد تزايد الطلب على معرفة معنى غينابي

رجعت للمراجع والمعاجم والقواميس وبرضه مش عرفت معناها ايه

قمت خاطف رجلي للمملكة اللي كان عايش فيها

اكتشفت بقى ان ليه حفيد

وبرضه بيشتغل حكيم زمانه

وعرفت منه ان غينابي اسمه الحقيقي هيثم

اتبسطوا كده

اهي القصة باظت

منك لله ياغينابي الشهير ب هيثم

ضيعت مني السجاد زمان وبوظتلي الحدوتة دلوقت

مش عارف ايه الامارة !!! بس ده احساسي ف اللحظه دي

2007-11-30T01:38:00.000+02:00

one day i shall fly

one day i shall soar high

one day the world will watch

one day i shall shine

insha2 allah

ايام لا تنسى

2007-11-19T01:28:00.000+02:00

كنت قد عقدت النية على ألا أمر من هناك مرة اخرى كي لا تهزمني الذكريات وفعلت ولكن لم يستمر هذا طويلا ولم استطع إلا ان اذهب
اجتاحني شعور طاغ بالحنين عند مروري في المنطقه التي تتواجد بها وبالرغم من انني من قرر البعاد واختار الرحيل وجدتني أتأملها بأسى
عرفتها بعد رحلة غير قصيرة من البحث وسط مثيلاتها وتطورت الأمور في سرعة لا تحدث في الظروف الطبيعية
تلاقت رغباتنا . وجدت فيها مايحقق لي طموحي انذاك ووجدت فيّ ارتقاء لمستواها واعلاء لمكانتها
اتفقنا على التفاصيل وتم ما كنت اتمناه حينها واتخذت مكاني وسارت الدنيا فيما كان مقدرا لي حدوثه
لم ازرها بعدها سوى مرة واحدة عندما قررت الرحيل وكان الفاصل الزمني بين المرتين حوالي عام كامل او اكثر قليلا
اذكر المره الاولى جيدا وتفاصيلها تكاد تتمثل امامي كأن الزمن عاد بي الي الوراء
كل شئ حدث بسرعة لم استوعبها
كنت اطير فرحا بعدما وجدت فيها ضالتي – او هكذا خيل لي - .
استفدت منها كثيرا لا استطيع النكران
اعطتني المال والمركز الاجتماعي – امام من يحيط بي على الاقل – ولكنها سلبتني طموحي وتملكت ارادتي
اخذت مني راحة البال واستبدلتها بارهاق جسدي وذهني اصبح صفه اساسيه في تكويني
بعد اسبوع واحد ظهرت الحقيقه واستيقظت من حلم لم يستمر حتى ليتضح معالمه واكتشفت ان ما احصل عليه من مميزات لا يتناسب مع ما اقدمه من تنازلات –بالنسبه لي على الاقل – وانا من يعيش التجربه واتعامل مع احداثها ومن يقرر ذلك بالتأكيد
ضغطت على نفسي لأتأقلم مع الوضع حتى لا اتهم بالفشل في اول تجربة ولكن كل منا له طاقة معينة
عشت لمدة عام كامل أحسب الايام والساعات. كم تبقى لي من راحة وكم فات عليا من عذاب . لم استطع الاستمرار اكثر واتخذت قراري بالرحيل
اذكر ايضا يوم اخترت النهاية . كنت في قمة النشوة واستغرب من حوالي هذا الشعور واستنكروه
كنت سعيدا لأني استجمعت ارادتي في النهاية واتخذت قرار كان من وجهه نظر الاخرين متسرع وكان بالنسبه لي – وقتها – متأخر لاكثر من عشرة شهور
اذكر اني احسست بها تقول لي اذهب وانت الخاسر فغيرك آلاف يتمنى نصف ماتملكه الآن . غيرك يتمنى أقل كثيرا مما انت عليه واعدك – والكلام مازال لها – ان اليوم لن يمر الا وهناك من يشغل مكانك وكانت صادقة ولم يكن لدي ادنى شك من حدوث هذا فمثلها لا يتوقف عند فرد كثيرا فكل مايشغلها ومثيلاتها امور مادية بحتة تعتمد على المكسب والخساره لكنها لا تعترف بشئ اسمه الراحة النفسيه
لم يعنيني ماقيل ولم اهتم فمن يبيع لا يفكر كثيرا فيما ترك ورائه او فيمن يحل محله ويأخذ مكان كان حتى وقت قريب مكانه
رحلت ومعي ذكريات غالية وخبرات حياتية واحلام تهدمت على صخرة الواقع
والآن وبعد مضي ما يقرب من 6 اشهر منذ ذلك اليوم وجدتني أمامها
لم اتمالك مشاعري وغلبني احساسي بالحنين فأنهرت امامها
وانتابني شعور بالندم
ندم على ماتركت
ولها اقول:
شركتي السابقة ....... شغلي القديم
وحشتوني

mY woNdeR WorLd

2007-11-06T02:17:00.001+02:00

اوقات لما اكون زعلان من حد او متضايق من حاجه او بامر بفتره انعدام وزن - وده

بيحصل كتير - والاقي حد يقولي ماتزعلش انا حاسس بيك

انا حاسس باللي انت حاسس بيه
ساعتها كنت استغرب جدا وكان عقلي يرفض الفكره تماما ويقول ازاي!!!!

ازاي تحب اكله وانت عمرك مش دوقتها
ازاي تعرف طريق عمرك مش مشيت فيه
ازاي تتميز ف شغل انت عمرك مش اشتغلته قبل كده
ازاي تفتقد احساس وانت عمرك مش عشته ف حياتك
ازاي يوحشك شعور وانت عمرك مش حسيت بيه
ازاي تعيش تجربه انت اصلا مش دخلت فيها

ازاي
ازاي
ازاي

تساؤلات كنت مؤمن بيها ومش مقتنع بغيرها
لغايه وقت قريب
لغايه ما عملت البلوج بتاعي
ساعتها ايماني اختلف
واقتناعي اتهز
انا اتعلقت جدا بيكم من غير ما اشوفكم او حتى اعرف اساميكم

اتعلقت بيكم زي ما كنت وانا صغير متعلق ب توم وجيري ودول كنت باعتبرهم عيلتي ف وقت من الاوقات

اتعلقت بيكم لدرجه انه مش بقيت متصور ان انتم اشخاص ممكن اقابلكم ف الشارع والشغل والجامع والمواصلات
لا
انتم شخصيات خياليه وبلوجر ده عالم فانتازيا
عالم مش ينفع فيه ان حد يختفي او يبعد
لكن للاسف مش دي هي الحقيقه
الحقيقه انكم زيي تمام
بني ادمين زي ملايين الناس التانيه بمشاغلها وظروفها وهمومها واحزانها ومساوئها
ناس بتمشي وناس بتزهق وناس بتسافر وناس بتكتئب وناس بترحل

بس الفرق انكم بتعبروا عن نفسكم ف زمن بقى فيه حريه التعبير خيال

الفرق انكم عايزين الدنيا احلى ف زمن كل حاجه فيه تدعو لليأس

الفرق انكم مش مقتنعين بأن الدنيا كلها اسود بس
لأ الدنيا فيها ابيض وفيها الوان

الفرق انكم كلكم على الرغم من اختلاف الافكار والدراسه والاعمار والتوجهات بيجمعكم لغه حوار راقي بغض النظر عن اسلوبه

الفرق انكم بتحسوا بناس انتوا مش عارفينهم شخصيا وممكن تكونوا ماتعرفوش حتى اسمهم وتبذلوا كل مجهود ممكن عشان تخلوهم يحسوا بشعور افضل

الفرق انكم بتتمنوا الخير لكل الناس وبتقدموا اي مساعده بدون انتظار لمقابل

الفرق انكم – بقصد او بدون قصد – بتسيبوا بصمه او ذكرى او تجربه او درس او ابتسامه ف كل مره تكتبوا فيها

الفرق انكم بتكتبوا بس لما تحسوا بأهميه الكتابه سواء ليكم او لغيركم مش عشان مضطرين للكتابه

واكتر واكتر

انا فعلا متشكر ليكم جدا
انا متشكر لعالم بلوجر الحقيقي
وان كنت هافضل اعتبره عالمي الخيالي
عالمي اللي مش بأخجل اني اظهر فيه على حقيقـتي بدون رتوش او تجميل
عالمي اللي بألجأ اليه لاسترداد نفسي لما يرهقني البحث عنها

ساعتها باقول ان حياتي بتبتدي من هنا

امسح دموعك

2007-10-30T01:05:00.000+02:00

زمان قبل ما ادمن المدونات كنت مدمن منتديات

كنت كل يوم اسجل ف منتدى جديد واقعد اقرا فيه واحتفظ بالحاجات اللي بتعجبني

وبعد ما قريت تدوينه حدوته النهارده وبعد ما قريت الكومنتات اللي على البوست اللي فات

باهديكم الكلمات دي

باهديها لمحمد صاحبي الانتيم واقوله اطمن انا بقيت احسن

باهديها لحدوته واقولها اتمنى انك تبقي احسن

باهديها لكل حد فيكم

واقولكم انا محظوظ اني عرفت ناس زيكم

صاحبى الحزين

امسح دموعك

قوم وكمل خطوتك
ايه يعنى يجرى لو تقع
مش راح نموت

والضربه اللى تقوّي فيك
صدقنى مش راح تكسرك

انسى همومك وابتسم
حاسب تتوه

او تيجى اوهام تخدعك

مهما يكون حلمك بعيد

لابد انك تنتصر

كمل حياتك
سكتك

لو حتى يوم كان فيه امل
ضاع من ايديك

فيه ايه يكون

انساه
وكمل من جديد
مش مستحيل

حلمك ماراحشي
انما
لو كان صحيح ليك بخت فيه

ما هينتهيش

اياك تقول صعب انى اكون

املك ارادتك وابتدى

واعرف بان هناك كتير
كان يسعده

لو انه يملك نص ماتملك ايديك

احلم ببكره

يتفتح لك الف باب

ارضى بنصيبك
انما
من غير كسل

من غير زعل
من غير عتاب

وابقى افتكر
ان الرضا لو تملكه

مفتاح طريق
تمشيه سعيد
من غير عذاب

كلمات رنيم من منتدى صحاب
اشكرك بشده

عذرا معشر الرجال

2007-10-25T16:57:00.000+02:00

بعدما مر من سنوات
اكتشفت ان حياه المرء على اختلافها يومان
يوم عسير لا نرى فيه الا الظلام
ويوم نيـّر يضيئ كل شئ حتى الأفق
ولكني لم أجد في حياتي أيام منيره
فعندما تنعدم السعاده
يصعب التواصل
وتشتد وطأه العزلة
تتسع دوامه الحيره
وتفقد الحياة حلاوه الطعم
كل شئ ينهار من حولي
و اجد نفسي وحيدا
ارى الأن أشباح بشر
وجوه مطمسه المعالم فقدت أدميتها
تتهادى على مسامعي كلمات المواساه
على حياة أصبحت كالاطلال
حر لكني جريح
حي ولا استطيع جمع شتاتي
انهكني الفكر واعياني الاستسلام
تتملكني رغبه قويه في البكاء
ولكن اتذكر قولهم
الرجال لا تبكي مهما حدث
هل من يتفهم
ان هناك اناس تنتهي عندهم الحياه قبل ان تبدأ
لا استطيع التماسك
اظنني سأغرق في دموعي
فعذرا لهم
فالرجال ايضا يذرفون الدموع

أينعم من زمان بس اللي عندي

2007-10-13T07:38:00.000+02:00

بسم الله نبتدي التاج

كنت شاطر بس

ده انا كنت من الاوائل لغايه ما وصلت لتالته اعدادي
ساعتها حسيت ان مرحله الانهيار العلمي بدأت مع اني متخرج من كليه المفروض انها قمه بس احساسي مش كده خالص

انا كنت باحب اللغات جدا ف المدرسه وبعدهم الرياضه

باكره جدا المواد الادبيه
وخصوصا الجغرافيا
- بشعه بصراحه

- وبعدها الفلسفه

ماليش ف الحوارات دي خالص لكن القدر تدخل وكرهت الرياضه ف الكليه

مش كده وبس دا انا مافتكرش اني حبيت ماده ف الكليه غير لما كنت اجيب فيها تقدير – وده كان نادر الحدوث – ساعتها

كنت احس ان عقلي الباطن كان بيحبها

كنت لغايه ابتدائي نفسي اطلع طيار

كنت بانبهر بشكلهم
بعد كده مابقاش نفسي ف حاجه

الحمد لله ابويا مش حارمنا من حاجه

معقوله مش تعرفوا
ده رواد الفضاء عرفوا

اسمها ولو

يعني هي كلمه فيها تحدي زي مثلا ماحد يقولك انك مش هاتقدر او مش هاينفع او صعبه عليك
كان هو ده احساسي اني برضه مهما كانت الصعوبات اللي هاتقابل الواحد
ولو
لازم احاول
مش مهم ايه النتيجه لكن يكفي شرف المحاوله والتوفيق بقى بتاع ربنا

بالنسبه للمدونه دي بصراحه مش فكرت وان شاء الله مش افكر لكن انا كان عندي واحده وقفلتها من تاني بوست
السبب اني مارتحتلهاش كان شكلها مش عاطفي

كان اسمها تفانين على فكره

هي صوره مجموعه من الناس بيشاوروا على واحد – المفروض انه انا – على انه فاشل مش عارف ده فعلا انطباع الناس عني ولا لأ لكنه بالتأكيد انطباعي عن نفسي

مراجعه البوست رقم 2 انا فاشل

لمزيد من التفاصيل
راجع ا البوست الاول بعنوان
اتكلموا
يعني هو انا انبهرت بفكره انه مايكونش عندك خوف انك تعبر عن نفسك وعن افكارك

فكره انك حر انك تكتب اللي انت حاسس بيه بدون رهبه ان حد يسخر منك او مش يسمعلك او اي سبب يدعو للاحباط

ده احلى سؤال ف التاج
انا بقى قمت راجع فاتح البوستات من الاول وجايب كل اللي قال ف حقي كلمه حلوه
اصلي مريض نفسي بالاضطهاد فقلت افكر نفسي ان الناس بتحبني وكده
مش بتحبوني برضه !!!!!!
واليكم بعض العبارات الموجزه

inksarat
كلامك ابهرنى

آلام وآمال
شكرا يا حاتم على الحالة الجميلة اللي عملتهالي

catroz
اقل ما يقال دماغك جامده اوى

rana 3amra
ياااااااااااااااه دة انت طيب اوى وجميل اوى اوى ربنا يخليلك نفسك

ابو النجوم
الواحد كان حاسس انة يعرفك لانك زى حد صاحبى بصراحة كدة انا يشرفنى ان اكون صاحب حد بيجب اصحابة كدة

همسة قلم
ربما ضحكت كما لم اضحك من قبل
اللهو الخفى
اشكرك لهذا الجمال في التعبير الذي عجز لساني عن قوله

التعليقات بتحسسني ان بلدنا لسه بخير لسه فيها ناس عندها فكر وبتعبر عنه
حتى مهما كان الرأي مخالف فبيكون الخلاف بطريقه بتقوم على احترام الاخر
احساس ان بلدنا كويسه وفيها شباب كويس مش بس بلدنا اللي بنشوفه ف الشارع بس لا بلدنا اللي بنشوفه ف بلوجر كمان
ايه الكلام الكبير ده

بس انتوا اللي سألتوا

انا طبعا كل اللي كتبته حلو وجميل وكل الصفات الحلوه لكن انا باحب بوست
تفكر في معاني الأذان
اصل الناس اللي قرأوه قعدوا يدعولي كتير وبعده على طول
مواصفات فتاه احلامي
كان اول واخر مره اكتب كلام شبه موزون

انا قريت كميه مدونات رائعه فيها اللي اسعدني الحظ وبقيت متابعها ودول اللي على يمينك لو انت قاعد قدام الشاشه او للاسف سقطت وضاعت بسقوط الويندوز
وكل مدونه تتميز بحاجه ممكن اعتبرها احلى مدونه عشان كده مش اقدر احدد الاحلى

كلهم احلى من بعض

هو حد يقدر
لااااااااااا احنا لاموأخذه كفاءه ونعرف نوقف اي حد عند حده
الحمد لله كل اللي بيدخل عندي يا اما اصحابي ودول اعرفهم او بيعلقوا عندي عن طريق معرفتي من مدونات اصحابي اللي اعرفهم

يبقى قله الادب هاتيجي منيين

ماعملتش حاجه

اعمل ليه واصلا مافيش حاجه حصلت

يحصل اللي يحصل هو ده يعني اللي ناقص افكر فيه
افكر ف المصير اللي هايقابلني
ربنا يرحمنا

سؤال مستفز الصراحه بس هايفضل ماحدش يعدي عليه لحد ما يبقى
Expired

وبعد كده يتمدد جنب صاحبه

اه

فيها حاجه دي ؟؟؟

كانت علاقه طرديه
صاحبي الانتيم لأ هو يعتبر اخويا اللي مش بأخبي عنه حاجه

عبوووووووووووووووووووود

مش كل اصحابي يعرفوا خلينا نقول اسم الشهره بتاعي

- احنا رداله ومش بنجبل الحدات دي -
لكن عيلتنا وبعض اصحابي بيقولولي توما

اختي بتقولي طونيوس

الباشم ( هندسه) و الترجمه بتاعتها

انجينييرنج يعني

انا شخصيه هاديه معظم الوقت انطوائي كثير من الوقت مرح باقى الوقت
ده لو اتفضل حاجه – ده مع الناس اللي يعرفوني
مع باقي الناس مسخره
شاب ضايع من الاخر
مش عارف السبب لكن انا باعتقد ان الناس اللي يعرفوني رسمتلي صوره من وانا صغير انا مش شايفها ف نفسي وهما مش مقتنعين غير بكده فأيه الحل

الحل التاج القادم

كوكتيل احاسيس

حبه فوق وحبه تحت

قاعد قدام الكمبيوتر باقرا مدونات او امارس هوايتي المفضله – النوم – وساعات باقرا او بالعب سودوكو او
Winning eleven

مكرونه بشاميل من ايد امي
امي وبس
غير كده مش اكّيــــل

انا بطبعي كائن بيتوتي – بأحب قعده البيت – لكن طبعا كنت باحب احساس انك مسافر وبتحضر حاجات وبتفكر ايه اللي هايحصل
بأحب فكره السفر نفسها يمكن اكتر من السفر كفعل

عدم التعبير عن احساسي قدام الناس
و اصرف ما في الجيب يأتيك ما ف الغيب
هما بيقولوا كرم بس انا شايفه زايد جدا عن الحد

يمكن عشان اسمي حاتم هههههههههههه

للاسف ما خدتش حاجه من ماما غير يمكن التحمل والصبر على المكاره عشان كده

انا باصنف نفسي اني مش كويس عشان مش زي ماما

اللامبالاه- وان كنت مريض بهذا الداء -
التباهي الزائد
حد يتدخل فيما لا يعنيه
قله الذوق
الصوت العالي
الاهانه

ان حد يزعل مني

الليل ف الشتاء
اني اكون لوحدي – مش دايما -
احترام خصوصيه الغير
اشوف حد فرحان
المساحات الواسعه الفاضيه زي الارض الزراعيه او الصحرا او البحر ريحه البحر –مش البحر نفسه -

اثبات ذات واحساس اني ليا لازمه ف الحياه
انك تحس انك ضمن منظومه نجاحك هو نجاح المنظومه والعكس

طبعا بالاضافه الى قتل للوقت ومصدر للرزق

دلوقت من اساسيات الحياه
تقريبا بقيت على الاقل 10 ساعات يوميا قدامهم

دخلت طور الادمان

كل سنه وانتم بألف خير

عيد فطر سعيد

كل عام وانتم الى الله اقرب وعلى طاعته أدوم

2007-09-07T20:50:00.000+02:00

كل سنه وحضراتكم طيبين

اللهم بلغنا رمضان

واخرجنا منه مغفور لنا

سامحوني لن أقدر على المتابعة طوال شهر رمضان

انتظروني ان شاء الله أول أيام العيد

تاج من الاخت العزيزه

واحده من الناس

سايبلكم امساكيه شهر رمضان المبارك وفق موقع

IslamicFinder.Org

موقع رائع اتمنى منكم زيارته

وقصه قصيره عايز اعرف رأيكم فيها

كل عام وأنتم بخير

اللقاء الأول

2007-09-07T20:17:00.000+02:00

ياه أخيرا هنتقابل
أنت مش مصدق وانا كمان مش مصدقه
احنا بنتكلم على النت من أكتر من سنه ودلوقت بس قررنا أننا نتقابل
أنا كنت عايزه أصرحك بحاجه قبل ما نتقابل وأنا مكنتش اقدر اقولك عليها قبل كده
وليه مقولتيش عليها قبل كده
لاني مكنتش واثقه من جديتك في الكلام معايه وكمان لاني كنت خايفه لاننا في بدايه تعارفنا
اوك ايه هي الحاجه دي
أنا كذبت عليك بخصوص ملامح وجهي

الصوره اللي انا ورتهالك على انها صورتي دي مش صورتي أنا

دي صوره من على النت معرفش بتاعت مين
وليه كذبتي عليه وقولتلي أنها صورتك؟

لأني كنت خايفه أنك تطلع واحد عايز يتسلى وخلاص ولو شفتني ممكن تعملي مشكلة بالصورة
وأنتي دلوقت يعني واثقه فيا؟
طبعا
ده عندي بالدنيا وأنا مش مهم بالنسبه لي الملامح لاني لما حبيتك مكنتش بحب الملامح

كنت بحب الإنسانه والفكر اللي في دماغها مش عينيها ولا ملامحها

صدقيني أنا دلوقت مبسوط جدا لان عرفت انك بتثقي فيا وده عندي بالدنيا
انا بصراحه مكنتش متوقعه من انك تسامحني بسهوله

انا كنت خايفه لتبعد عني بعد اللي حصل او على الاقل تطلب أنك تشوف ملامحي الحقيقيه بس تأكد أني مش وحشة بشهادة ناس كتير وملامحي الحمد لله جميله يعني مفيش في شكلي اللي يخليني أخجل منه بس زي ما قولتلك كان مجرد قلق مش اكتر
خلاص خلينا ننسى كل اللي كان أنا ميهمنيش غير ان حبيبتي >لي لي< معايه وده بالدنيا
احم احم
ايه
هو بصراحه انا كدبت عليك في أسمي كمان

والله مكنش بأيدي بس زي ما قولتلك الموضوع كان قلق فمقدرتش أقول الحقيقه

سكوت

أنت سكت ليه أكيد زعلت مني طبعا عندك حق بس صدقني أنا
مقاطعا: أنا مش سكت لاني زعلان منك بس معرفتش أكمل وأقولك يمكن عشان أنا من سنه وأنا متعود أقولك يا لي لي معرفش ليكي أسم تاني بس عارفه دي غلطتي أنا مش غلطتك أنتي لأني كان مفروض من زمان أندهلك بالأسم اللي هيفضل طول العمر على لساني يا حبيبتي هو ده الاسم اللي هندهلك بيه من هنا ورايح
انا مبسوطه اوي دلوقت انا مش عارفه اقولك ايه بس انت أثبتلي بجد أنك انت الانسان اللي بدور علية من زمان
أوك يالا بقى عشان متتأخريش بصي أركني عربيتك قريب من المكان عشان أعرفك من عربيتك
صمت
أنتي سكتي ليه أنت لسه معايه؟
أه معاك بس في مشكلة أنا مش عندي عربية

العربية اللي كلمتك عليها هي عربية عمي وكان عندنا بالصدفه لما كنا بنتكلم على العربيات فلاقيتك مهتم بعربيتك

ولان عمي عنده نفس العربيه فقلتلك انها عربيتي عشان التواصل
أنتي ليه عملتي كده يعني تفتكري لو ساعتها قولتلي أن عربيتك مش نفس ماركة عربيتي كنت هزعل
لأ والله مش كان قصدي حاجة بس زي ما قولتلك كنت لسه قلقانه
على العموم ولا يهمك بس ليا سؤال أخير في حاجة تانية كذبتي علي فيها
لا والله بس بصراحة في كم حاجه كده صغيره مش مستاهله اننا نتكلم فيها خلاص
لا يا حبيبتي أنا أحب أعرف كل حاجه عشان ميكونش في أسرار بينا بعد النهارده
أوك زي ما تحب
اوك انا سامعك في ايه
أنا لما قولتلك اني دخلت هندسة عشان خاطر بابا كان عايز حد يكمل مسيرتة مكنتش دي الحقيقه
طيب ايه الحقيقه
أنا مكنتش في هندسة أصلا ولا بابا كان مهندس بس لما قولتلي انك مهندس

لاقيت نفسي بتلقائية بقولك وانا كمان وده عشان كنت معجبة بيك وعايزه اشاركك الحاجات اللي بتحبها

وعشان كده كنت بهرب من الكلام عن فترة دراستي
ولا يهمك يا حياتي المهم انك دلوقت قولتلي الحقيقه
ولما قولتلك أنا لما بابا توفى رفضت اني امسك الشركة بعده بما أني بنته الوحيده

وفضلت على كده أني أكون مدرسة في حضانه عشان أقضي وقتي كله مع الاطفال عشان بحبهم جدا

دي مش حقيقه بس أنت ساعتها قولتلي انك بتحب الاطفال وكان نفسي اسعدك
حياتي كل ده مش بقى ليه أهميه بعد حبنا بس أنا عشان صراحتك دي عايز أنا كمان أصارحك
أنت خبيت عليه حاجه؟
هي حاجه صغيره
أنا سامعاك
انتي لما قولتي أنك بتكرهي الراجل اللي بيلبس نضاره
مقاطعه: اوعى تكون بتلبس نضاره

لا والله دلوقت بلبس عدسات بس كنت قبل ما انتي تقولي كده بلبس نضاره
ولا عدسات

أنا اسفه تقدر تعتبر كل اللي بينا انتهى

مع السلامه وياريت متحاولش تكلمني تاني لو لاقتني اون لاين
سلام

من منا لا يرتدي القناع

2007-08-25T22:08:00.000+03:00

كل منا يرتدي قناعين
أحدهما هو الوجه الذي يظهر به الشخص أمام الاخرين ويكون هو المستخدم بين باقي الناس
هذا الوجه يحمل ما يتمنى الشخص ان يراه الناس فيه ويحتوي على معظم الصفات الجيده التي يعجب بها الناس وقليل جدا من الصفات السيئه التي لا يستطيع صاحبها السيطره عليها واخفائها وبالتالي لا يخجل صاحبه من اظهاره مما يؤدي الى ظهور هذا الشخص كمثال يحتذى ومضرب للمثل وتحيطه كلمات الاطراء والامنيات بان يصبح اكثر مما يظهر به حتى يصل الى قرب الكمال

اما الوجه الاخر فهو الوجه الحقيقي للانسان والذي يجمع كل الصفات الجيده احيانا والسيئه دائما
هذا الوجه يحاول صاحبه اخفاءه بشتى الطرق حيث هناك شبه اقتناع ان ظهور هذه المساوئ تؤدي الى خساره من حوله لما يحويه هذا الوجه من صفات يخجل الشخص نفسه من ظهورها
ويكمن ظهور الشخص بمظهر المتميز بمدى قدرته على اخفاءه لحقيقه مساوئه

ربما لا يقتنع عدد كبير بهذا الكلام ويروا - ومعهم الحق - ان هناك الكثير والكثير ممن انعم الله عليهم بالشخصيه الجذابه والتي لا تجد مبررا لاخفاء عيوبها لصغر هذه العيوب حيت تكون مزايا الشخصيه وايجابياتها طاغيه على مساوئها
لكن حتى هؤلاء لا يرغبون في وجود نقطه سوداء - ولو كانت غير مرئيه لكثير من المحيطين - ان تشوه الثوب ناصع البياض

على الجانب الاخر هناك قليل من الاشخاص لا يلتفتون الى مثل هذه الحقيقه وبالتالي لا يكترثون كونهم منبوذون من المحيطين حيت يكون هناك عدم ادراك لفداحه هذه النظره الاحتقاريه المحيطه بهم ممن حولهم فلا ينتبهون الى حتميه اخفاء عيوبهم
ولذلك يظهر هناك انواع عديده من البشر منهم من استطاع اخفاء مساوئه واظهار مميزاته ومنهم من لم يستطع ومنهم من لم ينتبه اصلا
وبالتالي يظهر الكثير منا وهناك جانب غير ظاهر من شخصياتهم ولكن بمرور الوقت لا نتحمل اخفاء الوجه الحقيقي فيظهر ما حاولنا كثيرا اخفائه ويصبح قرار المحيطين بين اختيارين

اما التغاضي عن هذه العيوب طالما المجمل جيد وتستمر الحياه بمعطيات جديده
اما الا يستطيع من حولنا تقبلنا على عكس ما عرفونا به او حتى تغيير طفيف ف الشخصيه ويكون الفراق

والى هؤلاء الذين لا يستطيعون تقبل الاخرين على حقيقتهم اتذكر أُثر عن السيد المسيح عليه السلام قوله الذي ظل يتردد كلما كانت هناك مفارقة أو مغالطة « من كان منكم بلا خطيئة فليرمها بحجر

قبل ان ترفض الاخر لمجرد ظهور جانب من شخصيته لا تستطيع التأقلم معه
انظر الى نفسك اولا
وستكتشف انك قبل هؤلاء ترتدي نفس القناع

حب ما تعمل حتى تعمل ما تحب

2007-08-02T10:05:00.000+03:00

كان في قريه من قرى الريف راجل كبير ف السن والمقام
الراجل ده كان عنده فكر ورجاحه عقل كان كل الناس بتحكي عليها وبسبب كده كان اهل القريه والقرى المجاوره بيلجاوا ليه علشان يحل مشاكلهم ويحكم بينهم في امور الاختلاف

وبصراحه الراجل ده كان كل مايتدخل ف موضوع حتى ولو كان على خلاف بقاله عشرات السنين كان ربنا بيوفقه ويجعل حل الموضوع على ايده

وعشان كده كانت كل الناس بتحبه وتحترمه
الراجل ده كان ليه ابن صغير لما وصل لسن البلوغ بدأ ابوه ياخده معاه لجلسات الصلح ومجالس الترضيه علشان كان بيأهله انه يحل محله

فمثلا لو فيه خلاف بين عائلتين يروح مع والده يحضر جلسه الصلح ولو فيه مشكله بين زوجين يحاول ابوه انه ياخد رأيه ف الامر بعد ما يحكيله المشكله وهكذا
فضلت الايام تمر والاب ربنا يوفقه في حل مشاكل الناس والابن مع ابوه بيراقب ويفكر ويشوف ويستعجب لحال الدنيا اللي بسببها كانت كل المشكلات اللي بيقابلها مع ابوه
بعد فتره الاب لاحظ ان ابنه مش عايز يكون موجود ف الجو ده وانه بدا يتحجج انه مش يروح مع ابوه
بعد فتره من الانقطاع من الذهاب مع والده رجع الولد يطلب من والده انه يرجع يروح معاه وبقى الولد مهتم بالموضوع جدا وهو اللي بدا يقترح الحلول في مجالس المصالحه وكان للحق منصف ومقنع وكان الناس بيحترموا كلامه ويطبقوه احترامهم لكلام والده
ف يوم الاب ده تعب وحس ان ساعته قربت فنادى على ابنه وقاله انت بقالك سنين معايا ف كل مشاويري والعمر اللي جاي مش هايبقى قد اللي راح وعشان كده انا عايز اطمن عليك قاله اطمن يا والدي انا اتعلمت من المواقف اللي شفتك بتحلها كتير وانشاء الله ربنا يوفقني وابقى عند حسن ظنك
الاب سأل ابنه طالما زي مابتقول انك اتعلمت فقولي الناس ف الدنيا زي بعض ولا مختلفين؟
الابن قال الناس على اختلافها 3 انواع

اول نوع هم الجود (كويسين يعني )

والنوع التاني نحس (ودول اللي عكس الجود )

والنوع التاني لا دول ولا دول ( عاديين بمعنى اوضح)
فقاله الاب افرض جالك جود بيتعاركوا مع نحس قاله آخد من الجود وادي النحس وهايبقوا متراضيين
فقال ولو جالك نحس بيتعاركوا مع نحس قاله آخد من جيبي واديهم وهانبقى متراضيين
فقال ولو جالك جود ومعاركهم مع الجود فقاله دول مش هايحتاجوا لواحد زيي مشاكلهم بتتحل قبل ماتبتدي
قاله انا اطمنت عليك وعلى اهل بلدي من بعدي بس انا كنت عايز اسأل من زمان ايه اللي خلاك تنقطع تكره وايه اللي خلاك تعود حابب
قاله انا لسه مش حابب المسأله بس انا سمعت حكمه وبعمل بيها
ابوه قاله ايه هي الحكمه دي

قال الامام علي بن ابي طالب كرم الله وجهه افضل الاعمال ماأكرهت نفسك عليه

مش شرط نحب كل اللي بنعمله المهم يكون اللي بنعمله له قيمه

حد فهم حاجه ؟؟؟؟؟؟؟

بدون صوره أو عنوان

2007-08-02T09:57:00.000+03:00

mada

bocycat
قلوب حائره
kasperb4
الحلم العربي
انسان مقيد
غمض عينيك
nermeen
بيقولوا سايكو

جزاكم الله خيرا

مافضلش غيري عشان اتاج

2007-07-07T18:18:00.000+03:00

شكر الى العزيزتين
جزء مني
الحلم العربي

انت مين ؟؟

لو على اسمي البلوجري فانتم تعرفوني أنا ولو
اصحابي وعيلتي بيقولولي توما
ف المعاملات الرسميه بشهاده الميلاد
اسمي حاتم
وزمان كان نفسي يبقى اسمي مدحت مش عارف ليه

معايا شهاده اني مهندس معتمده من جامعه القاهره وماضي عليها العميد
بأدعي اني انسان طبيعي عايز ابقى حاجه كويسه

- مين اكتر ست اشخاص بتحبهم ؟؟؟

بصوا هما 6 فئات هاقول

عيلتي

ومادا صاحبي الانتيم

و اصدقائي اللي شافوني اصحابي يعني

و اصدقائي من المدونين اللي مش عارف عنهم غير مدوناتهم

و اي نوعين تاني من البشر يكونوا ولاد حلال وطيبين
خلينا نقول الدكانره عشان محتاجينهم

واللي بيكتبوا بايدهم الشمال -الشوول-

- هل انت سعيد ؟؟

ساعات بابقى فرحان قوي من حاجه مالهاش لازمه وساعات بابقى مش فرحان مع ان كل اللي حواليا هايطيروا
انا اصل السعاده عندي مقترنه بالرضا عن النفس وراحه البال وعشان كده انا الحمد لله مش منتظر ابقى سعيد ف يوم من الايام

- لو اجتمعت مع حسنى مبارك فى مكان واحد هتعمل ايه ؟
مش انا اللي هاعمل
هو هايخدها جري ويخرج من الناحيه التانيه
ويطلع يصرخ ويقول
انا ولــــو لا يمكن نجتمع ف مكان
على اساس انه صرصار ولقى مبيد قدامه
لو بتكلم ف حاجه ممكن تحصل بجد فانا مش يهمني اشوفه بس لو رحت هاتفرج هو قاعد فين وظروف المعيشه وكده و ممكن اقوله استعد لحساب ربنا

واحب اقولك ان افعالك وافعال اللي حواليك ف رقابتك

متهيألي كده هايزعل

ممكن ابقى ساعتها الطف الجو

انا مش لاقي روحي

- لو معايا مليون و نص اعمل ايه ؟؟؟
هاعمل عمل خيري يقعدلي

انا اصلي افتريت كتير ف دنيتي وعايز اشتري نفسي قبل ماعملي يتقطع من الدنيا
وكام الف كده اروق نفسي بقى

هي فلوسي كلها هاوهبها لغيري

ده انا حتى كده ابقى ملاك

- بتحب مصر ؟؟

طبعا مصر هي امي

فيه حد مايحبش امه
ده حتى يبقى مش متربي
وعلى رأي الاستاذ حسين الجسمي ده لو هي مطلعه عيني باحبها موت

بتحب البنات؟

وده برضه سؤال

دول نص الدنيا

بس بصراحه مش باحب البنات ف المجمل

باحب نوعيات معينه

والنوعيات التانيه اللي انتوا عارفينها لا

اصل الدكتور مانعني ارمرم

- انت مسلم ؟؟

الحمد لله

- ليه ؟؟
الحمد لله الذي انعم علي بنعمه الاسلام بدون حول مني ولا قوه

- مين اكتر شخصية متقدرش تستغنى عنها ؟؟؟
هما بصراحه كذا شخصيه

يعني طبعا امي وابويا واخواتي ربنا يخليهم
صاحبي الانتيم محمد انا بأدّعي ان ماحدش بيفهمني زيه ويمكن يعرف عني حاجات انا ماعرفهاش مع انه مش بيحس بكده

غير كده انا شخصيه انطوائيه ممكن اقعد ف البيت شهر مااشوفش حد وماكونش حاسس ان فيه حاجه غلط
ولو اشياء يبقى الكومبيوتر والتليفون
نعمه ياجماعه وفعلا ادوني الاتنين دول وعيشوني ف شقه فاضيه بس فيها كهربه

امال هاشغلهم بالطاقه الشمسيه

ايه اكتر موقف محرج ؟؟-

هو عادي يعني كنت مستني واحد صاحبي عند بيته ف يوم كان عندنا فيه امتحان ايام الكليه وكانت الساعه 6 الصبح ولاقيت واحده كبيره ف السن قالتلي لو سمحت تطلع تنادي واحده من العماره دي علشان انا ماقدرش اطلع الخامس

قولها الحاجه فلانه واقفه تحت
طلعت وفاكر اللي انا طالعلها واحده قدها ف السن المهم طلعت وخبطت طلعلي واحد من اللي بنشوفهم ورا الناس المهمين جسم رهيب

انا باقوله" لو سمحت س موجوده الحا ...... "وملحقتش اكمل
لقيت وشه جاب الوان وبيقول ووشه بيطق شرار "وكمان جاي لحد هنا يا ....... ياابن ال....."

وطبعا انا سمعت ابويا بيتشتم ما مسكتش نفسي قمت ضربت اللي وصلتله منه بس قام ماسكني ورافعني عن الارض قيمه متر ونص ولسه هايضرب لاقيت باب الشقه التانيه فتح وواحده نازله بتقول لا هاتأخر عن الحاجه فلانه
ايوه والله انا سمعت الاسم ده
طلعت خبطت على شقه غلط ولحظي كان فيها بنت متسميه على اسم الست اللي انا طالعلها وعندها 18 سنه
الحمد لله الموضوع عدى على خير بس شيلت الماده اللي امتحنتها ساعتها واهو قضى اخف من قضى

- الامنية اللى تتمنى تحقيقها ؟؟

نفسي احب نفسي وارضى عنها واكون بني ادم كويس ينفع زي مابينتفع
قولوا امين

التاج باه يتمرر لمين ؟؟؟؟

انا كل اللي اعرفهم بدأت اقرالهم بعد ما اتاجوا
وبعدين دلوقت انا ماينفعش اعرف حد مااتاجش
يبقى مش من مستوايا
بس ينفع اديه ل مادا

مواصفات فتاة أحلامي

2007-07-07T00:35:00.000+03:00

في يوم مع عيلتي كلها

قالولي احكيلنا عنها

البنت اللي بتحبها

ازاي وليه بتحبها ؟؟؟

مش بس هاقول عن شكلها

جسمها وشعرها

أو حتى خفه دمها

أنا هاحكي عن اللي حاسه قلبي نحوها

بارتاح لو أكون بقربها

أو بس اعدي جنبها

لو هأقول عن وصفها

مافيش ف الدنيا قدها

محترمه تعرف ربها

تدعيله دايما يغفر لها

ذنبنا وذنبها

محتشمه ف كل لبسها

ضحكتها غصب عنها

لا الدنيا تخفي شمسها

مكسوفه طبعا منها

ماشيه بتخبّي وشها

لا الناس تدوخ من حسنها

كمان يعجبني مخها

دا عالي جدا فكرها

يا جماعه سابقه سنها

تجود بكل اللي عندها

لو حتى هاتقضي نحبها

تموت ولا حاجه تهمها

غير مين يراعيني بعدها

دي الصورة اللي رسمتها

ف البنت اللي هاحبها

تفتكروا هاعيش لحد ما الاقي واحده زيها

مازلت أبكي عندما أتذكرك

2007-07-03T17:16:00.000+03:00

مازلت ابكي أحياناً

عندمــا أتذكــــرك

مازلت أبكي أحياناً

عندما اجد أحداً يحمل اسمك

مازلت أبكي أحياناً

عندما يمر من امامي طيفك

مازلت أبكي أحياناً

عندما أجد شيئاً ف الماضي كان يخصك

مازلت أبكي أحياناً

عندما أمُر على مكان شهد شذا عبيرك

لقد ودعتُــك الى مثواك

وصِـــرت وحيداً

بعدما تعاهدنا على عدم الفراق

مَن بعدك يُضمد جراحي

ويُهــــوَن عليا متاعب الحياه

من بعدك يجفف دموعي

وينير دروب الظلام

لكن

عزائي الوحيد

أني أعرف بالتأكيد انتهاء معاناتك

لكني

مازلت أبكي عندما

أرى الأوراق تتساقط في الخريف

مازلت أبكي عندما

أرى صراع الأمواج في البحار

تتساقط الاوراق من فوقي

وتتقاذفني الأمواج فيما بينها

وحتى الآن

مازلت أبكي

أبكي أحيانا عندما أتذكرك

مازلت أبكي عندما

أرى الأحبـــاء مجتمعين

وأرى نفسي وحيــدا

مازلت ابكى عندما

أرى جمال الدنيا زائف

لأنك لست فيها

لأنك لست معي

تُظلم الدنيا من حولي

ولا أجد سلوى سوى

تذكر أيامنا معا

وحتى الآن

مازلت أبكي

أبكي أحيانا عندما أتذكرك

في وحدتي أراك أمامي

أتضرع اليك ياربي

أن تلهمني صبر الدنيا

وتهبني قدرة على التحمل

لقد حاولت كثيرا التظاهر بالنسيان

لكنك

لست الحب الذي يقهره النسيان

سأظل على عهدي حتى نلتقي

وحتى ذلك الحين

سأظل أبكي

سأبكي دائما وانا أتذكرك

ولم نلتقي بعدها

2007-06-23T13:00:00.000+03:00

اذا ما قُـــدر لي ان أرحل عنك

حبيبي

لأمضي في طريق الصمت

فلا تحزن

ولا تتحدث عني بين الدموع

بل اضحك وانت تتذكرني

كما لو كنت هنا بجوارك

فسآتي ............سآتي

وسأجد الطريق

فقط اذا لم تُـقم في طريقي

حواجز الحزن والدموع

وعندما تسمع أغنيتي المفضلة

أو تشاهد سمـــاؤك صافية

لا تجعل ذكــــراي حزينة

فروحــي تحبــك

دائمــــــــا

تفكر ف معاني الاذان

2007-06-19T06:14:00.000+03:00

حد فكر ف مفردات الاذان ؟؟؟

قصدي أن كل الناس من ساعة ما توعى على الدنيا وهي بتسمع الاذان 5 مرات ف اليوم

أو بمعنى أصح 4 مرات لو اعتبرنا ان مش كل الناس بتبقى صاحية ساعة صلاة الفجر

وخلاص احنا برمجنا نفسنا ان الاذان هو ميعاد التذكير بالصلاة

الميعاد اللي بيفكرك أن انت عليك فرض لربنا لازم تأديه

بس الناس بتكون مشغوله فنقول آه أنا عرفت ان الوقت حان

بس أخلص بس الباب ده فاضله صفحتين بس عشان لوقطعت المذاكره مش هاعرف أرجع تاني

أو أخلص الفاكس ده اصل المدير مستعجل عليه

أو اخلص الحلقة دي عشان مش ببقى فاضي لما يتعاد

وهكذا من الكلام اللي بيضحك بيه الشيطان علينا

بس متهيألي مافيش حد تفكـّـر ف المعني الحقيقي للاذان

وان ربنا بينادي علينا علشان نقضي فرض ربنا عليتا

تعالوا معايا نحاول كده مع بعض نشوف ايه هيّ مفردات الاذان واللي بتحمله من معاني

اللــه أكبــــــــــر اللــه أكبــــــــــر

يا عباد الله . يا مشغولين بالمذاكره و الشغل واللعب والسفر والتفكير

ربنا اكبر من كل ده ... ربنا أهم من كل ده

سيب اللي ف ايدك .... سيب اللي شاغلك

وتعالى أقضي فرضك

أشهـد ألا الـــه الا اللــه أشهـد ألا الـــه الا اللــه

انت لسه ماقمتش افتكر انك شهدت ان الله لا شريك له

انت اللي قلت كده

انت اللي اقريت بكده

مافيش غير الواحد الاحد

انت مابتعبدش غير ربنا

سيبك من الشغل ......سيبك من الفلوس

مافيش حاجه تستاهل انك تنشغل عن فرض ربنا كتبه عليك

أشهد أن محمدا رسول الله أشهد أن محمدا رسول الله

انت لسه متأخر

مش بتقول ان سيدنا محمد ( اللهم صلي وسلم عليه ) هو قدوتك ومعلمك

طب سيدنا محمد قال ( وجعلت قُرة عيني ف الصلاة ) صدق رسول الله

شفت أد ايه الصلاه كانت مهمة عند الرسول ( صلى الله عليه وسلم

يالا اعمل كما كان أكرم البشر يلبي نداء الرحمن

كانت راحته ف الصلاة ( أرحنا بها يا بلال ) صدق رسول الله

حيّ على الصـــلاة حيّ على الصـــلاة

ربنا كتب عليك الصلاه عشان تثبت انك تستحق رحمته

ربنا اللي اداك كل حاجه

الصحه .... الفلوس ... الجاه والسلطه

وكرمك وخلاك في احسن صوره من غير حول منك ولا قوه

يالا ميعاد رد الدين

يالا عشان تقضي وقت مع ربنا مافيش بينك وبينه غير انك تخلص النيه

تشكره على نعمه وتطلب منه وانت موقن ان ربنا هايجيبك

وان مافيش ف الدنيا غيره يقدر يحققلك مرادك

فهو على كل شئ قدير

حيّ على الفـــلاح حيّ على الفـــلاح

يالا مش ناقص تأخير

يالا دي مصلحتك

ده فيه زياده رصيدك من الحسنات

هو ده اللي هايفضلك يوم الحساب بدل ماتتزنق وتلاقي نفسك مديون

وساعتها مش هايفيد الندم

هو ده اللي فيه فلاحك

لا مال ولا جاه ولا عزوة هاتفيدك

اللــه أكبــــــــــر اللــه أكبــــــــــر

لسه برضه مش راضي تقوم

ربنا اكبر من اي شئ انت مشغول بيه

راجع نفسك لسه الوقت مافاتش

لا الـــه الا اللــه

لسه متأخر ؟؟؟؟؟

لا الـــه الا اللــه

تفتكروا لسه فيه حد هايتأخر عن صلاته

أتمنى ان ده مايحصلش

ألف اعتذار

2007-06-16T13:16:00.000+03:00

اوقات كتير الانسان بيتصرف قبل مايفكر ف توابع التصرف ده

وايه اللي ممكن يسببه التصرف ده من مواقف ممكن تكون اخر حاجه الانسان ده يتمنى انها تحصل

بمعنى انك ممكن يكون قاعد قاعده مع عيلتك

اوزمايلك ف الشغل او اصحابك

وتقول كلمه او تعمل تصرف بحسن نيه وساعات استظراف اوهزار لمجرد قتل الملل او السكوت او نتيجه لموقف بيحصل

وانت مش مدرك ان الكلمه اللي بتقولها ف جزء من الثانيه

ممكن تسبب مشاكل ممكن ماتتداواش باقي عمرك

برغم من ان الشواهد بتقول عكس كده
بس دايما المظاهر خادعة

ده على افتراض ان شريكك ف الموقف طيب وهايعديها بس عشان الدنيا تمشي

وان الكلمه اللي انت شايفها بسيطه و ماتستاهلش

ممكن تكون عند واحد تاني من الممنوعات ولايمكن غفرانها

لو بنفكر ف كل ده صدقوني هانفكر قبل مانزعل اقرب الناس لينا

واللي لا يمكن يتعوضوا تاني مهما عرفت او شفت

فيه ناس هاتقول الكلام اللي احنا بنقوله ده انعكاس للي بنفكر فيه

وهو ده اللي انت مقتنع بيه جواك والا ماكانش خرج غصب عنك

بس انا شايف غير كده والا كان كل الناس زعلت من كل الناس

اللي قصدي اقوله انه فيه ناس مش بتعمل حسابها ف كل المواضيع دي والا الدنيا هاتبقى مكلكعه قوي

ومش هانقدر نعيش فيها

لانه بالمنطق ده انا لازم اعمل حساب كل حاجه وادرس كل الناس ونفسياتهم وارائهم

وده موضوع ممكن يكون مستحيل تحقيقه

وده مايمنعش ان لازم الواحد يهتم شويه - كتير يعني - باللي بيحبهم ويقدر مشاعرهم

وبلاش الاعتماد الساذج انهم قلبهم ابيض ومش بيشيلوا لحد وهايسامحونوا

- بالرغم ان ده صحيح ف معظم الاوقات -

لان ده هايؤدي ف النهاية لاشياء صدقوني لا نتمنى حدوثها

وأحب أقول ان الاعتذار عمره ماكان حاجه نخجل منها او نستكبر اننا نعملها

بالعكس انا شايف ان ده من علامات الصدق مع النفس والاعتراف بالخطأ

وبعدين ده اقل حاجه ممكن نعملها لأشخاص كل ذنبهم انهم بيستحملونا بكل عيوبنا

وكمان عمر ما فات الاوان اننا نعتذر

مش علشان موقف مر عليه وقت فده معناه انه اتنسى

بالعكس أوقات كتير بيكون الاعتذار المبكر سبب منع مشاكل كبيره بتحصل مع الزمن

وممكن توصل لا قدر الله لحد القطيعه الكامله

عشان كده كل ما كان الاعتذار بدري كل ما كان ف مصلحتك

على الاقل هاتحس انك حافظت على الناس اللي بتحبهم وبيحبوك

طبعا عرفنا ان انا غلطت ف اقرب الناس ليا

صديقي الوحيد

بس والله بدون ماأقصد

أنا لا يمكن أعمل حاجه تضايقه عن عمد

أصله مش مجرد صديق

ده أخويا و كاتم اسراري و رفيق عمري والانسان الوحيد اللي اتمنيت ف يوم اكون زيه

اينعم هو بني أدم زينا يعني مش قديس

بس هو زياده شويه

البني آدم اللي اتعلمت منه حاجات كتير غيرت ف شخصيتي

علمني أعطي بدون مقابل

علمني أبدأ بنفسي وما قولش كل الناس كده

علمني اني اعمل حاجه مش عايزها عشان غيري ممكن تفرحه - بس بصراحه عمري ماعملت كده -وده كفايه من وجهة نظره

علمني اني اعمل اللي عليا وما اعتمدش على الصدفه

علمني احب ناس بغض النظر عن مساوئهم - مش كده مكتوبه صح - اصلي كنت علمي

علمني اكون انسان يحس ويفهم ويقدر

فياريت كل اللي يقرا الكلام ده يطلب منه انه يسامحني

وهو طيب وهايسامح

خدمه يعني ومردوده لكم ان شاء الله ف الافراح بس

الى صديقي

mada

مني لك ألف اعتذار

انا آسف

بك أستجير

2007-06-14T11:13:00.000+03:00

بكَ أسْـتجيرُ ومن يُجير سِـواكَا ** فأجِــر ضعيفـاً يحتمي بحمــاكا

إنِّي ضعيــفٌ استعينُ على قوى ** ذنبي ومعصيتي ببعِضِِ قواكـا

أذنبتُ ياربي وآذتني ذنـــوبي ** ما لهـا من غافـــرٍ إلا كــا

دُنياي غرتني وعفـوكَ غـّرني ** ما حيلتي في هذه أو ذاكـــــا

لوأن قلبي شكَ لم يكُ مؤمنــــاً ** بكـريمِ عفوكَ ما غوى وعصاكا

يا مُــدرك الأبصارِ والأبصارُ ** لا تدري له ولكُنهِه إدراكـــــــــا

أتراكَ عيـنٌ والعيونُ لها مدى ** ما جاوَزتــْــهُ ولا مدىً لمداكا

إن لم تكن عيني تــراكَ فإنني ** في كل شـيء أستبينُ عُلاكـا

يا ُمنبت الأزهارِ عاطـرة الشذا ** هذا الشذا الفواحُ نفــحُ شذاكا

يا ُمرسل الأطيارُ تـصدحُ في الرُبا ** صـدحاتهـا تسبيحتٌٌ لعُلا كا

يا ُمجري الأنهـارِ ما جـريانهـا ** إلا انفعالــــــــةِ قطـرةٌ لنداكا

حنين الى الماضي

2007-05-28T15:56:00.000+03:00

لو سألت مجموعه من اصحابك أو من معارفك لو فيه امكانيه انك تركب آله الزمن تحب ترجع لأي فتره من حياتك؟

أكيد هاتلاقي عدد كبير منهم بيختاروا انهم يرجعوا لفتره الطفولة وأنا واحد من الناس دي

وده لان فترة الطفولة هي الاساس لباقي فترات حياتك وهي اللي على اساسها تقدر تحدد انت شكلك هايبقى ايه ف المستقبل

بمعنى ان الفترة دي هي اللي بيبان فيها ميولك ورغباتك واحلامك وطباعك

وعن طريق كده تقدر الناس تعرف انت هاتبقى مين

وكل ده بسبب ان الفتره دي هي المرحله اللي بتبقى فيها نقي وبرئ وعلى رأي صاحبي الانتيم قبل ما تلوثك المدنيه

او بتعبير آخر قبل ماتجرب الدنيا بكل مكرها وزيفها

النهارده افتكرت الفتره دي من حياتي لما لاقيت اطفال ف سن 9 سنين عمالين بيلعبوا ويجروا ورا بعض

ورغم اختلاف الزمن وكميه الادراك اللي الولاد عليها دلوقت الا ان برضه تحس بروح الطفوله بتغطي المكان

حسيت اني فعلا ركبت آله الزمن ورجعت طفل ف سنهم تاني وقعدت افتكر واضحك كأني بألعب معاهم بالظبط وانا فرحان

وفجأه لاقيت واحد بينبهني اني المفروض مش ابقى موجود ف المكان اللي كنت فيه

بصراحه زعلت من الراجل ده مع اني ماعرفوش ومع انه بيؤدي شغله

بس زعلت لاني اكتشفت ان الفتره دي من حياتي انا ماعيشتهاش زي ماكان المفروض اعيشها او بالاصح زي ماكان نفسي اعيشها

وده اللي مأثر لغايه دلوقت على شخصيتي

فياريت كل اب وكل ام يسيبوا ولادهم يعيشوا احلى فترات حياتهم عشان بعد كده صدقوني لما يفتكروا يفرحوا انهم كانوا زمان

أطفال بمعنى الكلمه

اخترنــــــــــــــــاه اخترنــــــــــــــــاه

2007-05-27T23:57:00.000+03:00

ايام الدراسه كلنا كنا بنتمنى ان كل الامتحانات تيجي اختيار من متعدد او زي مابيقولوا
Multiple choices
ساعتها مش كنا مدركين صعوبه الموضوع على طريقة انها لو مازودتش مش هاتنقص

وبعد كده لما اصطدمنا بالحياه العملية شوفنا الصورة على حقيقتها

وان اللي احنا كنا في يوم من الايام فاكرينه غاية املنا نكتشف انة كابوس مزعج بندعي ان احنا مش نحلم بيه ف يوم

وده بسبب اننا بنلاقي انه برغم ان الموضوع بيبان بسيط بس فكرة انك تختار حاجة واحدة من كذا حاجه دة شئ صعب جدا

والاصعب انك لابد انك تتحمل نتيجة اختيارك دة باقي حياتك

وده على اعتبار ان الموضوع المتعلق بالاختيار ده هايأثر بشكل او بآخر ف حياتك المستقبليه

كتير منا لسه بيندم على اختيار هو اختاره ف وقت سابق من حياته واكتشف بعد كده انه أساء الاختيار

وفيه الاصعب من كده وهو اللي بيفضل يلوم نفسه ودنيته بتقف عند الحد ده ويفضل يستنى ان الفرصه ترجع من تاني عشان يحسن اختياره وبعد فترة كبيره يلاقي انه كان مستني وهم مش هايتحقق

بس فيه وللحق ناس عندها حاسه سادسه بتقدر تعرف من خلالها الاختيار المناسب

وان كانوا قله وبرضه بيبقى قدامهم دلالات تدلهم علي اسباب الاختيار

وان كنت لا انصح باتباع طريقه الاحساس دي

المشكله الاكبر في ان ف معظم الاوقات بتلاقي عامل الزمن داخل معاك ف اللعبه

بمعنى انك تلاقي انه مطلوب منك انك تقرر مسأله مصيريه في حياتك ف زمن بالنسبه ليك مش كافي انك تهرش دماغك وتبدأ تفكير

واعتقد ان ده هو اللي بيدفعنا لاتخاذ موقف او انتقاء خيار انت مش واثق في جدواه بالنسبه ليك

وبالتالي هو ده اللي بيوصلنا لحاله الندم اللي بتتبع الاختيار الخاطئ اللي بنتخذه في غفله من التفكير

وعلى العكس ان الواحد مننا اذا اخد وقت كافي لدراسه امر معين فأن ده ان شاء الله يبين ليه الاختيار المناسب

وحتى اذا ماكنش – لا قدّر الله – الاختيار الامثل فده على الاقل هايخليه يتعامل مع الموقف ويخليه يكمل حياته بناء على الظروف الجديده

وانا من مكاني أحب اشيد بشعبنا العزيز اللي درس احتياجاته و دوّر على اللي يقدر يحققهاله

وعشان كده قدر يتعايش مع ظروفه برضا يثير التعجب قبل الاعجاب

والادهى انه طول حياته بيغني بكل فخر ان احنا ......

اخترنــــــــــــــــاه اخترنــــــــــــــــاه

وجـــــــــــــــــــــــدتها

2007-05-26T23:32:00.000+03:00

اتأكدت النهارده من ان معظم اللحظات اللي بنكتشف فيها نفسنا بتبقى ف الحمام

ايوه the bathroom مستغرب ليه؟

الحمام غير انه "بيت الراحة" هو كمان المكان الوحيد اللي بنشوف فيه نفسنا على "حقيقتها" بدون رتوش او اضافات

مش صح ولا ايه

وكمان هو المكان الوحيد اللي بنتصرف فيه "على الطبيعه

وكمان المكان اللي بنفرغ فيه طاقاتنا المكبوتة

كل المغنيين لما تيجي تسألهم اكتشفت موهبتك ازاي

يقول على طول اصلي كنت بأغني ف الحمام

او انا والله لما باغني ف الحمام امي بتتمنى اني ماخرجش منه عشان تفضل تسمعني

بس انا محتاج فرصه

وناس تانيه ماتعرفش تقرا الجورنال غير ف الحمام

والاكتر ان فيه ادباء بيكتبوا ابداعاتهم جوه بيت الراحه

حتى ارشميدس اكتشف قانون الطفو وهو بياخد دش

أنا برضه النهارده تقمصت شخصية أرشميدس

جالي كام فكره عبقريه وانا بأخد دش ارتحت جدا لمجرد اني فكرت فيهم

وبغض النظر عن صعوبة التطبيق بس كويس اني فكرت ف "التغيير

ده الاهم .غير كده مقدور عليه

المهم ان معظم اللي كان بيشغل بالي لاقيتله شبه حل

وبالتالي من حقي اقول بأعلى صوت

وجـــــــــــــــــــــــدتها

انا فاشل , انت ايه ظروفك ؟

2007-05-26T10:18:00.000+03:00

كل ما يبتدي يوم جديد - على عكس كل الناس - احس باني مش مبسوط

يوم جديد معناه عندي فشل تاني اني اتغير

حاولت كتير اني اغير الاحساس ده لكن مش قدرت

واللي فضل اني اكره ضعفي واستسلامي للموضوع

كأني هافضل زي ماأناكده على طول

بس أنا مش عايز افضل كده

انا فعلا عايز اتغير بس مش عارف الطريق

اول ماعملت اني قلت ان يمكن الدراسه بتأثر على حياتي قمت مكبر للدراسه

لحد ما خرجت من الكليه بالعافيه

وخرجت زي ماكنت من غير تغيير

قلت يمكن اصحابي هما اللي بياثروا على مسيرة التغيير - حلو المصطلح دة من بتوع النشرة - فقمت عامل ايه ؟

بعدت عن صحابي - للاسف - ولقيت اني لسه زي ما انا

غيرت شكلي ولبسي وأكلي بس كل حاجه زي ماهيّ

انا تقريبا اللي فاضل اني اغيره هما أهلي

المشكله ان لو غيرت اهلي هابقى زمالك

ويبقى غيرت من فشل للانهيار
وبعدين باتغاظ لما حد يحسسني اني فاشل

مش عارف اعمل ايه

تقريبا هافضل فاشل ومش هاخد باغنيه شيرين

أنا مش هافضل كده على طول

مش هاستنى العمر يعدي

سامحيني يا شيرين

انا شكلي فاضل كده شويه

بس برضه ولــــــــــــو

هاتغيــــــــــــــــــر

اتكلمــــــــــــــــــــــوا

2007-05-26T01:46:00.000+03:00

أوقات الواحد مننا بيحس انه عايز يتكلم بس بيلاقي حاجه من اتنين

يااما يخاف يتكلم لحد يسمعه

يااما مايلاقيش حد يسمعه

انا بقى فقري لما احب اتكلم الاقي الاتنين

لغايه ما سمعت اغنيه لمحمد منير اسمها اتكلموا

انا سمعتها كتير الاغنيه دي بس ماكنتش بأحس بيها لغايه النهارده

ساعتها قررت اني اتكلم من غير ما اخاف ان حد يسمعني

او ادور على حد يسمعني

انا نويت اتكلم يا عالم

فأسمعوا وبعدين

اتكلمــــــــــــــــــــــوا